اتىراۋ قالاسىنىڭ پروكۋرورى ارشات ءتايتۋلليننىڭ ايتۋىنشا, 25 ساۋىردە №36 مەكتەپتىڭ 10-سىنىپ وقۋشىسى سوققىعا جىعىلعان. سوعان بايلانىستى دەنە جاراقاتىن قاساقانا كەلتىرۋ دەرەگىمەن قر قىلمىستىق كودەكسىنىڭ 107-بابى, 2-بولىگىنىڭ 8-تارماعىمەن سوتقا دەيىنگى تەرگەۋ ءجۇرىپ جاتىر.
«جەدەل تەرگەۋ شارالارى كۇدىكتى رەتىندە 11-سىنىپ وقۋشىسىن انىقتادى. وقيعانىڭ بۇكىل كۋاگەرىنەن جاۋاپ الىندى. قازىر قىلمىستىق ءىس بويىنشا قاجەتتى تەرگەۋ ارەكەتتەرى, ونىڭ ىشىندە سوت-مەديتسينالىق ساراپتاما جاسالىپ جاتىر. كامەلەتكە تولماعاندارعا قاتىستى زاڭعا قايشى ارەكەتتەردى حابارلاماعانى ءۇشىن مەكتەپ ديرەكتورى اكىمشىلىك قۇقىق بۇزۋ تۋرالى كودەكسىنىڭ 127-1-بابىنىڭ 1-بولىگىمەن اكىمشىلىك جاۋاپقا تارتىلدى», دەيدى ارشات تايتۋللين.
قازىر قالالىق پروكۋراتۋرا ۋاكىلەتتى ورگاندارمەن بىرگە كامەلەتكە تولماعاندار اراسىندا قابىلدانعان پروفيلاكتيكالىق جۇمىستاردىڭ تولىقتىعىن تەكسەرىپ جاتىر. وبلىستىق بالالار اۋرۋحاناسىنىڭ ديرەكتورى نۇرقابىل ايتمۇحامبەتوۆتىڭ دەرەگىنە سۇيەنسەك, ناۋقاس ەمدەۋ ورنىنا 25 ساۋىردە ساعات 17:00 شاماسىندا ءتۇسىپ, لور بولىمىنە جاتقىزىلعان.
«ناۋقاستى شۇعىل وپەراتسيالىق كومەكتى قاجەت ەتپەيتىندىگىنە بايلانىستى باتىس قازاقستان وبلىستىق اۋرۋحاناسىنىڭ ماماندارىنا جىبەرۋ كەلىسىلدى. الايدا, اتا-اناسى 26 ساۋىردە ساعات 12:00-دە بالاسىن قولحاتپەن شىعارىپ الىپ, ورالعا ۇشاقپەن الىپ كەتتى», دەيدى نۇرقابىل ايتمۇحامبەتوۆ.
