مەملەكەتتىك قولداۋدىڭ ناتيجەسىندە قازاقستاندىق عالىمدار شەتەلدىك عالىمدارمەن بىرگە مەديتسينا, نانو جانە بيوتەحنولوگيالار, جاساندى ينتەللەكت, گەولوگيا, مينەرالدى جانە كومىرسۋتەكتى شيكىزاتتى وڭدەۋ, اۋىل شارۋاشىلىعى ونىمدەرىنىڭ قاۋىپسىزدىگى جانە ەكولوگيا سالاسىنداعى زاماناۋي جوبالارعا قاتىسىپ جاتىر. بارلىق جوبا عىلىم قورىنىڭ قولداۋىمەن جۇزەگە اسىرىلدى.
عىلىم قورى باسقارماسىنىڭ توراعاسى ارىن ورساريەۆ: «سوڭعى 2 جىلدا 130-عا جۋىق جوبا قارجىلاندىرىلدى. قور – عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋ بويىنشا جوبالاردى گرانتتىق قارجىلاندىرۋ وپەراتورى. بۇگىندە ءبىز عىلىمدى قاجەت ەتەتىن 120 ءوندىرىستى ىسكە قوستىق, ونىڭ 15-ءى ءونىمىن ەكسپورتقا شىعارىپ ۇلگەردى. سونىمەن قاتار 1,5 مىڭعا جۋىق جۇمىس ورنى قۇرىلدى. زياتكەرلىك مەنشىك اۆتورلارى مەن عىلىمي جوبالاردى پايدالاناتىن كاسىپورىندار اراسىندا 45 ليتسەنزيالىق كەلىسىم جاسالدى», دەدى.
مينيسترلىكتىڭ مالىمدەۋىنشە, عىلىمي جوبالاردىڭ اراسىندا كوبالت-57 راديويزوتوپى, جەل جانە كۇن ەنەرگياسىن وندىرەتىن گەنەراتورلار, زەڭگە قارسى پرەپارات, مەديتسينالىق, تاعامدىق جانە تۇرعىن ءۇي-جايلاردى سانيتارلىق تازارتۋعا ارنالعان بيولوگيالىق ونىمدەر, ءسۇت سارىسۋى نەگىزىندەگى سۋسىندار, پروبيوتيكتەر جانە ت.ب. بار.
ايتالىق, عىلىم قورىنىڭ قولداۋىمەن «انتيگەن» عىلىمي-وندىرىستىك كاسىپورنىنىڭ عالىمدارى كۋلتۋرالدىق ۆاكتسينا ءوندىرۋ تەحنولوگياسىن ازىرلەدى. بۇل جوبا ءۇي جانە جابايى جانۋارلاردىڭ قۇتىرۋ اۋرۋىنىڭ تارالۋىن الدىن الۋعا باعىتتالعان. بۇگىندە ۆاكتسينانى گرۋزياعا جەتكىزۋ ۇيىمداستىرىلدى.
ميكروبيولوگيا جانە ۆيرۋسولوگيا ينستيتۋتىنىڭ عالىمدارى سارىسۋ نەگىزىندەگى تاعامدىق قۇندىلىعى جوعارى وتاندىق سۋسىن شىعارۋدى قولعا الدى. سۋسىننىڭ بۇيرەك پەن باۋىردىڭ جۇمىسىنا, سونداي-اق بۇكىل ىشەكتىڭ جۇمىسىنا پايداسى زور. سونىمەن بىرگە رەۆماتيزمدەگى قابىنۋدى ازايتۋعا كومەكتەسەدى, گيپەرتونيا كەزىندە قىسىمدى قالىپقا كەلتىرىپ, اتەروسكلەروز قاۋپىن ازايتادى.
