كەزدەسۋ بارىسىندا مينيستر بۇۇ بوسقىندار ىستەرى جونىندەگى جوعارعى كوميسسارى باسقارماسىنا ناتيجەلى ىنتىماقتاستىق ءۇشىن العىس ايتتى.
«2022 جىلدىڭ ناۋرىز ايىندا قازاقستاننىڭ بۇۇ قۇرامىنا قابىلدانعانىنا 30 جىل تولدى. ءبىزدى بۇۇ-نىڭ ەلدىك كومانداسىمەن كوپجىلدىق ىنتىماقتاستىق بايلانىستىرادى. قازاقستان 1951 جىلعى بوسقىندار مارتەبەسى جونىندەگى كونۆەنتسياعا 1999 جىلى قوسىلدى. بۇدان بولەك قازاقستان ادام قۇقىقتارى جونىندەگى حالىقارالىق قۇجاتتاردىڭ باسىم كوپشىلىگىنە قوسىلدى. اتاپ ايتقاندا, ازاماتتىق جانە ساياسي قۇقىقتار جونىندەگى حالىقارالىق پاكت, بالا قۇقىقتارى جونىندەگى كونۆەنتسيا, ازاپتاۋلارعا قارسى كونۆەنتسيا, ايەلدەرگە قاتىستى ديسكريميناتسيانىڭ بارلىق ءتۇرىن جويۋ جونىندەگى كونۆەنتسيا جانە ت.ب.
وزدەرىڭىز بىلەسىزدەر, 2010 جىلعى 1 قاڭتاردا رەسپۋبليكا اۋماعىندا پانا ىزدەۋشىلەر مەن بوسقىنداردىڭ قۇقىقتىق جاعدايىن انىقتاۋعا باعىتتالعان «بوسقىندار تۋرالى» زاڭ كۇشىنە ەندى. بوسقىندار قازاقستان رەسپۋبليكاسىنىڭ قورعاۋىن پايدالانادى. قۇقىقتىق كومەكپەن قاتار, ولارعا ۇكىمەتتىك ەمەس ۇيىمدار, حالىقارالىق ۇيىمداردان ماتەريالدىق جانە گۋمانيتارلىق قولداۋ كورسەتىلەدى», دەدى ت.دۇيسەنوۆا.
مينيستر بوسقىندارعا, سونداي-اق پانا ىزدەۋشىلەرگە كورسەتىلەتىن كومەكتىڭ بارلىق تسيكلىنىڭ ءتيىمدى جۇمىس ىستەۋىن قامتاماسىز ەتەتىن ۇيلەستىرۋشى رەتىندە بۇۇ بوسقىندار ىستەرى جونىندەگى جوعارعى كوميسسارى باسقارماسىنىڭ ءرولى جوعارى ەكەنىن ايتتى. سونداي-اق تامارا دۇيسەنوۆا باسقارمانى الماتى پروتسەسىن قۇرۋعا ۇلەس قوسقان, ارالاس كوشى-قون ديناميكاسى مەن بوسقىنداردىڭ قۇقىقتارىن قورعاۋ ناتيجەسىندە تۋىندايتىن پروبلەمالاردى شەشۋگە باعىتتالعان ديالوگ الاڭى رەتىندە اتاپ ءوتتى.
«قازاقستان رەسپۋبليكاسىنىڭ قۇقىق قورعاۋ جانە سوت جۇيەسىن رەفورمالاۋ اياسىندا ىشكى ىستەر مينيسترلىگىنەن ەڭبەك جانە حالىقتى الەۋمەتتىك قورعاۋ مينيسترلىگىنە بوسقىندار سالاسىنداعى فۋنكتسيالار بەرىلدى. وسىعان بايلانىستى, كوشى-قون جانە بوسقىندار سالاسىنداعى بىرىڭعاي ساياساتتى قامتاماسىز ەتۋ ءۇشىن ءبىزدىڭ مينيسترلىگىمىزدىڭ جانىنان كوشى-قون كوميتەتى قۇرىلدى.
سونىمەن قاتار ءبىز بۇۇ-نىڭ نيۋ-يورك دەكلاراتسياسىنىڭ بوسقىندار مەن ميگرانتتار تۋرالى شەشىمدەرىنەن, بوسقىندارعا قاتىستى كەشەندى شارالار مەن بوسقىندار تۋرالى جاھاندىق شارت شەڭبەرىندە تۋىندايتىن وزگە دە شارالاردى ىسكە اسىرۋدى جوسپارلاپ وتىرمىز», دەپ اتاپ ءوتتى ت.دۇيسەنوۆا.
ءوز كەزەگىندە بۇۇ ورتالىق ازياداعى بوسقىندار ىستەرى جونىندەگى جوعارعى كوميسسارى باسقارماسىنىڭ وكىلى بوسقىندار مەن پانا ىزدەۋشىلەردىڭ قۇقىقتارىن قورعاۋ ماسەلەلەرى بويىنشا بىرلەسكەن جۇمىستىڭ ماڭىزدىلىعىن اتاپ ءوتتى.
ء«بىز ەڭبەك جانە حالىقتى الەۋمەتتىك قورعاۋ مينيسترلىگىمەن بوسقىندار ماسەلەلەرى بويىنشا زاڭناما مەن تاجىريبەنى جەتىلدىرۋ جونىندەگى ىنتىماقتاستىقتى جوعارى باعالايمىز. بۇل كۇش-جىگەر بوسقىنداردىڭ قاۋىپسىزدىگىن قامتاماسىز ەتۋگە جانە ولاردى قازاقستاننىڭ ادام قۇقىقتارى سالاسىنداعى كۇن تارتىبىنە سايكەس قورعاۋعا كومەكتەسەدى دەپ سانايمىز. سونداي-اق ءبىزدىڭ بىرلەسكەن جۇمىسىمىز بوسقىندارعا ولاردى قابىلدايتىن قوعامنىڭ يگىلىگى ءۇشىن ءوز الەۋەتىن تولىق ىسكە اسىرۋعا مۇمكىندىك بەرەدى دەپ ۇمىتتەنەمىز», دەدى حانس فريدريح شوددەر.
ەكىجاقتى قارىم-قاتىناستاردى ودان ءارى نىعايتۋ جانە دامىتۋ ءۇشىن تامارا دۇيسەنوۆا مەن حانس فريدريح شوددەر بىرلەسكەن ءىس-شارالار جوسپارىنا قول قويدى. قۇجات بوسقىندار ماسەلەلەرى بويىنشا قۇزىرەتتى جەرگىلىكتى اتقارۋشى ورگانداردىڭ قىزمەتكەرلەرى ءۇشىن وقىتۋ ترەنينگتەرىن وتكىزۋدى, سونداي-اق بوسقىنداردىڭ قۇقىقتارىن قورعاۋ سالاسىنداعى زاڭنامانى جەتىلدىرۋ بويىنشا بىرلەسكەن ۇسىنىستار ازىرلەۋدى كوزدەيدى.
