بيىل مەكتەپتى 155 مىڭنان استام تۇلەك بىتىرەدى, 9-سىنىپتا 267 مىڭنان استام وقۋشى وقيدى. 9-سىنىپقا ارنالعان قورىتىندى ەمتيحاندار 28 مامىر مەن 6 ماۋسىم ارالىعىندا وتەدى. ولار ءتورت ءپان بويىنشا سىناقتان وتەدى.
11-سىنىپ وقۋشىلارى ءۇشىن ەمتيحاندار 27 مامىردا باستالىپ, 10 ماۋسىمعا دەيىن جالعاسادى. 11-سىنىپ تۇلەكتەرى بەس ەمتيحان تاپسىرۋى كەرەك. بيىل قازاقستان تاريحى بويىنشا ەمتيحان اۋىزشا وتەدى. ءار بيلەتتە ءۇش سۇراق بەرىلەدى. ەڭ جوعارى ۇپاي – 30.
سپيكەردىڭ ايتۋىنشا, سوڭعى قوڭىراۋ بيىل 25 مامىردا, اتتەستاتتى سالتاناتتى تاپسىرۋ – 16-17 ماۋسىمدا وتەدى. ءراسىم مەكتەپ قابىرعاسىندا وتەدى.
گۇلميرا كارىموۆا مەكتەپ ءبىتىرۋ سالتاناتىنا انيماتورلاردى, مەرەكەلىك اگەنتتىكتەردى تارتۋعا جول بەرىلمەيتىنىن ايتتى. سونداي-اق مەرەكەلىك ۇستەل ۇيىمداستىرۋعا, جالعا بەرىلەتىن اۆتوموبيلمەن ەكسكۋرسيا جاساۋعا تىيىم سالىنعانىن اتاپ ءوتتى. اكىمشىلىك پەن مۇعالىمدەرگە سىيلىق ءۇشىن اقشا جيناۋعا, مەيرامحانا مەن ءدامحانالاردا كەش ۇيىمداستىرۋعا دا تىيىم سالىنادى.
ايانا توعانبەك
