NASA (National Aeronautics and Space Administration) – اەروناۆتيكا جانە عارىشقا ۇشۋ سالاسىندا زەرتتەۋلەر جاساۋ ءۇشىن 1958 جىلى قۇرىلعان اقش ۇكىمەتىنىڭ اگەنتتىگى. وسى ۇيىمنىڭ گرانتىن يەلەنگەن ياروسلاۆا كراۆچۋك اقش-تا ءبىلىم الۋعا قۇقىلى.
ول كومەتالار مەن استەرويدتار توپىراعىنان سۋتەگى وتىنىن الۋ ءۇشىن Kanysh شاعىن عارىش كەمەسىنىڭ ۇلگىسىن جاساعان. وسى ونەرتابىسىن كراۆچۋك سۇحبات كەزىندە الدىمەن NASA وكىلدەرىنە كورسەتىپتى. كەيىن جاڭالىعىن «XXII ساتباەۆ وقۋلارى» حالىقارالىق عىلىمي كونفەرەنتسياسىندا تانىستىردى. ەندى ول جىل سايىن FISE عارىشتىق ءبىلىم بەرۋ حالىقارالىق قورى ۇيىمداستىراتىن NASA United Space School-عا قازاقستان اتىنان قاتىسادى.
«كىشكەنتاي كەزىمنەن عارىشقا اۋەستەنىپ, 4-سىنىپتان باستاپ ءتۇرلى عارىش اپپاراتتارىن قۇراستىرا باستادىم. ۇشاق جاساۋ يدەياسى وقۋ جىلىنىڭ باسىندا ويىما كەلدى. جوبانى جۇزەگە اسىرۋعا زىمىران عىلىمى بويىنشا جاتتىقتىرۋشى ەۆگەني بوۆسۋنوۆسكي, ينفورماتيكا جانە روبوتتەحنيكا ءپانىنىڭ مۇعالىمى رۋسلان سمايىلوۆ جانە استروكلۋب جەتەكشىسى گۇلنار باۋبەكوۆا كومەكتەستى. جوبانى ازىرلەۋگە كومەكتەسكەن مۇعالىمدەرىمە العىس ايتامىن. حالىقارالىق عارىش مەكتەبىندە وقۋ – مەنىڭ ارمانىم. بۇعان دەيىن مەن قازاقستاندىق جاستاردىڭ سول جوباعا قالاي وتكەنىن كوردىم. سوندىقتان مەن دە قاتىسىپ كورۋگە شەشىم قابىلدادىم جانە بۇل مەنىڭ قولىمنان كەلدى», دەيدى يا.كراۆچۋك.
دارىندى وقۋشى وسى جازدا حيۋستون ۋنيۆەرسيتەتى مەن NASA عارىش ورتالىعىنا بارادى. قازىردىڭ وزىندە ول NASA-دان نەگىزگى باعدارلاماعا دايىندىق رەتىندە تاپسىرمالار الىپ جاتىر. ول ءوزىنىڭ بولاشاعىن عارىشپەن بايلانىستىرىپ, سۇيىكتى ىسىمەن اينالىسۋدى جوسپارلاپ وتىر.
