الماتى ورتالىق مەشىتىنىڭ ۇيىمداستىرۋىمەن قالا كوشەلەرىندە 25 توننا سۋ مەن مەككەدەن ارنايى الدىرعان 2 توننا قۇرما 100 مىڭ ادامعا ۇلەستىرىلدى. شاراعا قالا مەشىتتەرىنىڭ ءدىن قىزمەتكەرلەرى مەن ۆولونتەرلار جۇمىلدىرىلدى.
«بيىل قالاداعى 52 مەشىتتىڭ 47-سىندە تاراۋيح نامازىندا قۇران حاتىم تۇسىرىلەدى. قالعان 5 مەشىتتە تاراۋيح نامازى قۇران حاتىمسىز وقىلادى. رامازان - قۇران ايى. سول سەبەپتى, وسى ايدا قالا مەشىتتەرىندە قۇران الىپپەسى مەن ناماز ۇيرەتۋ كۋرستارى جۇرگىزىلەدى», دەدى الماتى قالاسىنىڭ باس يمامى تولەبي وسپان.
ت.وسپاننىڭ ايتۋىنشا, الماتى ورتالىق مەشىتىندە «رامازان شاتىرى» قۇرىلىپ, كۇندەلىكتى 500 كىسىگە اۋىزاشار داستارحانى جايىلادى. سونىمەن قاتار قالا مەشىتتەرىندە دە اۋىزاشار بەرىلەدى.
