«سوڭعى قوڭىراۋ – مۇعالىمدەر مەن وقۋشىلار وقۋ جىلىنىڭ قورىتىندىسىن شىعارىپ, ءبىلىم الۋشىلاردىڭ جەتىستىگىن اتاپ وتەتىن كوڭىلدى ءارى ماڭىزدى وقيعا. بيىل ەپيدەميولوگيالىق جاعداي مەكتەپپەن قوشتاسۋ مەرەكەسىن وتكىزۋگە مۇمكىندىك بەرىپ وتىر. الايدا ول مىندەتتى تۇردە مەكتەپ قابىرعاسىندا ۇيىمداستىرىلۋى كەرەك. ءبىلىم بەرۋ ۇيىمدارى بارلىق قاجەتتى ۇسىنىس پەن نۇسقاۋدى الدى. 2022 جىلى ەلىمىزدە 3,5 ملن-نان استام وقۋشى ءۇشىن سوڭعى قوڭىراۋ سوعىلادى.
بيىل «التىن بەلگى» توسبەلگىسىنە 8 139 تۇلەك ۇمىتكەر.
رەسپۋبليكانىڭ بارلىق جالپى ءبىلىم بەرەتىن مەكتەبىندە سوڭعى قوڭىراۋ مەرەكەسىن ءبىر مەزگىلدە وتكىزۋ جوسپارلانىپ وتىر. وعان مەكتەپتىڭ پەداگوگيكالىق ۇجىمى, تۇلەكتەر جانە ولاردىڭ اتا-انالارى, پەداگوگيكالىق ەڭبەك ارداگەرلەرى, قامقورشىلىق كەڭەس مۇشەلەرى, دەمەۋشى ۇيىمداردىڭ, ءبىلىم جانە عىلىم مينيسترلىگى مەن وبلىستاردىڭ, نۇر-سۇلتان, الماتى, شىمكەنت قالالارى ءبىلىم باسقارماسىنىڭ وكىلدەرى, ءبىلىم بولىمدەرى, مۇددەلى مەملەكەتتىك ورگاندار جانە باسقالار قاتىسا الادى.
مەكتەپ ءبىتىرۋ كەشىن ءبىلىم مەكەمەسى ءوزى ۇيىمداستىرىپ, وتكىزۋى كەرەك. مىناعان تىيىم سالىنادى:
– انيماتورلاردى, مەرەكە اگەنتتىگىن, ارتىستەردى, مەرەكەلىك شارا وتكىزۋ ءۇشىن اقىلى جەكە ستۋديالاردى تارتۋعا;
- مەرەكەلىك داستارحان جايۋعا;
– جالعا بەرىلەتىن اۆتوكولىكتەردى تارتا وتىرىپ, قالا (اۋدان) بويىنشا ەكسكۋرسيا جاساعا;
– مەكتەپ اكىمشىلىگى مەن مۇعالىمدەرگە سىيلىق الۋ ءۇشىن قاراجات جيناۋعا;
- ويىن-ساۋىق مەكەمەلەرىندە ءبىتىرۋ كەشىن ۇيىمداستىرۋعا رۇقسات جوق.
قازاقستاننىڭ بارلىق مەكتەبىندە سوڭعى قوڭىراۋ مەرەكەسى 25 مامىردا وتەدى. ال اتتەستاتتى سالتاناتتى تاپسىرۋ ءراسىمى 16-17 ماۋسىمدا وتەدى.
