قازاقستاندا بالالار ءۇيى بولماۋى ءتيىس

استانا. 22 ءساۋىر. جەتىم جانە اتا-اناسىنىڭ مەيىرىمىنە ءزارۋ, قاراۋسىز قالعان بالالاردى پاتروناتتى تاربيەلەۋشىلەرگە بەرۋ كەرەك. پارلامەنت ماجىلىسىندە وتكەن «دوڭگەلەك ۇستەلدە» وسىنداي وي قوزعالدى. بۇل تۋرالى «ەكسپرەسس ك» حابارلادى. جيىندى باسقارعان پارلامەنت ءماجىلىسىنىڭ دەپۋتاتى زاعيپا باليەۆا بالالار ۇيىنە بولىنەتىن الەۋمەتتىك تولەمدەردى پاتروناتتى تاربيەلەۋشىلەرگە ۇسىنعان ءجون دەگەن پىكىرىن جەتكىزە وتىرىپ: «ءبىز بالالار ۇيلەرىن پانالاپ وتىرعان بالالاردى اسىراۋعا قارالعان قارجىنى قايتا باعدارلاۋدى ۇسىنامىز. قازىرگى تاڭدا 14 بالالار ءۇيى جابىلدى», – دەدى. جاڭا زاڭ بويىنشا, پاتروناتتى تاربيەلەۋشىلەر تولەماقىنىڭ 20 پايىزىن مەملەكەتتىك ءبىلىم بەرۋ جيناقتاۋشى قورىنا تاپسىرۋى كەرەك. قاراجاتتىڭ 40 پايىزىن باسپانا الۋ دەپوزيتىنە جىبەرىپ, قالعانى كيىم-كەشەك پەن ازىق ت ۇلىككە جاراتىلادى. جىل سايىن تاربيەلەۋشىلەر قامقورلىق جانە قورعاۋ ورگاندارىنا بۇل قارجىلاردىڭ قالاي جاراتىلعانى جايلى ەسەپ بەرۋى ءتيىس. ەگەر اسىراپ الۋشىلار بالا كامەلەتكە تولعانشا ءوز مىندەتتەرىن ورىنداسا, ولار جەر, كولىك, جىلجىمايتىن م ۇلىككە سالىناتىن سالىقتاردان بوساتىلادى. زاعيپا باليەۆا باسقوسۋدا پرەزيدەنت جانىنان بالالار قۇقىعىن قورعاۋمەن اينالىساتىن ارنايى مەكەمە اشىلۋى قاجەتتىگىن دە ءسوز ەتتى. ونىڭ ويىنشا, بۇل مەكەمە بالالار ىسىنە بايلانىستى مەملەكەتتىك ورىنداردى جۇمىلدىرىپ ءارى اسىراپ الۋشىلارعا جاعىمدى اۋرا قالىپتاستىرادى. «دوڭگەلەك ۇستەلدە» پارلامەنت ءماجىلىسى توراعاسىنىڭ ورىنباسارى داريعا نازارباەۆا جەتىم بالالار تۋرالى مالىمەتتەر جيناقتايتىن قور قۇرۋدى  ۇسىندى. ونىڭ ايتۋىنشا, مۇنداي وزگەرىستەر اسىراپ الۋ ءۇردىسىن اشىق جۇرگىزۋگە سەپتىگىن تيگىزەدى. سونىمەن قاتار, داريعا نازارباەۆا: «بالا اسىراپ العىسى كەلگەن جان ءوزى تۋرالى مالىمەتتەردى ونلاين ارقىلى بەرگەنى ءجون. ياعني, ول وزىنەن تالاپ ەتىلەتىن قاجەتتى قۇجاتتاردى جيناقتاۋ كەزىندە ەشقانداي شەنەۋنىكتىڭ الدىنا بارمايدى. بۇل جاعدايدا ءىس بارىسى تازا جۇرەدى», – دەدى. باسقوسۋدا «قايىرىمدىلىق» ەرىكتى قوعامى» قورىنىڭ ديرەكتورى ارۋجان ساين ەلىمىزدەگى جەتىم جانە قاراۋسىز قالعان بالالار جونىندە ماعلۇماتتاردىڭ از ەكەنىنە قىنجىلىسىن ءبىلدىردى. ونىڭ سوزىنە قاراعاندا, «قايىرىمدىلىق» ەرىكتى قوعامى» قورى بالالاردىڭ قۇقىقتارىن قورعاۋ كوميتەتىمەن بىرلەسە جۇمىس ىستەپتى. سونىڭ ناتيجەسىندە جەتىم جانە قاراۋسىز بالالار تۋرالى ءبىرشاما مالىمەت جيناقتالعان. اسىراپ الۋشىلار وسىنىڭ كومەگىمەن  213 ءبۇلدىرشىندى ءوز كۇتىمدەرىنە العان. قازىرگى تاڭدا الگى مالىمەتتەر قورىندا 4 700 بالانىڭ انكەتالارى بار كورىنەدى. ال ارۋجان ساين مۇنداي دەرەكتەردى 10 مىڭعا جەتكىزۋ كەرەك دەپ ەسەپتەيدى. جولدىباي بازار. دەرەككوز: «ەكسپرەسس ك». فوتو: THENEWS.kz.