وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي, يساتاي اۋدانىندا 11 ادام جوعالىپ كەتكەن.
«بۇگىن, 9 مامىردا ساعات 10:50-دە يساتاي اۋدانىندا ءبىر كۇن بۇرىن حابار-وشارسىز كەتكەن 11 ادامدى ىزدەستىرۋ قايتا جالعاستى. «ۋاز» ماركالى اۆتوكولىگىنىڭ جۇرگىزۋشىسى مەن 10 جولاۋشى 8 مامىر كۇنى ساعات 14:00-دە «اقمانداي» ۋچاسكەسىنە بارۋ ءۇشىن جولعا شىققان. بۇل ۋچاسكە اۋدان ورتالىعى – اققىستاۋ اۋىلىنان 160 شاقىرىم قاشىقتا ورنالاسقان. الايدا, جولعا شىققان ادامدار وسى ۋاقىتقا دەيىن اققىستاۋ اۋىلىنا ورالماعانى انىقتالدى», دەپ حابارلادى دەپارتامەنتتىڭ قوعاممەن بايلانىس توبى.
جوعالعان ادامداردى ىزدەستىرۋ جۇمىستارىنا اتىراۋ وبلىستىق توتەنشە جاعدايلار دەپارتامەنتىنىڭ 4 قىزمەتكەرى مەن جول تالعامايتىن «ترەكول» تەحنيكاسى تارتىلدى. ىزدەستىرۋ ءىس-شاراسىنا يساتاي اۋداندىق پوليتسيا ءبولىمىنىڭ 1 قىزمەتكەرى شىقتى.
سونداي-اق, 8 مامىردا ساعات 21:00-دە كاسپي تەڭىزىنە تاياۋ جەردەگى باتپاققا باتىپ قالعان كولىكتەن 2 ادام قۇتقارىلعان.
«اتىراۋ قالاسىنا تاياۋ ورنالاسقان ەركىنقالا اۋىلدىق وكرۋگىنەن 15 شاقىرىمداي قاشىقتىقتا «Land Cruizer» ماركالى اۆتوكولىگىنىڭ باتپاققا باتىپ قالعانى تۋرالى حابار ءتۇستى. كولىكتە 2 ادام بولعان. باتپاققا باتقان كولىككە جەدەل-قۇتقارۋ جاساعىنىڭ 2 قىزمەتكەرى ارنايى تەحنيكامەن جەدەل جەتتى. قۇتقارىلعان ەكى ادام ەركىنقالا اۋىلدىق وكرۋگىنە دەيىن جەتكىزىلدى. ولار جەدەل مەديتسينالىق كومەككە جۇگىنگەن جوق», دەپ ءمالىم ەتتى قوعاممەن بايلانىس توبىنان.
ايانا توعانبەك
