بۇقتىرما كوشەسى مەن قۇلجا كۇرە جولى قيىلىسىنداعى جولايرىقتىڭ قۇرىلىسى بەلگىلەنگەن كەستەگە سايكەس جۇرگىزىلىپ جاتىر.
«قالا جانە وبلىس اۋماعىندا ورنالاسقان قاجەتتى جەر تەلىمدەرىن ساتىپ الۋ تولىعىمەن اياقتالدى. ءبىرىنشى جارتى جىلدىقتىڭ سوڭىنا دەيىن ەستاكادا مەن بۇرىلىس جولدارىن سالۋ بويىنشا قۇرىلىس جۇمىستارىن اياقتاپ, كولىكتىڭ بارلىق باعىتتاعى قوزعالىسىن قامتاماسىز ەتۋ جوسپارلانىپ وتىر», دەيدى عاني مىرزاحانوۆ.
سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جولايرىق قۇرىلىسى كەلەسى جىلعا دەيىن سوزىلۋى مۇمكىن. دەگەنمەن كولىك قوزعالىسى بيىل جىل سوڭىندا اشىلادى دەگەن جوسپار بار.
«بۇگىنگى كۇنگە ءالى دە 7 جەر تەلىمى ساتىپ الىنعان جوق. بۇل جەر تەلىمدەرى بويىنشا سوت رەسىمدەرى جۇرگىزىلىپ جاتىر. قۇرىلىس جۇمىستارى وسى جەر تەلىمدەرىن ساتىپ الۋعا قاراي ورىندالادى. كولىك قوزعالىسىن اشۋ وسى جىلدىڭ اياعىنا, ال تولىعىمەن اياقتالۋى 2023 جىلعا جوسپارلانعان», دەدى ول.
ال, ساين مەن موڭكە بي كوشەلەرىنىڭ قيىلىسىنداعى جولايرىق قۇرىلىسى جوباسىنا تۇزەتۋلەر ەنگىزىلمەك. جۇمىستاردى تولىق اياقتاۋ 2023 جىلعا كوزدەلىپ وتىر.
