ماسەلەن, مەملەكەتتىك قىزمەتشىلەر مەن بيۋدجەتتىك مەكەمە قىزمەتكەرلەرى الاتىن پاتەردى وزگە ساناتتاعى جاستاردىڭ الۋى قيىن ەدى. جۋىردا جامبىل وبلىسىندا ءوڭىر جاستارى ءۇشىن بىرەگەي باعدارلاما ىسكە قوسىلدى. «اۋليەاتا جاستارى» وڭىرلىك باعدارلاماسى قولعا الىنىپ, جۇزدەگەن جاستىڭ باسپانا ماسەلەسىن شەشۋ جوسپارلانۋدا. اتالعان باعدارلاما اياسىندا ەندى ايماقتاعى جاستارعا جەڭىلدەتىلگەن باسپانا نەسيەسى بەرىلە باستايدى. وسى ورايدا, باسقا يپوتەكالىق باعدارلامالاردا قامتىلعان ساناتتارعا جاتپايتىن, بىراق تولەم قابىلەتى بار جاستارعا باسىمدىق بەرىلىپ وتىرعانىن ايتا كەتكەن ءجون. قازىرگى تاڭدا ءتۇسىندىرۋ جۇمىستارى باستالىپ تا كەتتى.
قازىرگى كەزدە قالادا تۇراقتاپ قالعان جاس كوپ. بىراق ءبارىنىڭ بىردەي باسپانا الۋعا شاماسى جەتە بەرمەيدى. جامبىلدىق جاستاردىڭ پاتەر اۋىرتپالىعىن تارتىپ جۇرگەندەرى دە از ەمەس. وسى ورايدا, وڭىرگە جاستاردى مەيلىنشە قولدايتىن, ولاردىڭ باسپانالى بولۋىنا جاعداي جاسايتىن ءبىر مۇمكىندىك كەرەك-اق ەدى. سول ولقىلىقتىڭ ورنى ەندى تولىپ وتىر. وبلىستىق جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجانىڭ ايتۋىنشا, «اۋليەاتا جاستارى» وبلىستا مەملەكەتتىك جاستار ساياساتىن دامىتۋدىڭ 2021-2025 جىلدارعا ارنالعان باعدارلاماسى. كەشەندى جوسپاردى ىسكە اسىرۋعا 5 جىلعا 1,3 ميلليارد تەڭگە قاراستىرىلعان. جوبا وبلىس اكىمدىگى تاراپىنان دا قولداۋ تاپقان. بىراق بۇل ماقساتقا ءتيىستى قاراجات قاراستىرىلعانمەن, ايماقتاعى كەيبىر اتقامىنەرلەر اتالعان ماسەلەدە سالعىرتتىق تانىتىپ وتىر ەكەن. «وتكەن جىلى باعدارلامانىڭ ءتيىمدى ىسكە اسىرىلۋىن باقىلاۋ ماقساتىندا زەردەلەۋ جۇمىستارى جۇرگىزىلدى. مۇنداعى 94 تارماقتىڭ 80-ءى ورىندالسا, قالعانى ۇزاق مەرزىمگە جوسپارلانعان. زەردەلەۋ ناتيجەسىندە تاراز قالاسى مەن اۋدانداردا بىرنەشە كەمشىلىك انىقتالدى. اتالعان اكىمدىكتەردەگى سالالىق بولىمدەر بۇل تاپسىرمانىڭ مەرزىمىندە ورىندالۋىنا باسا نازار اۋدارماعان جانە تانىسپاعان», دەيدى سەرىكبول بەرىكقوجا. سونداي-اق باسقارما باسشىسى سارىسۋ, جامبىل, جۋالى, ت.رىسقۇلوۆ جانە مويىنقۇم اۋداندارىنىڭ اكىمدەرى باعدارلامانىڭ اۋدان كولەمىندە ىسكە اسىرىلۋىن باقىلاۋعا الۋ قاجەت ەكەنىن ايتتى. بۇل رەتتە اۋدان جاستارىنىڭ دا باسپانالى بولۋىنا مۇمكىندىك مول.
«اۋليەاتا جاستارى» باعدارلاماسى بۇگىنگى تاڭدا مەملەكەت قولداۋىنىڭ ناتيجەسىندە جامبىل وڭىرىندە جۇزەگە اسىپ وتىرعان جاڭا جوبا. باعدارلاما شەڭبەرىندە جەرگىلىكتى جاستارعا جەڭىلدىكپەن نەسيە بەرۋ قاراستىرىلۋدا. بۇل جوبا بيىلعى جىلدىڭ شىلدە ايىندا ىسكە اسا باستايدى دەپ جوسپارلانۋدا. جوبا ءوڭىر جاستارىن قولجەتىمدى تۇرعىن ۇيمەن قامتاماسىز ەتۋگە جانە جاس وتباسىلاردى قولداۋ ماقساتىندا دايىندالعان. «باعدارلامانى ازىرلەۋدە وبلىستىڭ ەرەكشەلىكتەرىن ەسكەرە وتىرىپ جانە نۇر-سۇلتان مەن الماتى قالالارىندا وڭ ناتيجە بەرگەن پيلوتتىق باعدارلامالار نەگىزگە الىندى. بۇعان دەيىن وبلىستا جاستار مەن جاس وتباسىلاردى تۇرعىن ۇيمەن قامتاماسىز ەتۋگە باعىتتالعان ارنايى باعدارلاما بولماعان», دەيدى سەرىكبول بەرىكقوجا. مۇندا ءتۇرلى جەڭىلدىكتەر دە قاراستىرىلعان. اتالعان جوبا اياسىندا پاتەر الۋعا نيەتتەنگەن ءاربىر جاس 19 جىل مەرزىمگە 13 ميلليون تەڭگەگە دەيىن الا الادى. ءاربىر پاتەر الۋعا نيەتتى جاس بەس پايىزدىق جەڭىلدىكپەن باسپانا الۋىنا بولادى.
باسپانا الۋ جاستار ءۇشىن باستى ماسەلە. بۇگىندە وبلىس بويىنشا تۇرعىن ءۇي الۋعا 7 140 جاس, ال جەر تەلىمىن الۋعا 10 787 جاس كەزەكتە تۇر ەكەن. وتكەن جىلى 318 جاس قانا يپوتەكالىق نەسيە راسىمدەگەن. ال بۇگىنگى «اۋليەاتا جاستارى» جوباسى جامبىلدىق جاستارعا قولداۋ كورسەتۋدە. كەرىسىنشە, بۇل جوباعا كەزەكتە تۇرعان مەملەكەتتىك جانە بيۋدجەتتىك قىزمەتكەرلەر قاتىسا المايدى. جامبىلدىق جاستارعا ءۇمىت سىيلاپ وتىرعان بۇل جارقىن جوبا مەملەكەتتىڭ تاعى ءبىر ماڭىزدى مۇمكىندىگى ەكەنى انىق.
جامبىل وبلىسى
