«قۇرمەتتى باۋىرلار!
قاسيەتتى قادىر كەشى مۇباراك بولسىن! اللا تاعالا ۇستاعان ورازالارىڭىزدى, جاساعان قۇلشىلىق-عيباداتتارىڭىزدى قابىل ەتكەي.
راسىندا, رامازان ايىنىڭ قاسيەتتى بولۋىنىڭ ۇلى ەرەكشەلىكتەرىنىڭ ءبىرى – قادىر تۇنىندە تاعدىردىڭ جازىلۋى. ال قادىر ءتۇنىنىڭ قاسيەتتى بولۋىنىڭ ءمانى – ادامزات بالاسىن ەكى دۇنيە باقىتىنا جەتەلەۋشى قاسيەتتى كىتابىمىز قۇراننىڭ ءتۇسۋى.
اللا تاعالا قۇراندا: ء«بىز شىنىندا, قۇراندى قادىر تۇنىندە تۇسىردىك. قادىر ءتۇنىنىڭ نە ەكەنىن بىلەسىڭ بە؟ قادىر ءتۇنى (قاسيەت جانە ساۋاپ جاعىنان) مىڭ ايدان دا قايىرلى. سول تۇندە پەرىشتىلەر جانە جابىرەيىل اللانىڭ امىرىمەن (جەر بەتىنە اللا تاعدىر ەتكەن) بارلىق ىستەردى اتقارۋ ءۇشىن تۇسەدى. سول ءبىر ءتۇن, اعارىپ تاڭ اتقانعا دەيىن اماندىق-تىنىشتىق ءتۇنى بولادى» («قادىر» سۇرەسى, 1-5-اياتتار) دەپ باياندايدى.
ايشا انامىز (وعان اللا رازى بولسىن): «رامازاننىڭ سوڭعى ون ءتۇنى كىرگەن كەزدە پايعامبار بىلەگىن سىبانىپ, ءتۇنىن قۇلشىلىقپەن تىرىلتكەن جانە وتباسىن دا قۇلشىلىققا وياتقان» دەيدى. بۇل تۇندە ناماز بەن قۇران وقۋدىڭ ساۋابى مول. سونىمەن قاتار اللادان كوبىرەك كەشىرىم سۇراپ, دۇعا جاساۋدى ۇمىتپايىق.
ايشا انامىز (وعان اللا رازى بولسىن) ارداقتى پايعامبارىمىز مۇحاممەدتەن (وعان اللانىڭ سالاۋاتى مەن سالەمى بولسىن): «ۋا, اللانىڭ ەلشىسى, قادىر تۇنىندە قانداي دۇعا تىلەيىن؟» دەپ سۇرايدى. سوندا پايعامبارىمىز (وعان اللانىڭ سالاۋاتى مەن سالەمى بولسىن): «اللا, راسىندا, سەن كەشىرىمدىسىڭ جانە كەشىرگەندى جاقسى كورەسىڭ. مەنى كەشىرە كورشى» دەپ ايتاسىڭ» دەپ جاۋاپ بەرگەن. حاديستەردىڭ بىرىندە: «كىم دە كىم قادىر ءتۇنى يمانمەن جانە ساۋابىن ءۇمىت ەتىپ قۇلشىلىق ەتسە, ونىڭ الدىڭعى كۇنالارى كەشىرىلەدى» دەلىنگەن.
اللا تاعالا بارشامىزدىڭ قاتە-كەمشىلىگىمىزدى كەشىرىپ, ءوز مەيىرىمىنە بولەگەي. راببىمىز قادىر كەشىندە شىنايى يمانمەن جاساعان دۇعالارىمىزدى, نامازدارىمىزدى, بەرگەن ساداقالارىمىزدى, وقىعان قۇرانىمىزدى قابىل ەتىپ, ساۋابىن ەسەلەپ جازعاي.
ەلىمىز امان, جەرىمىز تىنىش, تاۋەلسىزدىگىمىز باياندى بولعاي! ءامين!»
