اتىراۋ وبلىسىنىڭ مامانداندىرىلعان تابيعات قورعاۋ پروكۋرورى اسحات قاسىموۆتىڭ ايتۋىنشا, قايىرشاقتى اۋىلدىق وكرۋگىندەگى كانال مەن بەزىمياننىي سۋ قويماسىندا بالىقتىڭ قىرىلۋ دەرەگىنە بايلانىستى سوتقا دەيىنگى تەرگەۋ باستالعان.
تەرگەۋ قر قىلمىستىق كودەكسىنىڭ 336-بابىنا سايكەس بالىق قورىن قورعاۋ ەرەجەلەرىن بۇزۋ دەرەگىمەن جۇرگىزىلىپ جاتىر. كەشە, 26 ساۋىردە اتىراۋ قالاسىنىڭ ماڭىنداعى قايىرشاقتى اۋىلدىق وكرۋگىندەگى بەزىمياننىي كولىندە ۇساق بالىقتىڭ قىرىلعانى انىقتالدى. سوعان بايلانىستى ارنايى كوميسسيا قۇرىلدى.
جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسى نۇرلىبەك عايسيننىڭ مالىمەتىنە سۇيەنسەك, بالىقتىڭ قىرىلۋىنا قايراڭعا شىعىپ قالعانى سەبەپ بولۋى مۇمكىن. ال وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلىنىڭ ايتۋىنشا, بالىقتاردىڭ ۋىلدىرىق شاشۋ ورنىنا ەركىن كىرۋى ءۇشىن قايىرشاقتى وكرۋگى اۋماعىنان 800 مەتر كانال قازىلعان. كانالدىڭ تەرەڭدىگى – شامامەن 1 مەتر.
ماماندار بەزىمياننىي كولىنەن قاراكوز بالىعىنىڭ 65 كەلى ءولى شاباعىن جيناعان. تابيعات قورعاۋ پروكۋراتۋراسى مەن ينسپەكتسيا ماماندارى وڭىردەگى سۋ ايدىندارىندا مونيتورينگ جۇرگىزىپ جاتىر. بۇل وبلىس پروكۋرورىنىڭ باقىلاۋىنا الىنعان.
