تۇركىستان وبلىسىنىڭ پوليتسيا دەپارتامەنتى حابارلاعانداي, سايرام اۋداندىق پوليتسيا ءبولىمىنىڭ تەرگەۋشىسى جارقىنباي دارحان جابىرلەنۋشىلەرگە ءىرى كولەمدە شىعىن كەلتىرىپ, الاياقتىق جاساعان كۇدىكتى جاس جىگىتتىڭ كىناسىن دالەلدەپ, ءىستى سوتقا وتكىزگەن. «بىلتىر ناۋرىزدا سايرام اپب-عا جەرگىلىكتى تۇرعىن ارىزدانعان. جابىرلەنۋشى ايەلدىڭ ايتۋىنشا, ول 2020 جىلى 21 قازاندا اقسۋكەنت-قارامۇرت باعىتىندا تاكسيگە وتىرعان. وسى كەزدە جۇرگىزۋشى ونىڭ وزبەكستان رەسپۋبليكاسىنداعى بالالار ۇيىندە تاربيەلەنىپ جۇرگەن نەمەرەسىن زاڭدى تۇردە ەلگە الىپ كەلە الاتىنىن ايتىپ سەندىرگەن. وسىلايشا تاكسي جۇرگىزۋشىسىنە سەنگەن ايەل قايتىس بولعان قىزىنىڭ 2007 جىلعى ۇلىن وزىنە الۋ ءۇشىن 600 مىڭ تەڭگەدەن استام اقشا بەرگەن. الايدا ارادا بىرنەشە اي وتسە دە, سايرامدىق تۇرعىن نەمەرەسىمەن قاۋىشپاعان. الاياققا الدانعانىن بىلگەن ايەل بىردەن پوليتسەيلەرگە ارىزدانعان. اتالعان جايت قك-ءتىڭ 190-بابى (الاياقتىق) بويىنشا تىركەلدى», دەپ جازدى ۆەدومستۆودان.
ارادا 1 اپتاعا جۋىق ۋاقىت وتكەندە پوليتسياعا تاعى ءبىر ارىزدانىپ, الاياققا الدانعانىن جەتكىزگەن. بۇل جولى جابىرلەنۋشىگە ەر ادام جول-كولىك اپاتىنان قايتىس بولعان قىزى مەن كۇيەۋ بالاسىنىڭ ارتىندا قالعان ەكى نەمەرەسىن ءوز تەگىنە وتكىزىپ بەرەمىن دەپ ۋادە بەرگەن. وعان جاڭا تانىسقان الاياق نۇر-سۇلتان قالاسىندا ءىسىن ءبىتىرىپ بەرە الاتىن ادامدارى بار ەكەنىن ايتىپ, سەندىرگەن. وسى قىزمەتى ءۇشىن جابىرلەنۋشىدەن ءتورت ملن تەڭگە العان.
«اسا ءىرى مولشەردەگى الاياقتىق قىلمىسىن اشۋدا جەدەل-تەرگەۋ توبى قاجەتتى ءىس-شارالاردى جۇزەگە اسىرىپ, الاياقتىق جاساعان ەر ادامنىڭ جەكە باسىن انىقتادى. تەكسەرۋ كەزىندە كۇدىكتى تولەبي اۋداندىق سوتىمەن بەس جىل مەرزىمگە باس بوستاندىعىنان ايىرىلىپ, جازاسىن وتەپ جاتقان 33 جاستاعى ەر ادام ەكەنى بەلگىلى بولدى. ياعني, كۇدىكتى سوتتالماس بۇرىن جوعارىداعى اتالعان قىلمىستاردى جاساپ, اقشانى ءوز قاجەتتىلىگىنە جۇمساپ جىبەرگەن», دەلىنگەن حابارلامادا.
كۇدىكتىگە قاتىستى ءىس قۇجاتتار ايىپتاۋ اكتىسىمەن سوتقا جولداندى. ال سايرام اۋدانىنىڭ سوتى 33 جاستاعى جاس جىگىتتى قك-ءتىڭ 190-بابىمەن (الاياقتىق) كىنالى دەپ تانىپ, ءتورت جىلعا باس بوستاندىعىنان ايىرۋ جازاسىن تاعايىندادى. سونداي-اق قك-ءتىڭ 58-بابى 6-بولىگىن (قىلمىستىق قۇقىق بۇزۋشىلىقتار جيىنتىعى بويىنشا جازا تاعايىنداۋ) قولدانىپ, الدىڭعى 2021 جىلعى 22 قاڭتارداعى ۇكىممەن تاعايىندالعان جازانى وسى ۇكىممەن تاعايىندالعان جازاعا ءىشىنارا قوسىپ, تۇپكىلىكتى 7 جىل مەرزىمگە باس بوستاندىعىنان ايىرۋ جازاسى قولدانىلدى.
ايانا توعانبەك
