قارجى مونيتورينگى اگەنتتىگىنىڭ جامبىل وبلىسى بويىنشا دەپارتامەنتى «كومەكوۆتەر» ۇيىمداسقان قىلمىستىق توبىنا قاتىستى قىلمىستىق ءىستى تەرگەدى.
انىقتالعانداي, ەرلى-زايىپتى كومەكوۆتەر ۇيىمداسقان قىلمىستىق توپتىڭ 7 بەلسەندى مۇشەسىن باسقارعان. ولاردىڭ ارقايسىسى قىلمىستىق سحەمادا بەلگىلى ءبىر قىزمەت اتقارعان. ولار جالعان كاسىپورىندار ارقىلى جۇمىستى ءىس جۇزىندە ورىنداماي شوت-فاكتۋرا جازىپ بەرىپ وتىرعان.
«قىلمىستىق توپتىڭ زاڭسىز ارەكەتتەرىنىڭ سالدارىنان مەملەكەت بيۋدجەتىنە 1 ملرد تەڭگەدەن استام سالىق تۇسكەن جوق», دەپ حابارلادى قما ءباسپاسوز قىزمەتى.
سوت ۇيىمداسقان قىلمىستىق توپ مۇشەلەرىن كىنالى دەپ تاۋىپ, 3 جىلدان 5 جىلعا دەيىن باس بوستاندىعىنان ايىردى. ال ەرلى-زايىپتى كومەكوۆتەردىڭ قىلمىستىق جولمەن تاپقان مۇلكى تاركىلەنىپ, 7 جانە 10 جىلعا سوتتالدى.
سونداي-اق ۇيىمداسقان قىلمىستىق توپتىڭ كەڭسەسى جانە 17 ملن تەڭگەدەن استام اقشا تاركىلەندى. بۇدان بولەك سوت مەملەكەتتىك كىرىستەر ورگاندارىنىڭ 10 ملرد تەڭگەدەن استام سوماعا كەلتىرىلگەن زالالدى وتەۋ تۋرالى ازاماتتىق تالاپ-ارىزىن دا قاناعاتتاندىردى.
ايانا توعانبەك
