يندۋستريا جانە ينفراقۇرىلىمدىق دامۋ مينيسترلىگى ۇيىمداستىرعان تۋرنير قازاقستاندىق باق وكىلدەرىنىڭ باسىن بىرىكتىرىپ, جۋرناليستەر مەن رەداكتسيالاردىڭ شىعارماشىلىق ۇجىمدارى اراسىنداعى ىنتىماقتاستىقتى نىعايتۋ ماقساتىندا وتكىزىلەدى.
تۋرنيرگە قازاقستاننىڭ ءار وڭىرىنەن 18 كوماندا قاتىسۋعا نيەت ءبىلدىردى. جەرەبە قورىتىندىسى بويىنشا ولار 4 توپقا ءبولىنىپ, ءار توپتاعى ەكى مىقتى كوماندا پلەي-وففقا جولداما الادى. تۋرنير 23 ساۋىردە اياقتالادى دەپ جوسپارلانۋدا. بارلىق ويىندار «University Sports Centre» كەشەنىندە وتەدى.
BAQ liga جۋرناليستەر ليگاسى — باق كوماندالارى اراسىندا ميني-فۋتبولدان توعىز ماۋسىم كولەمىندە جانە ۆولەيبولدان چەمپيونات وتكىزگەن, باق ۇجىمدارىنا ارنالعان كەزدەسۋ الاڭى. جالپى BAQ liga وتكىزگەن جارىستاردىڭ بارلىق ماۋسىمىنا ەلىمىزدەگى 70-كە جۋىق باق-تان 700-دەن استام جۋرناليست قاتىستى. تۋرنير سەرىكتەستەرى — Qazaq geophysics جانە Kazakhmys barlau كومپانيالارى.
«University Sports Centre» — بۇل اۋدانى 7 مىڭ شارشى مەتردەن اساتىن, ۆولەيبول, باسكەتبول, شاعىن فۋتبول, گاندبول, كۇرەس سياقتى سپورت تۇرلەرى بويىنشا جاتتىعۋ ساباقتارىن وتكىزۋگە, سونداي-اق ارنايى سپورت سەكتسيالارى بويىنشا جارىستارعا ارنالعان زاماناۋي كەشەن. سپورت كەشەنى 2021 جىلدىڭ 25 مامىرىندا ل. گۋميلەۆ اتىنداعى ەۇۋ-ءنىڭ 25 جىلدىعىن مەرەكەلەۋ اياسىندا اشىلدى.
