بەس جاس جىگىت وزدەرىنىڭ قىلمىستىق كيبەروپەراتسيالارىن سەنگىش تۇرعىندارعا قوڭىراۋ شالۋ ارقىلى جۇرگىزىپ وتىرعان. سونىمەن قاتار قىلمىستىق توپتىڭ ءار مۇشەسىنىڭ وزىندىك «مىندەتتەرى» بولعان. ءبىرى – الاياقتىقتىڭ ۇيىمداستىرۋشىسى, باسقالارى بانك نەمەسە كەز كەلگەن قارجى ۇيىمى وپەراتورلارىنىڭ ءرولىن اتقارعان, ال ءۇشىنشى مۇشەسى بانكوماتتاردان تۇسكەن اقشانى شەشىپ وتىرعان.
قازىرگى ۋاقىتتا پوليتسەيلەر اتالعان توپتىڭ ينتەرنەت-الاياقتىقتىڭ 20-دان استام جايتىنا قاتىسى بارىن انىقتادى. بۇكىل ەل بويىنشا الدانعان ازاماتتار بار. ولاردىڭ تاراپىنان كەلتىرىلگەن شىعىن كولەمى انىقتالۋدا. جابىرلەنۋشىلەردىڭ ايتۋىنشا, الاياقتار وزدەرىن بانكتىڭ قاۋىپسىزدىك قىزمەتىنىڭ قىزمەتكەرى رەتىندە سەنىمدى تۇردە تانىستىرىپ وتىرعان.
ماسەلەن, جەرگىلىكتى تۇرعىنعا «بانك قىزمەتكەرى» قوڭىراۋ شالىپ, ازاماتتىڭ اتىنان نەسيە راىسمدەگەلى جاتقانىن حابارلاعان. سودان بۇل ارەكەتتى بولدىرماۋ ءۇشىن قوڭىراۋ شالۋشى تۇرعىننان قاجەتتى اقپاراتتار: بانك كارتاسىنىڭ مالىمەتتەرىن, SMS-كودىن جانە تاعى باسقا دەرەكتەردى ءبىلىپ العان. كەيىن قالا تۇرعىنى ونىڭ اتىنان ەكى ملن تەڭگەگە نەسيە راسىمدەلگەنىن بىلگەن.
ال كەيبىر جابىرلەنۋشىلەرگە قاسكۇنەمدەر كارتوچكاسىنان بىرەۋلەر ۇلكەن سومادا اقشا اۋدارماقشى ەكەندىگىن ايتىپ, ءوز قاراجاتىن ساقتاپ قالۋ ءۇشىن اتالعان شوت نومىرىنە بار اقشانى اۋدارۋ كەرەكتىگىن جەتكىزگەن. بانكتىڭ جالعان قىزمەتكەرلەرىنىڭ نۇسقاۋلارىن ءال-فارابي اۋدانىنىڭ تۇرعىنى دا ورىنداعان, ول شامامەن ءتورت ملن تەڭگە كولەمىندە قارجىسىنان ايىرىلعان.
جەدەل ءىس-شارالار ناتيجەسىندە, ءتارتىپ ساقشىلارى بانكوماتتاردان قولما-قول اقشانى الۋ مىندەتى جۇكتەلگەن كۇدىكتىلەردىڭ ءبىرىنىڭ ىزىنە تۇسكەن. ول ارقىلى جەدەل ۋاكىلدەر تاعى ەكەۋىن ۇستاعان. قالعان ەكەۋى رەسەي فەدەراتسياسى اۋماعىندا ۇستالىپ, قازاقستانعا ەكستراديتسيالاۋ جۇمىستارى جۇرگىزىلۋدە. تەكسەرۋ بارىسىندا كۇدىكتىلەردەن 46 بانك كارتوچكاسى, التى ۇيالى تەلەفون جانە 20 SIM-كارتا انىقتالىپ, تاركىلەنگەن. پوليتسيا قىزمەتكەرلەرى بۇل قىلمىستىق توپتىڭ ۇيىمداسقان سيپاتقا يە بولۋ ىقتيمالدىعىن جوققا شىعارمايدى.
ايانا توعانبەك
