ۇلتتىق بانكتىڭ حابارلاۋىنشا, ءتول ۆاليۋتامەن بەرىلگەن نەسيە كولەمى ساۋىردە 1,6 پايىزعا ءوسىپ, 17 637,6 ملرد تەڭگەنى قۇراعان. ونىڭ قۇرىلىمىنداعى زاڭدى تۇلعالار نەسيەسى – 1 پايىزعا, جەكە تۇلعالار نەسيەسى 2 پايىزعا ارتقان. شەتەلدىك ۆاليۋتامەن بەرىلگەن زايمدار 5,6 پايىزعا ازايىپ, 1 762,0 ملرد تەڭگە بولعان. ونىڭ قۇرىلىمىنداعى زاڭدى تۇلعالار نەسيەسى – 5,6 پايىزعا, جەكە تۇلعالار نەسيەسى 11,9 پايىزعا تومەندەپتى.
ء«بىر ايدا ۇزاق مەرزىمدى نەسيەلەر كولەمى 0,5 پايىزعا ۇلعايىپ, 16 ترلن تەڭگە بولدى. قىسقا مەرزىمدى كرەديتتەر 3 پايىزعا كوبەيدى – 3,3 ترلن تەڭگە. 2022 جىلدىڭ ساۋىرىندە شاعىن كاسىپكەرلىك سۋبەكتىلەرىن نەسيەلەۋ 10,9 پايىزعا, 4 ترلن تەڭگەگە دەيىن تومەندەگەن. بۇل – كورپوراتيۆتى سەكتورعا بەرىلگەن نەسيەنىڭ 50,4 پايىزى. بانكتىك ەمەس زاڭدى تۇلعالارعا تەڭگەمەن بەرىلگەن كرەديتتەر بويىنشا ورتاشا الىنعان سىياقى مولشەرلەمەسى 15,2 پايىزدى, جەكە تۇلعالارعا 17,3 پايىزدى قۇرادى», دەلىنگەن ۇلتتىق بانك حابارلاماسىندا.
وسىعان دەيىن سەنات توراعاسى ماۋلەن اشىمباەۆ بازالىق مولشەرلەمەنىڭ جوعارى بولۋى ەكونوميكانى نەسيەلەۋگە كەدەرگى كەلتىرەدى دەپ مالىمدەگەن ەدى.
«قازاقستاندا ەكونوميكانى نەسيەلەۋ دەڭگەيى ىشكى جالپى ءونىمنىڭ 25 پايىزىن قۇراپ وتىر. كوپتەگەن دامۋشى ەلدە بۇل كورسەتكىش 60-70 پايىز دەڭگەيىندە. سينگاپۋر, كورەيا سياقتى ەلدەردە ءتىپتى 150 پايىزعا جەتكەن. ءبىز سوڭعى جىلدارى ەكونوميكانى نەسيەلەۋگە قىسىم جاساپ جىبەردىك. بۇعان بازالىق مولشەرلەمەنىڭ 14 پايىز بولۋى دا اسەر ەتەدى. بۇل بۇگىندە ۇكىمەتتىڭ ينفلياتسيانى تەجەۋدىڭ نەگىزگى تەتىگى ەكەنىن تۇسىنەمىز. ءارى قاراي نە بولادى؟ ەگەر سىرتقى تاۋەكەلدەر ساقتالار بولسا ءبىز جوعارى مولشەرلەمەمەن ەكونوميكامىزدى دامىتا المايمىز», دەگەن ەدى م.اشىمباەۆ.
ۇلتتىق بانك توراعاسى عالىمجان ءپىرماتوۆتىڭ ايتۋىنشا, ەكونوميكانى نەسيەلەۋ تەك مولشەرلەمەگە بايلانىپ تۇرعان جوق.
– ءبىزدىڭ پوزيتسيا – نەسيەلەردى مەملەكەتتىك اقشا ەسەبىنەن سۋبسيديالاۋدى توقتاتۋ. جەكە سەكتوردى قولداپ, كوممەرتسيالىق ارناعا ءتۇسىرۋ قاجەت. ءتىپتى مولشەرلەمە تومەندەگەن كۇننىڭ وزىندە بانكتەر كوممەرتسيالىق جوبالاردى اقشا قۇنىنان تومەن نەسيەلەمەيدى. بىزگە قۇرىلىمدىق رەفورما كەرەك. ءبىزدىڭ ەكونوميكا يمپورتقا تاۋەلدى, سونىڭ ىشىندە ازىق-ت ۇلىك تۇرعىسىنان. قازىر سىرتقى جانە ماۋسىمدىق شوكقا تاپ بولىپ وتىرمىز. ۇلتتىق بانك سوڭعى بىرنەشە جىل بويى ەكونوميكانى قولداۋ باعدارلامالارىنا بەلسەندى قاتىستى, ەندى ودان جوسپارلى تۇردە كەتە باستايدى, – دەدى ع.ءپىرماتوۆ.
