«كامال سمايىلوۆ – ۇلتىمىزدىڭ رۋحانياتى مەن مادەنيەتى ءۇشىن ۇلى ىستەر اتقارعان دارا تۇلعا. بۇكىل عۇمىرىن تۋعان حالقىنا قىزمەت ەتۋگە ارناعان اعامىز قازاق ادەبيەتى مەن جۋرناليستيكاسىن جانە كينوسى مەن تەلەۆيزياسىن دامىتۋعا زور ەڭبەك ءسىڭىردى. «قازاقفيلم» كينوستۋدياسىنا باسشىلىق جاساعان جىلداردا ۇلتتىق كينو ونەرىن بۇرىن-سوڭدى بولماعان جاڭا بيىككە كوتەردى. سول كەزەڭدە «قىز جىبەك», «اتاماننىڭ اقىرى», «تاقيالى پەرىشتە» سياقتى كوپتەگەن شەدەۆر تۋىندىلار دۇنيەگە كەلگەنى بەلگىلى», دەيدى سەنات سپيكەرى.
كامال سەيىتجان ۇلى قانداي قىزمەتتە بولسا دا ۇلتجاندىلىعىمەن جانە تاباندىلىعىمەن تانىلدى. مەملەكەتتىك تەلەراديو كوميتەتىنىڭ توراعاسى بولا ءجۇرىپ, قازاق تىلىندەگى حابارلاردىڭ سانىن دا, ساپاسىن دا ارتتىرۋعا باسا ءمان بەردى. «قىمىزحانا», «تاماشا», «التىباقان», «ايتىس» سياقتى ءتول قۇندىلىقتارىمىزدى دارىپتەيتىن جوبالاردىڭ جۇزەگە اسۋىنا ۇيىتقى بولدى.
كامال اعانىڭ جەتەكشىلىگىمەن تۇسىرىلگەن ر.قوشقارباەۆ, ق.قايسەنوۆ, ب.مومىش ۇلى, م.عابدۋللين جانە تاعى باسقا باتىرلارىمىز تۋرالى دەرەكتى فيلمدەر بۇگىندە قازاق تەلەۆيزياسىنىڭ التىن قورىنداعى قىمبات قازىنالاردىڭ ءبىرى بولىپ سانالادى.
«كامال سەيىتجان ۇلى تاۋەلسىزدىك العان تۇستا جوعارعى كەڭەس دەپۋتاتى رەتىندە ەگەمەن ەلىمىزدىڭ ەڭسە تىكتەۋىنە دە ۇلكەن ۇلەس قوستى. ۇنەمى ەلدىك ماسەلەلەردى نازاردا ۇستاپ, قايراتكەرلىك پىكىرىن ءبىلدىرىپ وتىردى. شەراعاڭمەن جازىسقان حاتتارىنىڭ ءوزى حالىق پەن بيلىك اراسىنداعى التىن كوپىردىڭ وزىق ۇلگىسى ەكەنى ءسوزسىز.
اعامىز ءومىرىنىڭ سوڭىنا دەيىن ىزىنەن ەرگەن جاس بۋىنعا جول كورسەتىپ, شاكىرت تاربيەلەدى. ەلى ءۇشىن ەسەلى ەڭبەك ەتكەن وسىنداي ەرەن تۇلعانىڭ ونەگەلى ءومىرىن كەڭىنەن دارىپتەۋ – بارشامىزدىڭ ازاماتتىق پارىزىمىز. مۇنداي قادام جاس بۋىندى وتانشىل, ۇلتجاندى بولۋعا تاربيەلەيتىنى انىق. سوندىقتان الداعى ۋاقىتتا بۇل باعىتتا يگىلىكتى ىستەر كوپتەپ قولعا الىنادى دەپ سەنەمىز. كامال اعامىزدىڭ رۋحى شات بولسىن, مۇراسى ماڭگى جاساي بەرسىن!», دەپ جازدى پارلامەنت سەناتىنىڭ توراعاسى facebook جەلىسىندەگى پاراقشاسىندا.
