پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسىن تانىستىرعان دەپۋتات ەلنۇر بەيسەنباەۆ وسىلاي مالىمدەدى.
«مۇگەدەكتىگى بار بالانى ساناتوري-كۋرورتتىق ەمدەۋگە الىپ جۇرەتىن اتا-اناسىنىڭ, زاڭدى وكىلىنىڭ بىرىنە مەكەمەگە ورنالاسۋ, تاماقتانۋ, جاتىن ورىنى سياقتى ءبىرىنشى قاجەتتىلىك بولىپ سانالاتىن شىعىستارىنىڭ قۇنى وتەلەدى. بۇل باستاما شالعاي اۋدانداردا الەۋمەتتىك جاعدايى تومەن وتباسىلاردىڭ مۇگەدەكتىگى بار بالاسىنا جان-جاقتى ساناتوري-كۋرورتتىق ەم-دوم الۋعا جول اشادى. ال بۇگىنگى كۇنگە دەيىن اتالعان ماسەلەنى جەرگىلىك بيۋدجەت ارقىلى تەك ءۇش ايماقتا, ونىڭ ىشىندە نۇر-سۇلتان قالاسى, قاراعاندى جانە پاۆلودار وبلىستارىنان الىپ ءجۇرۋشى زاڭدى وكىلدەرىنەن قارجى قاراستىرىلعان ەدى», دەگەن ءماجىلىس دەپۋتاتى بۇل اسا ماڭىزدى نورمالاردىڭ ءبىرى ەكەنىن اتاپ ءوتتى.
سونداي-اق ول زاڭ جوباسىندا قاراستىرىلعان قارجىنىڭ باسىم بولىگى وسى نورمانى ورىنداۋعا قاراستىرىلاتىنىن باسا ايتتى.
ء«بىزدىڭ الدىن الا جوبالاپ ەسەپتەۋىمىز بويىنشا, 3 جىلدىڭ ىشىندە كەمىندە 62 مىڭنان استام بالا مەن اتا-اناسى نەمەسە ولاردىڭ زاڭدى وكىلدەرى ساناتوري-كۋرورتتىق ەم-دومعا بىرگە باراتىن بولادى. اتالعان زاڭ جوباسىنىڭ اياسىندا ەمحانالارداعى قىزمەتتى ءبىرىنشى كەزەكتە الۋ, ءۇشىنشى توپتاعى مۇگەدەكتىگى بار ادامداردى نوتاريۋستىق قىزمەتتەر جاساۋدا اقى تولەۋدەن بوساتۋ نورماسى, 50 مىڭ بالاعا ارنالعان پسيحولوگيالىق-مەديتسينالىق-پەداگوگيكالىق كونسۋلتاتسيالار قۇرۋ قاعيداتى, ادام ساۋداسىنىڭ قۇربانى بولعان شەتەلدىك ازاماتتارعا جان-جاقتى الەۋمەتتىك قىزمەت كورسەتۋ بويىنشا نورمالار ەنگىزىلدى. قۇرمەتتى ارىپتەستەر, اتالعان زاڭ جوباسىنىڭ اياسىندا 3 جىلدىق رەسپۋبليكالىق بيۋدجەتتەن 5,9 ملرد تەڭگە قارجى قاراستىرىلعان. زاڭ جوباسىنىڭ وڭ تۇستارىن ەسكەرە كەلە, ءبىرىنشى وقىلىمدا قولداۋلارىڭىزدى سۇرايمىن», دەدى ەلنۇر بەيسەنباەۆ.
