ستۋدەنتتەر 27 ەلدىڭ ەكولوگيالىق پروبلەمالاردى شەشۋدەگى شەشىمدەرى تۋرالى باياندادى. اركىم وزىنە بەلگىلەنگەن مەملەكەتتىڭ ۇستانىمىن جاقسى جاعىنان كورسەتىپ, تيىمدىلىگىن دالەلدەۋگە تىرىستى. ايتالىق, م.نارىكباەۆ اتىنداعى كازگيۋ ستۋدەنتى قازىنا مۇسىركەپ دانيا مەملەكەتىنىڭ قورشاعان ورتانى قورعاۋ ءمينيسترى رولىندە, CO2 شىعارىندىلارىن ازايتۋ ءۇشىن كوبىرەك ەكولوگيالىق قۇرىلىستى قوسۋ تۋرالى باستاما كوتەردى. قاتىسۋشىنىڭ ويىنشا, بۇل ەكوۇيلەردە جاڭارتىلاتىن ەنەرگيا كوزدەرى پايدالانىلادى جانە بولاشاقتا تابيعاتتى عانا ەمەس, اقشانى دا ۇنەمدەيدى. ىسكەرلىك ويىنعا قاتىسقان 27 ستۋدەنت كليماتتىڭ وزگەرۋى, جاڭا تەحنولوگيالاردىڭ ارتىقشىلىقتارى مەن كەمشىلىكتەرى, «جاسىل» قارجىلاندىرۋ», يننوۆاتسيالار, سونداي-اق جوعارىدا اتالعانداردىڭ ءبارىن پايدالانۋدىڭ سالدارى سياقتى فاكتورلار توڭىرەگىندە وزدەرىنىڭ شەشىمدەرىن جانە دالەلدەرىن ۇسىندى.
ءىس-شارادا ءسوز العان ەۋروپالىق وداقتىڭ قازاقستان رەسپۋبليكاسىنداعى ەلشىسى كەستۋتيس يانكاۋسكاس:
– ءبىز «ەۋروپالىق وداقتىڭ ۇستانىمى» دەگەن ءسوزدى ءجيى ەستيمىز. بۇگىن ءبىز بۇل ۇستانىمنىڭ قالاي ازىرلەنەتىنىن كورسەتكىمىز كەلدى. ءاربىر مينيستر كەڭەس شەڭبەرىندە ءوز مەملەكەتىنىڭ مۇددەلەرىن قورعايدى جانە بۇل مۇددەلەردىڭ قاراردا قانشالىقتى ەسكەرىلەتىنى سوعان عانا بايلانىستى بولادى. بۇل – ۇلكەن جاۋاپكەرشىلىك. ءبىز ەكولوگيا تاقىرىبىن تاڭدادىق. سەبەبى بۇل تەك ەۋروپالىق وداق ەلدەرى ءۇشىن عانا ەمەس, قازاقستان جانە ورتالىق ازيانىڭ باسقا ەلدەرى ءۇشىن دە ماڭىزدى. ويتكەنى كليماتتىڭ وزگەرۋى بارلىعىمىزعا قاتىستى. ءبىز ءۇشىن ماڭىزدى, ال ستۋدەنتتەر ءۇشىن, بولاشاق ۇرپاق ءۇشىن ودان دا ماڭىزدى, – دەدى.
وتكىزىلگەن پىكىرتالاستىڭ قورىتىندىسى بويىنشا قاتىسۋشىلار ويىن بارىسىندا ايتىلعان بارلىق يدەيا مەن ۇسىنىستى قامتيتىن قارار قابىلدادى.
