«قر اۋە كەڭىستىگىن پايدالانۋ جانە اۆياتسيا قىزمەتى تۋرالى» 2020 جىلعى 15 شىلدەدەگى №339-IV زاڭعا سايكەس ۇشاق اپاتىن ازاماتتىق اۆياتسيا سالاسىنداعى ۋاكىلەتتى ورگان قۇرعان كوميسسيا تەكسەردى.
حالىقارالىق زاڭناماعا جانە قازاقستان رەسپۋبليكاسىنىڭ زاڭناماسىنا سايكەس كوميسسيا جۇمىسىنا نيدەرلاند كورولدىگىنىڭ قاۋىپسىزدىك جونىندەگى بيۋروسىنىڭ وكىلدەرى (اۆياتسيالىق وقيعالاردى تەكسەرۋ جونىندەگى مەملەكەتتىك ورگان) جانە ولاردىڭ كەڭەسشىلەرى – نيدەرلاندتىق Fokker Services B. V. كومپانياسىنىڭ ماماندارى (Fokker ۇلگىسىندەگى اۋە كەمەسى سەرتيفيكاتىنىڭ يەسى), سونداي-اق مەملەكەتارالىق اۆياتسيا كوميتەتىنىڭ تەكسەرۋشىلەرى قاتىستى.
حالىقارالىق ازاماتتىق اۆياتسيا ۇيىمى كەڭەسىنىڭ (ICAO) چيكاگو كونۆەنتسياسىنىڭ 13-قوسىمشاسىنا جانە قازاقستان رەسپۋبليكاسىنىڭ زاڭناماسىنا سايكەس تەكسەرۋ ناتيجەلەرى بويىنشا قورىتىندى ەسەپ نيدەرلاند كورولدىگىنىڭ قاۋىپسىزدىك جونىندەگى بيۋروسىمەن, مەملەكەتارالىق اۆياتسيا كوميتەتىمەن كەلىسىلدى.
وسىلايشا, «بەك ەير» اق اۋە كەمەسىمەن بولعان اۆياتسيالىق وقيعا ۇشاق اۋەگە كوتەرىلگەن كەزدە قاناتىنىڭ كۇش تۇسەتىن قاسيەتتەرىنىڭ سيممەترياسىن جوعالتۋى ناتيجەسىندە ورىن العانى انىقتالدى. سونىڭ كەسىرىنەن ۇشاق ۇشۋ-قونۋ جولاعىنان كوتەرىلگەننەن كەيىن فيۋزەلياجعا قۇلاپ, قار باسقان توپىراقتىڭ بەتىمەن وڭعا قاراي اۋىپ كەتكەن, ودان كەيىن اۋەجايدىڭ پەريمەتر بويىنشا قورشاۋىن بۇزىپ, اتالعان قورشاۋدان 9-10 مەتر قاشىقتىقتا ورنالاسقان ەكى قاباتتى جەكە مەنشىكتەگى قۇرىلىس نىسانىنا سوعىلعان.
كوميسسيا قورىتىندىسىنا سايكەس, ۇشاق قاناتىنىڭ كۇش تۇسەتىن قاسيەتتەرىن جوعالتۋىنىڭ سەبەبى جەر ۇستىندەگى مۇزدانۋدىڭ اسەرى بولۋى ىقتيمال.
قورىتىندى ەسەپتىڭ تولىق نۇسقاسى يدم سايتىندا جاريالانعان.
