«وزدەرىڭىز بىلەتىندەي, كوگىلدىر وتىن ەلوردانىڭ ەكولوگياسىنا دا, قالا تۇرعىندارىنىڭ ومىرىنە دە وڭ اسەرىن تيگىزەدى. ۇيىنە گاز كىرگىزۋ ءۇشىن قۇجات جيناۋ ماسەلەسى بويىنشا بىزگە تۇرعىندار جۇگىنىپ جاتادى. وسىعان دەيىن گازعا قوسىلۋ ءۇشىن مىندەتتى تۇردە قۇجاتتىڭ 8 ءتۇرى تالاپ ەتىلىپ, ءىس بىرنەشە ايعا (6 ايدان اسا) سوزىلىپ كەتەتىن. ەندى وسىعان بايلانىستى قۇجاتتار ءتىزىمىن قىسقارتۋدى جوسپارلاپ وتىرمىز. بۇل شارا مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعى اياسىندا قابىلدانادى», دەدى قالا باسشىسى.
سونىمەن قاتار ول بۇعان دەيىن ەنەرگەتيكا, ۇلتتىق ەكونوميكا مينيسترلىكتەرىنىڭ, «QazaqGaz» ۇك» اق جانە ت.ب. قاتىسۋىمەن ۇكىمەتتە ارنايى كەڭەس ءوتىپ, گازعا قوسىلۋ بويىنشا قۇجاتتار ءتىزىمىن قىسقارتۋ ماسەلەسى قارالعانىن اتاپ ءوتتى.
«وزدەرىڭىز بىلەتىندەي, قالامىزدا سارىارقا جانە الماتى اۋداندارىن تولىقتاي گازداندىردىق. بۇل ءۇشىن 680 شاقىرىمنان استام گاز تاراتۋ جەلىسى سالىندى, كۆارتال ىشىنە جەلىلەر تارتىلدى. 14 مىڭ ابونەنت گازعا قوسىلدى, 6 مىڭنان استام ابونەنت تەحنيكالىق شارتتار الدى, سول سياقتى 3,5 مىڭنان استام (25%-دان استام) ءۇي گازعا قوسىلدى. وسىعان قاتىستى بىرقاتار جەڭىلدىكتەر قابىلدادىق: مۇقتاج ساناتتاعى تۇرعىنداردىڭ گازعا قوسىلۋى ءۇشىن الەۋمەتتىك كومەك بولىنەدى. ال الەۋمەتتىك كومەك مولشەرى 413 مىڭ تەڭگەگە دەيىن ۇلعايدى, قالا تۇرعىندارىنىڭ بارىنە تەگىن تۇردە ەسەپتەگىشتەر بەرىلەدى, سونداي-اق پايىزسىز كرەديت بەرۋ باعدارلاماسى دا بار. جازدا بايقوڭىر جانە ەسىل اۋداندارىندا گاز قۇبىرىن تارتۋ جۇمىسىن باستايمىز. ماسەلەن, يلينكا (ۇركەر), ءوندىرىس, پريگورودنىي, تەلمان ەلدى مەكەندەرى, Family Village, Garden Village شاعىن اۋداندارى جانە ت.ب. سول سياقتى شۇبار شاعىن اۋدانىندا جوبالاۋ جۇمىسى ءجۇرىپ جاتىر», دەدى ا.كولگىنوۆ.
ەسىل جانە بايقوڭىر اۋداندارىندا الدىمەن جەتكىزۋشى گاز قۇبىرىن, ال كەلەسى جىلى كۆارتال ىشىنە جەلىلەر سالىناتىنىن ايتتى.
«سونىمەن قاتار جەو-1 جانە جەو-2-دە باس-اياعى 13 سۋ جىلىتۋ قازاندىعى گازعا اۋىستىرىلدى. ال جەو-3 قۇرىلىسى قايتا جانداندى, قۇرىلىسى ءجۇرىپ جاتقان جاڭا اۋدانداردى جىلۋمەن قامتاماسىز ەتۋ ءۇشىن 3 گاز قازاندىعىن جوبالاۋ جۇمىسى ءجۇرىپ جاتىر. قولعا الىنعان شارۋالاردىڭ ءبارى قالانىڭ ەكولوگياسىن جاقسارتا تۇسەدى. گازداندىرۋ جۇمىسى – مەملەكەت باسشىسىنىڭ تىكەلەي باقىلاۋىندا», دەدى ەلوردا اكىمى.
