ەلورداداعى ۇلتتىق مۋزەيدە مادەنيەت جانە سپورت مينيسترلىگى قولجازبالار جانە سيرەك كىتاپتار ۇلتتىق ورتالىعىمەن بىرلەسىپ ۇيىمداستىرعان كورمەنىڭ اشىلۋىنا مادەنيەت جانە سپورت ءمينيسترى داۋرەن اباەۆ, پارلامەنت سەناتى مەن ءماجىلىسىنىڭ دەپۋتاتتارى, قازاقستانداعى ديپلوماتيالىق ميسسيالاردىڭ باسشىلارى مەن وكىلدەرى (ازەربايجان, قىرعىزستان, تۇركيا, يران), قوعام, عىلىمي جانە ساراپتامالىق قاۋىمداستىق, ارحيۆتەر, كىتاپحانالار, مۋزەيلەردىڭ وكىلدەرى قاتىستى.
كورمەگە قولجازبالار مەن سيرەك كىتاپتار ۇلتتىق ورتالىعىنىڭ قورلارىندا ساقتالعان ەجەلگى جازبا ەسكەرتكىشتەر, قولجازبالار مەن سيرەك كىتاپتار قويىلدى. اتاپ ايتقاندا, VII عاسىردا جازىلعان قاسيەتتى قۇران كارىم, قوجا احمەت ياساۋي, ناسر يبن مۇحاممەد سامارقاندي, ماحبۋبي, يبن حالليكان جانە تاعى باسقا اۆتورلاردىڭ شىعارمالارى. ۇلى دالامىزدا قىپشاق, قاراحان, التىن وردا داۋىرلەرىندە حاتقا ءتۇسىپ, الەم جاۋھارلارىنىڭ التىن جۇلگەسىنە اينالعان بۇل كونە تۋىندىلار قازاق حالقىنىڭ ءتول مادەنيەتىنە جاتاتىن سيرەك قولجازبالار ەكەنىن تانىتۋ بۇگىنگىدەي جاھاندانۋ كەزىندە وتە ماڭىزدى.
«كونە جازبا مۇرالار ءتول مادەنيەتىمىز بەن تاريحىمىزدى الەمگە ايگىلەپ قانا قويماي, كوپشىلىككە دارىپتەيدى. ۇلت رۋحانياتىن ودان ءارى نىعايتىپ, جاس ۇرپاقتىڭ تاريحي ساناسى تەرەڭدەۋىنە جول اشادى. وسى رەتتە ءبىز ۇلتتىق مۋزەيدە قولجازبالار جانە سيرەك كىتاپتار ۇلتتىق ورتالىعىنداعى بىرەگەي جازبا دەرەكتەردەن ارنايى كورمە ۇيىمداستىرىپ وتىرمىز. ماقسات – تاريحي مۇرالاردى كەلەشەكپەن بايلانىستىرۋ, ەلىمىزدىڭ سانعاسىرلىق تاريحىن ايقىندايتىن باعا جەتپەس مۇرالارىن تانىتۋ. سونىمەن قاتار ول دۇنيەلەردى عىلىمي اينالىمعا قوسىپ, عالىمدار مەن زەرتتەۋشىلەر ءۇشىن قولجەتىمدى ەتۋ وتە ماڭىزدى. كورمەدە ەل تاريحىنا قاتىستى بىرنەشە ماڭىزدى جازبا قويىلعان», دەدى مادەنيەت جانە سپورت ءمينيسترى داۋرەن اباەۆ كورمەنىڭ اشىلۋ سالتاناتىندا.
قادىم زامانداردان سىر شەرتىپ قانا قويماي, تەرەڭ پاراسات, پايىمنىڭ وزىق ۇلگىلەرىن ۇسىناتىن قولجازبالىق جادىگەرلەر ۇلتىمىزدىڭ رۋحاني, ساياسي, مادەني جانە تاريحي ەسكەرتكىشتەرىنىڭ قاتارىنان سانالادى. ۇلتتىق مادەنيەتكە عانا ەمەس, الەمدىك اقىل-ويدىڭ دامۋىنا ولجا سالعان كونە مۇرالار عىلىمنىڭ, ءبىلىمنىڭ جانە مادەنيەتتىڭ دامۋىنا ۇلكەن اسەر ەتەدى. وسى ماقساتتى كوزدەگەن كورمە بارىسىندا تاريحي قولجازبالاردى كوپشىلىككە تاراتۋ باعىتىندا جۇمىس جۇرگىزىلەدى. ناتيجەسىندە, جاس عالىمدارعا باستاپقى دەرەككوزدەرمەن جۇمىس ىستەۋ مۇمكىندىگى تۋىپ وتىر.
«مۇنداعى التىن وردا ءداۋىرى ادەبيەتىنە جاتاتىن ءسايف ساراي مەن قۇتىبتى قازاق جازبا ادەبيەتىنىڭ نەگىزىن قالاۋشى رەتىندە تانۋعا بولادى. ويتكەنى قۇتىبتىڭ «حۇسىراۋ-شىرىنى» نەمەسە ءسايف ساراي ەڭبەكتەرى شاعاتايشا قىپشاق ءتىلىنىڭ نەگىزىندە جازىلعان», دەيدى قولجازبالار جانە سيرەك كىتاپتار ۇلتتىق ورتالىعىنىڭ باس ساراپشىسى المات ابسالىقوۆ.
« ۇلى دالا تاريحىنىڭ جازبا مۇرالارى» اتتى كورمەگە قايىپ حاننىڭ تۇرىك سۇلتانى ءىى احمەدكە جازعان حاتىنان ءۇزىندى, سۇلتان كەنەسارى, جاڭگىر حان, ابىلاي حاننىڭ حاتتارى جانە تاعى باسقا قۇندى جادىگەرلەر قويىلعان. ۇلتتىق مۋزەيدەگى كورمەنى ەلوردا جۇرتشىلىعى جىل سوڭىنا دەيىن تاماشالاي الادى.
