جۋىقتا حالىق قالاۋلىلارى وبلىس ورتالىعىنداعى كارديولوگيالىق ورتالىقتىڭ عيماراتىندا دەنساۋلىق ساقتاۋ ۇيىمدارى قىزمەتكەرلەرىمەن كەزدەسىپ, ماڭىزدى شارا جايلى اڭگىمە ءوربىتتى.
– بۇل رەفەرەندۋم ءار قازاقستاندىققا ءوزىنىڭ پىكىرىن بىلدىرۋگە مۇمكىندىك بەرەدى. كونستيتۋتسياعا ەنەتىن وزگەرىستەر بەس باعىتقا بولىنەتىن بولادى. بەس باعىت ءبىر اداممەن نەمەسە دەپۋتاتتارمەن ەمەس, حالىقتىڭ قالاۋىمەن بەكىتىلەدى. ەل تۇرعىندارى مەملەكەتتى باسقارۋ ىسىنە ارالاسىپ, كوكەيدە جۇرگەن تۇيتكىلدەردى ورتاعا سالادى. «حالىق ۇنىنە قۇلاق اساتىن مەملەكەت» تۇجىرىمداماسىنىڭ كوزدەگەنى دە سول. وسىلايشا, كونستيتۋتسيانىڭ ۇشتەن ءبىر بولىگىنە وزگەرىستەر ەنگىزىلەتىن بولادى, – دەدى ۆەرا كيم.
ءوز كەزەگىندە كارديولوگيالىق ورتالىقتىڭ دارىگەرى دۋمان يزگۋتدينوۆ اتا زاڭعا وزگەرىستەر ەنگىزۋ ارقىلى وڭ ناتيجەلەردىڭ ورىن الاتىنىنا سەنىم ءبىلدىردى. «رەفەرەندۋم وتكىزۋ ارقىلى جاڭا قازاقستاننىڭ ىرگەتاسىن مىقتاپ قالاۋعا مۇمكىندىك زور. كوپتەگەن وڭ وزگەرىس ورىن الاتىنىنا سەنىم مول. رەفەرەندۋمدى العاش رەت باستان وتكىزبەكپىن. وتباسىمەن بىرگە ماڭىزدى شاراعا قاتىسۋعا نيەت تانىتىپ وتىرمىز», دەدى ول.
بۇدان كەيىن ءماجىلىس دەپۋتاتتارى ۋسپەن اۋدانىنىڭ شالعاي اۋىلدارىنا اتباسىن بۇردى. رەسپۋبليكالىق شتابتىڭ مۇشەسى ايگۇل نۇركينا رەفەرەندۋمنىڭ ماڭىزدىلىعىنا توقتالىپ, پارلامەنتتىڭ ءرولى مەن مارتەبەسىنىڭ وزگەرۋى جونىندە ءتۇسىندىردى.
– ءماجىلىس ارالاس سايلاۋ جۇيەسى بويىنشا پارتيالىق تىزىمدەر نەگىزىندە جانە ءبىر مانداتتى اۋماقتىق وكرۋگتەر بويىنشا قۇرىلاتىن بولادى. بۇدان بولەك, ءماجىلىس زاڭداردى ءوز بەتىنشە قابىلداۋعا قۇقىلى. جالپى, پارلامەنتتىڭ ءرولى نىعايىپ, سول ارقىلى مەملەكەتتىڭ ينستيتۋتسيونالدىق تۇراقتىلىعى ارتادى, – دەدى ايگۇل نۇركينا.
اۋىل تۇرعىندارى كونستيتۋتسيادا بولاتىن وزگەرىستەرگە قىزۋشىلىقتارىن ءبىلدىرىپ, وزدەرىنىڭ ساۋالدارىن قويدى.
پاۆلودار وبلىسى
