ونەر • 25 مامىر، 2022

ۇلى شايقاس

28 رەت كورسەتىلدى

ءبىر تاۋدىڭ ەتەگىندە كوشپەندى ەكى ەلدىڭ قاتار عۇمىر كەشۋى، قوينى قۇت ۇلان-عايىر دالانى تەل جايلاۋى مۇمكىن ەمەس، ول ءبىر اپاندا جولبارىس پەن ارىستاننىڭ قاتار تىنىستاۋى­ن كوزگە ەلەستەتەدى. سوندىقتان دا ايبارلى قوس حاندىقتىڭ ءبىر-بىرىنە دەگەن دۇشپاندىعى عاسىردان-عاسىرعا جالعاستى. جوڭعارلاردىڭ جاۋگەرشىلىك جورىقتارى تىم ۇزاققا سوزىلدى.

كارتيناعا قاراپ، سول الاساپىران ءداۋىردىڭ ب ۇلىڭعىر بەي­نەسى مەن رۋح سيپاتى ەلەستەيدى. مۇنى عاجايىپ سۋرەتشى اۋبا­كىر ىسمايىلوۆ ادەمى سۋرەتتەگەن. قىلقالام شەبەرىنىڭ شىعار­­ماشىلىق جولىنىڭ باس­تاۋى قازاقستانداعى بەينەلەۋ ونەرىنىڭ قالىپتاسۋ كەزە­ڭىمەن تۇسپا-تۇس كەلدى. ول ەلى­مىزدەگى كاسىبي كوركەمسۋرەت مەك­تەبىنىڭ نەگىزىن سالۋشىلار ءابىل­حان قاستەەۆ پەن اعايىندى قو­جىقوۆتار قاتارىندا ەڭبەك ەتكەن سۋرەتكەر. جان-جاقتى ونەر يەسىنىڭ بويىنا دارىعان ار­تىس­تىك، رەجيسسەرلىك، بيشىلىك قا­سيەتى دە، وزگە سالالاردا كوپ ەڭ­بەك اتقارعانىن ايعاقتايدى. بۇ­گىندە ونىڭ قاي سالادا بولماسىن، كەلەر ۇرپاققا قالدىرعان شىعارماشىلىق ەڭبەگى ەداۋىر.

قىلقالام شەبەرى ەسىمدەرى اڭىزعا اينالعان قازاق باتىرلا­رىنىڭ ەرلىكتەرىنە قايتا جان بى­تىرگەن جۇمىستارىنىڭ قاتا­رىندا قوبىلاندى باتىرعا ار­نالعان يلليۋستراتسيالارى بار. «جوڭ­عارلارمەن شايقاس. قازاق حال­قىنىڭ ەپوستىق جىرلارىنا يلليۋستراتسيالار» اتتى كۇر­دەلى كومپوزيتسياعا قۇرىل­عان اكۆا­رەلدىك تۋىندىسى وسى توپ­تامادان. پاراقتا جاسىل توبە باسىن­داعى قارۋلانعان ەكى باتىر­دىڭ قىزۋقاندى شايقاسى بەينە­لەنگەن. ءبىرىنشى بولىكتىڭ سول جا­عىندا جەبە تولى قورامساق، وڭ بولىكتە دۋلىعا. ارتقى پلاندا اتتى اسكەرلەردىڭ سۇلبالارى جانە اۋىل كورىنىسى. باسىن قار باس­ق­ان تاۋلار تولقىندى بۇلت­تى اسپان­مەن جالعاسىپ كەتەدى. كوم­پوزي­تسيانىڭ نەگىزگى نۇكتەسى – ەكى باتىر­­دىڭ جەكپە-جەك ۇستىندەگى كورى­­نىسى. ولاردىڭ قيمىل-قوزعا­لىسى نا­نىمدى ءارى اسا دالدىكپەن جازىلعان.

جالپى، XX عاسىردىڭ 30 جىلدارى ءا.ىسمايىلوۆ ءوز حال­قىمىزدىڭ ەپوستىق جىرلا­رى مەن تاريحىنا تۇڭعىش قا­لام تارتقانداردىڭ ءبىرى بولدى. اتالعان تۋىندىلارىندا قىل­قالام شەبەرى قاندى شاي­قاستى، جورىققا شىعۋ نەمەسە اڭ اۋلاۋ كورىنىستەرىن، قازاق حال­قىنىڭ تۇرمىسىن جانە باتىرلار ەرلىگىن شىنايى بەينەلەۋگە تىرىستى. سونىمەن قاتار ەپوس تاقىرىبىن، ونىڭ ۇلتتىق مىنەزىن وتكەن تاريحپەن بايلانىستىرا، شىندىق تۇرعىسىنان ءدال دە ناقتى اي­قىنداي ءبىلدى. بۇل كارتينا سونىڭ ءبىر بولىگى.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار