اتىراۋ قالالىق اكىمدىگىنىڭ ءباسپاسوز قىزمەتىنەن ءمالىم ەتكەندەي, جازعى دەمالىستا ورتا مەكتەپ وقۋشىلارى ءۇشىن قوعامدىق كولىكتە جول ءجۇرۋدى تەگىن ەتۋ تۋرالى شەشىم قابىلدانعان.
«مەكتەپ وقۋشىلارى اۆتوبۋسقا مىنگەندە, وزىمەن بىرگە كولىك كارتاسىن الىپ ءجۇرۋى قاجەت. تاسىمالدانعان بەنەفيتسيار سانىن ناقتىلاۋ ءۇشىن كارتانى ۆاليداتورعا تيگىزۋ كەرەك. بۇل كەزدە كارتادان تولەم ءۇشىن اقشا الىنبايدى. وسىلايشا, اتىراۋداعى بالالار مەن جاسوسپىرىمدەر كولىكتى جاز بويى تەگىن پايدالانادى. ال, ستۋدەنتتەر قوعامدىق كولىكتە جەڭىلدەتىلگەن تاريفپەن جۇرەدى. ولار ءۇشىن جول ءجۇرۋ قۇنى - 40 تەڭگە», دەپ ءمالىم ەتتى «سمارت اتىراۋ» كمم ديرەكتورى ارسلان ارونوۆ.
ونىڭ ايتۋىنشا, مەكتەپ وقۋشىلارىنا ءساۋىر ايىنان بەرى جولاقى تولىعىمەن تەگىن بولعان.
وسى ايعا دەيىن كۇنىنە العاشقى ەكى ساپار ءۇشىن وقۋشىلاردىڭ كارتاسىنان تولەم جاسالماعان. وقۋشىلار بۇدان كەيىنگى ساپارعا جول ءجۇرۋ اقىسىن تولەگەن.
الايدا مۇنداي تالاپ اتىراۋ قالالىق ءماسليحاتىنىڭ شەشىمىنە قايشى كەلگەن. مۇنى اتىراۋ قالالىق پروكۋراتۋراسى انىقتادى. قازىر بۇل ولقىلىق جويىلعان.
