– دارحان مەدەعالي ۇلى, مەملەكەت باسشىسى «جاڭا قازاقستان: جاڭارۋ مەن جاڭعىرۋ جولى» اتتى حالىققا جولداۋىندا ەلىمىزدە مەملەكەتتىك باسقارۋعا قاتىستى بىرقاتار ساياسي رەفورمانىڭ جۇرگىزىلەتىنىن جاريا ەتتى. ءسىزدىڭ پىكىرىڭىزشە, جاڭا قازاقستانداعى مەملەكەتتىك قىزمەت قالاي ۇيىمداستىرىلۋى كەرەك؟
– پرەزيدەنت جولداۋىندا ۇسىنىلعان بىرقاتار ساياسي رەفورما قوعامنىڭ قاجەتتىلىگى مەن سۇرانىسىنا نەگىزدەلگەن. مەملەكەت باسشىسى ء«بىزدىڭ مۇراتىمىز – جاڭا قازاقستاندى قۇرۋ. جاڭا قازاقستان دەگەنىمىز – ەگەمەن ەلىمىزدىڭ بولاشاقتاعى بەينەسى» دەپ باستى باعداردى انىقتاپ بەردى. بۇل قوعامدىق ساناعا سەرپىن بەرىپ, ەلدىڭ ەرتەڭگى كۇنگە سەنىمىن ارتتىرۋدا.
مەملەكەت باسشىسى اتاپ وتكەندەي, ءبىز «مەملەكەت پەن قوعامنىڭ ءوزارا سەنىمىنە جانە قۇرمەتىنە نەگىزدەلگەن جاڭا ساياسي مادەنيەتتى قالىپتاستىرامىز». ال بۇل ماقساتقا جەتۋ ءۇشىن ء«اربىر ادام جانە بۇكىل قوعام, قۇندىلىقتارىمىز تۇبەگەيلى جاڭارۋعا ءتيىس».
پرەزيدەنت «ادام مەملەكەت ءۇشىن ەمەس, مەملەكەت ادام ءۇشىن» دەپ ۇنەمى ايتىپ كەلەدى. وسىعان سايكەس, جاڭا قازاقستانداعى مەملەكەتتىك قىزمەت بيۋروكراتياعا جول بەرمەيتىن, سەرۆيستىك سيپاتتا ۇيىمداستىرىلۋى كەرەك. بۇل – حالىقتىڭ تالابىنا ساي بولۋ, ەلدىڭ قاجەتىنەن شىعا ءبىلۋ دەگەن ءسوز.
بۇگىندە حالىق تاراپىنان مەملەكەتتىك ورگانداردىڭ قىزمەت كورسەتۋىنە قاتىستى كەيبىر كوڭىلتولماۋشىلىقتاردىڭ بارى جاسىرىن ەمەس. وسى ولقىلىقتاردىڭ ورنىن تولتىرۋ – ءبىزدىڭ الدا اتقارار قىزمەتىمىزدىڭ باستى باعدارى. ول ءۇشىن اشىق, ءادىل, ادال, ادامعا باعدارلانعان مەملەكەتتىك اپپارات قالىپتاستىرۋىمىز قاجەت. ماقساتىمىز – ەل يگىلىگىنە قىزمەت ەتۋ. جاڭا قازاقستانداعى مەملەكەتتىك قىزمەتتى ۇيىمداستىرۋ وسى باعىتتا جۇرگىزىلەدى.
– جولداۋدا جەرگىلىكتى ءوزىن ءوزى باسقارۋدى ورتالىقسىزداندىرۋ جايلى ايتىلدى. وسىعان قاتىستى ويىڭىزبەن بولىسە كەتسەڭىز...
– جولداۋدا ايتىلعان جەرگىلىكتى ءوزىن ءوزى باسقارۋدى ورتالىقسىزداندىرۋ ەڭ الدىمەن ساياسي جاڭعىرۋدى ناتيجەلى جۇزەگە اسىرۋعا جانە ازاماتتىق قوعامدى دامىتۋعا باعىتتالىپ وتىر.
مەملەكەت پەن جەرگىلىكتى ءوزىن ءوزى باسقارۋ ينستيتۋتتارىنىڭ ءوزارا مىندەتتەرىن ناقتىلاۋ بۇلاردىڭ ءرولىن كۇشەيتىپ, جاۋاپكەرشىلىگىن ارتتىرادى. سەبەبى اتالعان ينستيتۋتتار قابىلدانعان شەشىمدەرگە تىكەلەي جاۋاپتى بولادى. ولاردىڭ دەربەس شەشىم قابىلداۋىنا مۇمكىندىك بەرۋ ازاماتتاردىڭ تۇرعىلىقتى جەرلەردەگى ماسەلەلەردى شەشۋگە تىكەلەي اتسالىسۋ بەلسەندىلىگىن ارتتىرادى. ء«وزىم دەگەندە, وگىز قارا كۇشىم بار» دەيدى عوي حالقىمىز. ءار ازاماتتىڭ ءوز قالاسى, ءوز اۋدانى نەمەسە ءوز اۋىلى ءۇشىن بەلسەندىلىك تانىتىپ, جاۋاپكەرشىلىكتى سەزىنىپ, ۇلەسىن قوسۋىنا جانە ءتيىمدى ناتيجەلەرگە قول جەتكىزۋىنە جاڭا مۇمكىندىكتەر تۋىندايدى.
وسى تۇستا وڭىرلەردى قارجىلاندىرۋ جۇيەسىن ءارى قاراي جەتىلدىرۋ, ياعني جەرگىلىكتى ءوزىن ءوزى باسقارۋ ورگاندارىن تىكەلەي قارجىلاندىرۋ ءتاسىلىن ەنگىزۋ ولاردىڭ جوعارى تۇرعان اكىمدىكتەرگە قارجىلىق تاۋەلسىزدىگىن باسەڭدەتىپ, ءوڭىر باسشىلىعىنىڭ جەرگىلىكتى احۋالعا ىقپال ەتۋ مۇمكىندىگىن جانە جاۋاپتىلىعىن ارتتىرادى.
ناتيجەسىندە, جولداۋدا ايتىلعان شارالاردى جۇزەگە اسىرۋ, جۇرتشىلىقتى ءوزىن تولعاندىرعان پروبلەمالاردى وڭتايلى شەشۋ ىسىنە جۇمىلدىرا الاتىن, جاۋاپكەرشىلىگى مول جەرگىلىكتى كوشباسشىلاردىڭ شىعۋىنا سەپتىگىن تيگىزەدى. سونىمەن قاتار ازاماتتاردىڭ جەرگىلىكتى باسقارۋعا ىقپالى مەن بەلسەندىلىگى ارتىپ, جەرگىلىكتى ءوزىن ءوزى باسقارۋ جۇيەسى نىعايا تۇسەدى. بۇل – مەملەكەتتىك باسقارۋ جۇيەسىن دەموكراتيالاندىرۋدىڭ اشىق كورىنىسى.
– جىل باسىندا مەملەكەت باسشىسى اگەنتتىككە بىرقاتار تاپسىرما بەردى. سول تاپسىرمالار بويىنشا قانداي جۇمىستار اتقارىلىپ جاتىر؟
– مەملەكەت باسشىسى مەملەكەتتىك قىزمەتكە كىرۋ جانە ودان شىعۋ راسىمدەرىن جەڭىلدەتۋ, بيۋروكراتياعا جول بەرمەۋ, مەريتوكراتيا قاعيداتىن ىلگەرىلەتۋگە قاتىستى اگەنتتىكتىڭ الدىنا جاڭا مىندەتتەر قويعان بولاتىن. قازىر بۇل ماسەلەلەر زەردەلەنىپ, ۇسىنىستار ازىرلەنۋدە.
بۇگىندە اگەنتتىك تاراپىنان مەملەكەتتىك قىزمەتكە ىرىكتەۋدى جەڭىلدەتۋ بويىنشا بىرقاتار ۇسىنىس دايىندالدى. ماسەلەن, جوعارى وقۋ ورىندارى مەن كوللەدجدەردە مەملەكەت ەسەبىنەن ءبىلىم الىپ, وقۋ ۇلگەرىمىنىڭ ورتاشا بالى (GPA) جوعارى كورسەتكىشتەگى مامان يەسى اتانعان جاستارىمىزدى اۋداندىق جانە اۋىلدىق دەڭگەيلەردەگى ەڭ تومەنگى لاۋازىمدىق مەملەكەتتىك قىزمەتكە كونكۋرستىق ىرىكتەۋسىز قابىلداۋ ۇسىنىلىپ وتىر.
– وسى تۇستا ناقتىلاي كەتسەك, سوندا بۇل ارنايى جاستار ءۇشىن قاراستىرىلىپ وتىرعان جەڭىلدىكتەر مە؟
– سولاي دەسە دە بولادى. بىرىنشىدەن, بۇل جاس مامانداردىڭ ەل وڭىرلەرىنە ورالىپ, ونىڭ دامۋىنا ۇلەس قوسۋعا جول اشسا, ەكىنشىدەن, ايماقتاردا كادر تاپشىلىعىن ازايتۋعا ىقپال ەتەدى دەپ كۇتىلۋدە. قازىرگى ۋاقىتتا اگەنتتىك تاراپىنان مەملەكەتتىك قىزمەتكە ىرىكتەۋدى جەڭىلدەتۋ بويىنشا باسقا دا ۇسىنىستار دايىندالىپ جاتىر.
مەملەكەتتىك قىزمەتتەن شىعۋ راسىمدەرىن جەڭىلدەتۋگە قاتىستى سۇراققا كەلسەك, قولدانىستاعى ەرەجەگە سايكەس, قىزمەتشى ەكى جىل قاتارىنان تەرىس باعالاۋعا يە بولعاننان كەيىن جۇمىستان بوساتىلۋى مۇمكىن ەكەنىن اتاپ وتكەن ءجون. وسى ماسەلەنى باعالاۋ قۇرالىنىڭ ءرولىن ارتتىرۋ ارقىلى شەشۋ ۇسىنىلادى. وسىلايشا توقسان سايىنعى باعالاۋدى ەنگىزگەننەن كەيىن, ەكى توقسان قاتارىنان قاناعاتتانارلىقسىز باعا العان قىزمەتشىلەردىڭ لاۋازىمىن تومەندەتۋ, ال تومەن تۇرعان بوس لاۋازىم بولماعان جاعدايدا ولاردى لاۋازىمىنان بوساتۋ ۇسىنىلادى. بۇل ءتيىمسىز مەملەكەتتىك قىزمەتشىلەردىڭ جاۋاپكەرشىلىگىن ارتتىرا وتىرىپ, ولاردى قىزمەتتەن بوساتۋ راسىمدەرىن جەڭىلدەتەدى دەپ كۇتىلۋدە.
مەريتوكراتيا قاعيداتىن ىلگەرىلەتۋ ماسەلەسىنە كەلەر بولساق, قولدانىستاعى زاڭناماعا سايكەس, مەملەكەتتىك قىزمەتشىدەن لاۋازىمىن جوعارىلاتۋ ءۇشىن كونكۋرسقا قاتىسۋى تالاپ ەتىلەدى. بۇل رەتتە مەملەكەتتىك قىزمەتتە كونكۋرسسىز مانساپتىق ىلگەرىلەۋ تومەن تۇرعان لاۋازىمداعى ەكى جىل ەڭبەك وتىلىنەن كەيىن عانا مۇمكىن.
ءبىز مەملەكەتتىك قىزمەتشىلەردى مانساپتىق ىلگەرىلەتۋ بارىسىندا ولاردىڭ قىزمەتىنىڭ تيىمدىلىگىنە بەرىلگەن باعانى ەسەپكە الۋدى ۇسىنىپ وتىرمىز. وسىلايشا توقسان سايىنعى باعالاۋعا كوشۋ قىزمەتشى جۇمىسىنىڭ تيىمدىلىگىن ەكى جىل كۇتپەي-اق, تەزىرەك باعالاۋعا مۇمكىندىك بەرەدى. سايكەسىنشە, قاتارىنان ءتورت توقسان بويى جوعارى باعا العان قىزمەتشىلەردى تىكەلەي تاعايىنداۋمەن لاۋازىمىن جوعارىلاتۋ ۇسىنىلادى. بەلگىلى ءبىر قىزمەتشىنى كوتەرمەلەۋ ماقساتىندا باعالاۋعا فورمالدى كەلۋدى بولدىرماۋ ءۇشىن مۇنداي تاعايىنداۋ اگەنتتىكپەن كەلىسىلەدى.
وسى ايتىلعاندارمەن قاتار, مەملەكەتتىك باسقارۋدا بيۋروكراتياعا جول بەرمەۋ, ونى بولدىرماۋعا قاتىستى بىرقاتار ۇسىنىس ازىرلەندى.
– جاقىندا مەملەكەتتىك قىزمەتشىلەردىڭ ادەپ كودەكسى جاڭا رەداكتسيادا قابىلداندى. جاڭا رەداكتسياداعى ادەپ كودەكسىنىڭ بۇرىنعى نۇسقادان باستى ايىرماشىلىقتارىنا توقتالا كەتسەڭىز...
– جاڭا رەداكتسيادا قابىلدانعان مەملەكەتتىك قىزمەتشىلەردىڭ ادەپ كودەكسى قىزمەتتىك ادەپ نورمالارىن دۇرىس تۇسىنۋدە جانە قولدانۋدا ەرەكشە ماڭىزعا يە.
بىرىنشىدەن, بۇرىنعى ادەپ كودەكسىندە مەملەكەتتىك قىزمەتشىلەرگە قويىلاتىن مورالدىق-ادامگەرشىلىك تالاپتار مەن ولاردىڭ مىنەز-قۇلقىنىڭ نەگىزگى قاعيداتتارى بىرگە قارالىپ كەلگەن ەدى. ال جاڭا رەداكتسيادا بۇل ولقىلىقتار جويىلىپ, مەملەكەتتىك قىزمەتشىگە قويىلاتىن ادەپ تالاپتارى مەملەكەتتىك قىزمەتشىنىڭ قىزمەتتىك ادەبىنە قاتىسى جوق ەرەجەلەردەن بولەك, ءوز الدىنا جەكە قاراستىرىلىپ وتىر.
جاڭا ادەپ كودەكسى – ەڭ الدىمەن قىزمەتتىك ادەپ ستاندارتتارىن بەلگىلەۋگە باعىتتالعان جانە مەملەكەتتىك قىزمەتشىلەردىڭ بويىندا مورالدىق-ادامگەرشىلىك قاسيەتتەردى ورنىقتىرۋدىڭ نەگىزى.
ەكىنشىدەن, جاڭا رەداكتسيادا كودەكستىڭ قۇرىلىمى وزگەرتىلىپ, «مەملەكەتتىك قىزمەتتىڭ ادەپتىك قاعيداتتارى» دەپ اتالاتىن تاراۋ ەنگىزىلىپ وتىر. وسىعان سايكەس, مەملەكەتتىك قىزمەتشىلەردىڭ قىزمەتتىك ادەبى التى قاعيداتقا نەگىزدەلگەن. ولار – اشىقتىق, ادىلدىك, ادالدىق, سىپايىلىق, ادال نيەتتىلىك جانە كليەنتكە باعدارلانۋ. سايكەسىنشە, مەملەكەتتىك قىزمەتشىلەر مەملەكەتتىك قىزمەتتىڭ نەگىزگى تۇتىنۋشىسى سانالاتىن حالىقتىڭ تالابىنا بارىنشا يكەمدى, جۇرتشىلىقپەن جۇمىس ىستەۋگە دايىن بولۋى جانە ءوز جۇمىسىنىڭ اشىقتىعىن قامتاماسىز ەتۋى ءتيىس.
وسى قاسيەتتەر جاڭا قازاقستاننىڭ مەملەكەتتىك قىزمەتشىلەرىنىڭ بولمىسىنان كورىنىپ تۇرۋى كەرەك. بۇل ۇستانىمدار مەملەكەتتىك اپپاراتتىڭ جۇمىسىنا جاڭا مازمۇن بەرەدى دەپ كۇتىلۋدە.
ۇشىنشىدەن, ادەپ كودەكسىنىڭ جاڭا رەداكتسياسىنا ساي اگەنتتىك پەن ونىڭ اۋماقتىق ورگاندارى, قىزمەتتىك ادەپتى بۇزۋدىڭ پروفيلاكتيكاسىن ۇيلەستىرۋشى ورگاندار رەتىندە ايقىندالىپ وتىر. وسىعان بايلانىستى الداعى ۋاقىتتا ادەپ جونىندەگى ۋاكىلدەردىڭ, كوميسسيالار مەن كەڭەستەردىڭ ادەپ بۇزۋشىلىقتاردى ەسكەرتۋ جانە الدىن الۋ بويىنشا جۇمىستارى جانداندىرىلادى. نەگىزگى وزگەرىستەر – وسى.
– كەيىنگى كەزدەرى قوعامدىق وكىلدەر, ساراپشىلار تاراپىنان كادر ماسەلەسى ءجيى قوزعالىپ ءجۇر. اگەنتتىك وسى ماسەلەگە قاتىستى قانداي جۇمىستار اتقارۋدا؟
– Cۇراعىڭىز – قازىرگى وزەكتى ماسەلەلەردىڭ ءبىرى. مەملەكەت باسشىسى 2019 جىلى «پرەزيدەنتتىك جاستار كادر رەزەرۆىن» قالىپتاستىرۋ تۋرالى باستاما كوتەرگەن ەدى. سودان بەرى اگەنتتىك وسى باعىتتا جۇمىستار اتقارىپ كەلەدى.
مەملەكەتتى انىقتايتىن – ادام مەن قوعام. جاڭا قازاقستاننىڭ كادرلىق الەۋەتى مىقتى بولسا, رۋحى بيىك, تاۋەلسىزدىگى بەرىك ەل بولىپ داميتىنى كۇمانسىز.
پرەزيدەنت اتاپ وتكەندەي, «جاستار كادر رەزەرۆى – مەملەكەتتىڭ رەزەرۆى». رەزەرۆتى قالىپتاستىرۋداعى باستى ماقسات – كوكىرەگى وياۋ, كوزى اشىق جاستاردى مەملەكەتتىك باسقارۋعا تارتۋ, مەملەكەتتىك اپپارات جۇمىسىنا جاڭا سەرپىن بەرۋ.
پرەزيدەنتتىك جاستار كادر رەزەرۆى بۇگىنگى تاڭدا ءوز تيىمدىلىگىن كورسەتىپ وتىر. وسى جۇمىس قولعا الىنعاننان بەرى كادرلىق رەزەرۆكە ەكى رەت ىرىكتەۋ ءوتتى. 2019 جىلى وتكىزىلگەن ىرىكتەۋ مەملەكەتتىك, سونداي-اق كۆازيمەملەكەتتىك سەكتورعا باعىتتالعان بولسا, 2021 جىلى وتكىزىلگەن ىرىكتەۋ تەك مەملەكەتتىك قىزمەتكە باعىتتالىپ, ناتيجەسىندە رەزەرۆكە 50 ادام الىنىپ وتىر. وسى جولعى ىرىكتەۋدە ۇمىتكەرلەرگە مەملەكەتتىك ءتىلدى مىندەتتى تۇردە مەڭگەرۋ تالابى ەنگىزىلدى.
ءبىز پرەزيدەنتتىك جاستار كادر رەزەرۆىنە ءبىلىمدى, العىر, باستاماشىل, يننوۆاتسيالىق ويلاي الاتىن جاستاردى ىرىكتەۋدى تۇراقتى جولعا قويۋ ارقىلى مەملەكەتتىك قىزمەتشىلەردىڭ جاڭا بۋىنىن قالىپتاستىرۋدى باستادىق.
«اقىل – جاستان, اسىل – تاستان» دەپ بەكەر ايتپاسا كەرەك حالقىمىز. ءبىلىمدى, ەڭبەكقور, وتانعا قىزمەت ەتۋدى پارىز سانايتىن جاستار – ەلىمىزدىڭ تۇراقتى دامۋى مەن وركەندەۋىنىڭ باستى قوزعاۋشى كۇشى.
قازىرگى تاڭدا بارلىعى 350 رەزەرۆ وكىلىنەن 222 ادام ءتۇرلى سالادا قىزمەت اتقارۋدا. ولاردىڭ قاتارىندا ءبىرىنشى ىرىكتەۋدەن – 203, ەكىنشى ىرىكتەۋدەن وتكەن 19 رەزەرۆ وكىلى بار.
پرەزيدەنتتىك جاستار كادرلىق رەزەرۆىنە ۇمىتكەرلەردىڭ باستى ماقساتى جەكە مانساپتىق امبيتسيالارعا ەمەس, ەڭ الدىمەن قوعامدىق مۇددەلەرگە نەگىزدەلۋى كەرەك. كادرلىق رەزەرۆكە ەنۋدىڭ ءمانى – ۇلكەن باستىق بولۋ ەمەس, ەل يگىلىگى ءۇشىن قىزمەت اتقارۋ. وسىنداي ۇستانىممەن عانا ءبىز حالىققا ساپالى مەملەكەتتىك قىزمەت كورسەتەتىن مەملەكەتتىك باسقارۋ مەنەدجەرلەرىن قالىپتاستىرا الامىز.
بيىك ماقساتقا ۇمتىلعان, ەڭبەكقور, كرەاتيۆتى جاس بۋىن – قاشاندا ەلدىڭ ارقاسۇيەر تىرەگى. ەڭ باستىسى, ءبىز جاستارىمىزدىڭ بويىنداعى تاسقىنداعان كۇش-جىگەر مەن ءبىلىمدى ەل مۇددەسىنە قىزمەت ەتۋگە باعىتتاساق دەگەن نيەتتەمىز.
جالپى, كادرلىق الەۋەتتى ارتتىرۋ باعىتىندا ساپالى تۇرعىدان وزگەرىس قاجەت. جاڭا قازاقستاننىڭ مەملەكەتتىك كادرلارىنىڭ بويىندا ەلدىك مۇددەنى ويلايتىن, پرينتسيپشىلدىك ۇستانىمدار بولۋى كەرەك. سول ارقىلى عانا ءبىز مەملەكەتتىك باسقارۋ اپپاراتىن قالىپتاستىرۋدا ساپالى وزگەرىستەرگە قول جەتكىزەمىز. ساپالى كادردى بىزگە ەشكىم اكەلىپ بەرمەيدى, ولار – قوعامنىڭ ىشىندە. ءبىزدىڭ مىندەت – سولاردى تاۋىپ, مەملەكەتتىك اپپاراتقا تارتىپ, ىرىكتەپ الۋ ارقىلى كاسىبي مەملەكەتتىك قىزمەتكەرلەردىڭ جاڭا لەگىن قالىپتاستىرۋ.
– الداعى ۋاقىتتا پرەزيدەنتتىك جاستار كادرلىق رەزەرۆ وكىلدەرىمەن جۇمىستى ءارى قاراي ىلگەرىلەتۋ بويىنشا اگەنتتىك قانداي ءىس-شارالاردى جوسپارلاپ وتىر؟
– پرەزيدەنتتىك جاستار كادر رەزەرۆىن ىلگەرىلەتۋ ماقساتىندا مەملەكەتتىك قىزمەت ىستەرى اگەنتتىگى ءوز تاراپىنان بىرقاتار ءىس-شارانى جۇزەگە اسىرۋدا. ماسەلەن, جاقىندا رەزەرۆتى ودان ءارى جەتىلدىرۋ بويىنشا اتقارىلاتىن ءىس-شارالاردىڭ جوسپارى بەكىتىلدى. الەۋەتتى جۇمىس بەرۋشىلەردىڭ رەزەرۆشىلەرمەن ءوزارا ءىس-قيمىل راسىمدەرىن رەگلامەنتتەۋ ماقساتىندا اگەنتتىك تاراپىنان رەزەرۆشىلەردى جۇمىسقا ورنالاستىرۋ, ولاردىڭ مانساپتىق ءوسۋىن قاداعالاۋ جانە باعالاۋ ماسەلەلەرىن قامتيتىن رەزەرۆشىلەردىڭ رەكرۋتينگ الگوريتمى ازىرلەندى. سونىمەن قاتار اگەنتتىك «پجكر وفيسىمەن» بىرلەسىپ, رەزەرۆ اياسىندا جۇمىسقا ورنالاسۋ ءۇشىن رەزەرشىلەردىڭ مانساپتىق نيەت-تىلەكتەرىنىڭ كارتالارى جاسالىپ, ولار رەزەرۆشىلەردى تارتۋ بويىنشا ءتيىستى جۇمىستاردى جۇرگىزۋ ماقساتىندا مەملەكەتتىك ورگاندار مەن كۆازيمەملەكەتتىك ۇيىمدارعا جىبەرىلدى.
ۇسىنىلعان مەحانيزم بويىنشا مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرىنىڭ بوس لاۋازىمدارىنا ورنالاسۋ اگەنتتىك جىبەرگەن رەزەرۆشىلەردىڭ مانساپتىق تىلەكتەرىنە نەگىزدەلەدى. مانساپ كارتاسىن اگەنتتىك ۇنەمى جاڭارتىپ وتىرادى.
قازىر اگەنتتىك تاراپىنان مەملەكەتتىك ورگاندارمەن جانە كۆازيمەملەكەتتىك سەكتور ۇيىمدارىمەن كەزدەسۋلەردىڭ ءتيىستى كەستەسى ازىرلەندى. ياعني وسى ءساۋىر ايىنان باستاپ ءار اپتا سايىن, مەملەكەتتىك ورگاندار مەن كۆازيمەملەكەتتىك كومپانيالاردىڭ باسشىلارىمەن وتەتىن كەزدەسۋلەر كەستەسى جاساقتالدى. بۇل كەزدەسۋلەردىڭ باستى ماقساتى – مەملەكەت باسشىسىنىڭ تاپسىرمالارىن ۇتىمدى جۇزەگە اسىرۋ جولىندا جاڭا يدەيالار مەن كوزقاراستاردى توپتاستىراتىن الاڭ قۇرۋ.
اگەنتتىككە قاراستى مەملەكەتتىك باسقارۋ اكادەمياسىنىڭ كوۆوركينگ ورتالىعىندا پرەزيدەنتتىك جاستار كادر رەزەرۆىنىڭ ءوفيسى اشىلدى. وندا پرەزيدەنتتىك جاستار كادر رەزەرۆى وكىلدەرىنىڭ كەزدەسىپ, وي ءبولىسىپ, جاڭا جوبالاردى تالقىلاۋىنا, كوزقاراستارىن ورتاعا سالۋىنا مۇمكىندىكتەر جاسالعان.
– وسى ورايدا تاعى ءبىر سۇراق تۋادى. مەملەكەتتىك باسقارۋدى دامىتۋدىڭ 2030 جىلعا دەيىنگى تۇجىرىمداماسىندا مەملەكەتتىك اپپارات شتاتىن وڭتايلاندىرعاننان كەيىن كەلىسىمشارتتىق قىزمەتشىلەر ينستيتۋتىن ەنگىزۋ مىندەتى قويىلعان. وسى كەلىسىمشارتتىق قىزمەتشىلەر ينستيتۋتى جايلى ايتا كەتسەڭىز.
– ءوزىڭىز ايتىپ وتىرعان تۇجىرىمداماعا سايكەس, ۇلتتىق, سالالىق جانە وزگە دە جوبالاردى ىسكە اسىرۋ كەزەڭىنە ارنايى ءبىلىمى بار كاسىبي مامانداردى تارتۋعا مۇمكىندىك بەرەتىن كەلىسىمشارتتىق قىزمەتشىلەر ينستيتۋتىن ەنگىزۋ جوسپارلانىپ وتىر.
مەملەكەتتىك ورگاندارداعى كەلىسىمشارتتىق قىزمەتشىلەر مەملەكەتتىك قىزمەتشىلەر بولىپ سانالمايدى. الايدا كەلىسىمشارتقا سايكەس ولارعا ناقتى مىندەتتەردى شەشۋدە بەلگىلى ءبىر قۇزىرەتتەر بەرىلەدى. كەلىسىمشارتتىق قىزمەتشىلەردىڭ قىزمەتى مەن مىندەتتەرى ءبىر جىلدىق مەرزىمگە جاسالاتىن ەڭبەك شارتىندا ايقىندالادى.
كەلىسىمشارتتىق قىزمەتشىلەر ەلىمىزدىڭ زاڭناماسىندا بۇرىن جوق جاڭا لاۋازىمدىق سانات بولعاندىقتان, ونى زاڭنامالىق تۇرعىدان ەنگىزۋ بويىنشا ءتيىستى ءىس-قيمىل جوسپارى ازىرلەندى. بۇل باعىتتاعى جۇمىستى 2023 جىلى اياقتاۋدى جوسپارلاپ وتىرمىز.
كەلىسىمشارتتىق قىزمەتشىلەردى تارتۋ بىرقاتار مىندەتتى شەشۋگە ىقپال ەتەدى دەپ كۇتىلەدى. اتاپ ايتساق, مەملەكەتتىك باستامالار مەن سالالىق جوبالاردى تابىستى ىسكە اسىرۋدى; ناقتى سالادا, ەكونوميكا سەگمەنتىندە, الەۋمەتتىك سالادا بىرەگەي, تابىستى, وزىندىك تاجىريبەنى تاراتۋ جانە ەنگىزۋدى; جاڭا تەحنولوگيالار ترانسفەرتىن قامتاماسىز ەتۋدى; يننوۆاتسيالىق ويلاۋدى دامىتۋدى; مەملەكەتتىك باستامالار مەن سالالىق جوبالاردى ىسكە اسىرۋ كەزىندە پراكتيكالىق ءوزارا ءىس-قيمىل ارقىلى مەملەكەتتىك قىزمەتشىلەردىڭ بىلىكتىلىگىن ارتتىرۋدى; مەملەكەتتىك اپپاراتتى باسقارۋدىڭ يكەمدى مودەلىن دامىتۋدى رەتتەي الادى.
كەلىسىمشارتتىق قىزمەتشىلەردى تارتۋ جوباسىن جۇزەگە اسىرۋ قويىلعان ماقساتتارعا قول جەتكىزۋ بارىسىندا جاڭا جاعدايلارعا جەڭىل بەيىمدەلۋگە جانە مەملەكەتتىك قىزمەت سالاسىندا يكەمدى كادر ساياساتىن جۇرگىزۋگە مۇمكىندىك بەرەدى دەپ وتىرمىز.
– مازمۇندى اڭگىمەڭىزگە راحمەت.
اڭگىمەلەسكەن
ورىنبەك وتەمۇرات,
«Egemen Qazaqstan»
