ناۋرىزداعى تەستىلەۋدە تالاپكەرلەردىڭ 70%-دان كوبى شەكتى بالل جينادى. بۇل بىلتىرعىمەن سالىستىرعاندا 6%-عا ارتىق. ال ورتاشا بالل شامامەن 69 بالدى قۇرادى. ەڭ جوعارى بالل – 135.
«ناۋرىزداعى ۇبت سۇراقتارىنىڭ فورماتى مەن سانى وزگەرىسسىز قالدى. بىراق ءبىز ۇمىتكەرلەرگە بىرنەشە قوسىمشا قىزمەتتى قوستىق. ولاردىڭ ەڭ ماڭىزدىسى – جەكە تاقىرىپتىق تالداۋ. ەندى تۇلەك تەستىلەۋدى اياقتاعاننان كەيىن جيناعان ۇپاي سانى تۋرالى عانا اقپارات الىپ قويماي, سونىمەن بىرگە قانداي تاقىرىپتاردى بىلەتىنى, قايسىسىن تولىق بىلمەيتىنى تۋرالى قوسىمشا تالداۋلار الادى. بۇل وقۋشىعا جەكە تاقىرىپتارعا كوبىرەك ۋاقىت بولۋگە جانە قاتەلەرمەن جۇمىس ىستەۋگە مۇمكىندىك بەرەدى. تاعى ءبىر قىزمەت – IT باعىتتارىنا تۇسەتىندەر ءۇشىن «ماتەماتيكا-ينفورماتيكا» كومبيناتسياسىن تاڭداۋ. فيزيكا بيىل نەگىزگى ءپان بولىپ قالاتىنىنا جانە جاڭاشىلدىقتىڭ ءوزى 2022-2023 وقۋ جىلىندا ەنگىزىلەتىنىنە قاراماستان, ناۋرىزداعى تەستىلەۋ كەزىندە بۇل كومبيناتسيانى 800-گە جۋىق ادام تاڭدادى. سونىمەن قاتار ءبىز مەتالداردىڭ بەلسەندىلەرىن قوسۋ ارقىلى پايدالانۋعا رۇقسات ەتىلگەن تۇزدىڭ ەرىگىشتىگى كەستەسىن جاڭارتتىق. بۇل جاڭالىقتىڭ بارلىعى تەست تاپسىرۋشىلاردىڭ پىكىرلەرىن ەسكەرە وتىرىپ, سونداي-اق نەگىزگى ۇبت-عا دايىندىق ساپاسىن ارتتىرۋ ماقساتىندا ەنگىزىلدى», دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
مينيسترلىكتىڭ مالىمدەۋىنشە, ناۋرىزداعى ۇبت-عا ەرەكشە ءبىلىم بەرۋ قاجەتتىلىگى بار 211 بالا قاتىستى. بىلتىر وسى كەزەڭدە كورۋ, ەستۋ, تىرەك-قيمىل اپپاراتى قىزمەتى بۇزىلعان 35 تالاپكەر تەستىلەۋدەن وتكەن بولاتىن. ايتا كەتەيىك, بيىل العاش رەت ەرەكشە قاجەتتىلىگى بار تۇلەكتەرگە تەستىلەۋ تاپسىرمالارىن ورىنداۋ ءۇشىن نەگىزگى 240 مينۋتتان بولەك, تاعى 40 قوسىمشا مينۋت بەرىلدى.
بىلتىر قاڭتار ايىندا وتكەن ۇبت-مەن سالىستىرعاندا تىيىم سالىنعان زاتتاردى الىپ كىرۋ ارەكەتتەرى دە ازايعان. سمارتفونداردى, پاراقتاردى جانە باسقا دا تىيىم سالىنعان زاتتاردى الىپ كىرگىسى كەلگەن 99 ۇمىتكەر تەست تاپسىرۋ مۇمكىندىگىنەن ايىرىلدى.
ۇبت-عا كىرۋ ءۇش دەڭگەيلى جۇيە بويىنشا جۇزەگە اسىرىلادى: Face ID تۇلعانى سايكەستەندىرۋ ارقىلى, جەكە كۋالىك جانە وتىرعان ادامنىڭ جەكە باسىن انىقتاۋ. بيىل تەستىلەۋ ء«بىر كومپيۋتەر – ەكى كامەرا – ءبىر تەستىلەۋشى» قاعيداسى بويىنشا جۇرگىزىلىپ جاتىر. تەستىلەۋ كەزىندە ەرەجە بۇزعانى ءۇشىن 259 ادام اۋديتوريادان شىعارىلىپ, ناتيجە جويىلدى.
