كوپشىلىگى پىكىرىندە بۇل قارىم-قاتىناسقا كوڭىلى تولاتىنىن بىلدىرسە, ءبىرازى بىردەن ىسكە كوشىپ, كوكەيدە جۇرگەن كوپتەگەن ماسەلەنى قوزعاعان. وسى قالدىرعان جازبالاردى وقىپ شىعار بولساڭىز, قوعامعا قىزمەت قىلامىن دەگەن قۇزىرلى ورگانداردىڭ باسشىلارىنا بارلىق ماسەلە اشىق, ايقىن كورىنىپ تۇر. بۇقارا حالىقتى بۇرىننان مازالاپ كەلە جاتقان ماسەلەگە مويىن بۇرۋ عانا قالعانداي... بىراق ءبىزدىڭ اتقارۋشى بيلىك الدىنداعى ءىستى ادامعا جاعامىن دەپ ەمەس, جوعارىداعى اعا-كوكەسىنىڭ ايتقانىمەن عانا ىستەيتىنىنە ۇيرەنىپ قالعاندايمىز. ءسىرا, سولاردان بۇيرىق كەلمەيىنشە, قوزعالماس دەگەن سەنىمسىزدىك بويدى بيلەي بەرەدى.
پرەمەر پاراقشاسىنداعى كوممەنتاريلەردە كوتەرىلگەن ماسەلەلەردىڭ قايسىسى الداعى ۋاقىتتا جوعارىنىڭ نۇسقاۋىنسىز جەدەل شەشىمىن تابار ەكەن؟..
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ء«بىز كەز كەلگەن ماسەلەنى اشىق ايتىپ, ونى شەشۋدىڭ وڭتايلى جولدارىن بىرگە ىزدەۋىمىز كەرەك. ەكونوميكاداعى, ساياساتتاعى جاساندى مونوپوليالاردى تۇبىرىمەن جويۋعا ءتيىسپىز. ونىڭ ورنىنا اشىق ءارى ءادىل باسەكە ورناتۋ وتە ماڭىزدى. سەبەبى ناعىز باسەكە بولعاندا عانا حالىقتىڭ ءال-اۋقاتى ارتىپ, جاعدايى جاقسارادى» دەدى.
پرەزيدەنت پايىمى بيلىك تارماقتارىنا پارمەن بولۋعا ءتيىس.
وسى ورايدا مينيسترلەر كابينەتىنىڭ مۇشەلەرى اراسىندا الەۋمەتتىك جەلىنى جان-جاقتى قولدانىپ جۇرگەن ۆەدومستۆو باسشىلارىن كوزىقاراقتى جۇرت بىلەدى. ونى حالىقپەن اراداعى ءتيىمدى قاتىناس قۇرالى رەتىندە نەمەسە جەكە باسىنىڭ جارناماسى رەتىندە پايدالاناتىنداردى دا جاقسى بىلەدى دەپ ويلايمىز. قازىر الەۋمەتتىك جەلىنىڭ ءارتۇرلى مۇمكىندىگى جەتەرلىك. سوندىقتان سمارتفونىن سيپالاماسا جۇرە الماۋ الدەكىمدەرگە پوپۋليستىك سيپات تا دارىتاتىنى جاسىرىن ەمەس. كەيبىر جەلىنى بەلسەندى قولدانۋشى لاۋازىم يەلەرىن وپپونەنتتەرى وسى تۇرعىدا سىناپ تا جۇرگەنىن بايقايمىز.
ۇكىمەت مۇشەلەرىنىڭ اراسىندا الەۋمەتتىك جەلىدەگى ەڭ بەلسەندىسى ءبىلىم جانە عىلىم ءمينيسترى اسحات ايماعامبەتوۆ بولار, بالكىم. البەتتە, بۇل رەسپۋبليكاداعى ەڭ اۋقىمدى سالانىڭ ءبىرى بولعاندىقتان, جاڭالىق تا, وزگەرىس تە, ماسەلە دە جەتەرلىك. دەسە دە ۆەدومستۆو باسشىسىنىڭ ءبىلىم وشاقتارىندا بولعان كەلەڭسىز جاعدايلارعا دەر كەزىندە ءۇن قوسىپ, ۇنەمى قاجەتتى اقپاراتتى بەرىپ وتىرعانى –باسقا مينيسترلەرگە ۇيرەنەرلىك ۇلگى.
بۇل بەلسەندىلىك سالانىڭ ەرەكشەلىگىنە دە بايلانىستى بولۋى ىقتيمال. ويتكەنى جاراتىلىستانۋ سالالارىنداعى باسشىلار جەكە پاراقشا جۇرگىزۋگە گرامماتيكالىق جانە ستيليستيكالىق ساۋاتتىلىعىنىڭ جەتە بەرمەۋىنە بايلانىستى قىسىلۋى دا مۇمكىن. بىراق مۇنى اقپاراتقا مۇقتاج اۋديتوريا اقتامايدى. ويتكەنى قازىر كوممۋنيكاتسيانىڭ زامانى. مۇنىڭ سوعىس جاعدايىندا دا ماڭىزى زور ەكەنىن اينالاداعى گەوساياسي جاعدايلار اڭعارتتى. ءتىپتى قازىر الەۋمەتتىك جەلىدە تىكەلەي ءوزى وتىراتىن پرەزيدەنتتەر مەن ءباسپاسوز حاتشىسى ءسوزىن تاپسىرلەپ وتىراتىن پرەزيدەنتتەردىڭ اراسىنداعى اراسالماقتىڭ ءوزى الشاقتاپ بارا جاتقانىن اڭداۋعا بولادى.
ال ەلىمىزدەگى اتقا مىنگەن اكىمدەردىڭ ءبارى الەۋمەتتىك جەلىنى ءجيى قولدانىپ ءجۇر مە؟ ءيا, بەلگىلى دەڭگەيدە قولدانىپ ءجۇر. بىراق وسى اكىمدەردىڭ جۇمىسىنداعى شيكىلىك تۋرالى ءسوز قوزعاساڭىز سىزگە شۇيلىگە كەتەتىندەر – اقتاۋشىلار ارمياسى قاپتايتىنىنا كۋا بولىپ ءجۇرمىز. بۇل پرەزيدەنتتىڭ حالىققا جولداۋىندا ايتقان جاساندى مونوپوليانىڭ ءبىر ءتۇرى عوي جانە ونى ورىنداۋ اكىمدىككە باعىنىستى مەكەمەلەر مەن ۇيىمداردىڭ قىزمەتكەرلەرىنە جۇكتەلەتىنى دە جاسىرىن ەمەس. مۇنداي مانيپۋلياتسيادان ارىلماساق, جاڭا قازاقستاندى جاماندى جاسىرىپ, كورەر كوزگە كورىنىپ تۇرعانعا كوز جۇما قاراپ قۇرا المايتىنىمىز تاعى دا انىق.
تاعى ءبىر ماسەلە, مەرزىمدى جانە ەلەكتروندى باسپاسوزدە جارىق كورگەن جانايقاي جاريالانىمداردى جورتا ەلەمەگەنى سىقىلدى الەۋمەتتىك جەلىدەگى اڭگىمەدەن دە ءارى اينالىپ وتكىسى كەلەتىن اكىمدەر بار. بۇقارالىق ءباسپاسوزدىڭ قۋاتتى قۇرالىنا اينالعان الەۋمەتتىك جەلىمەن جۇمىس ىستەۋ – الەۋمەتتىڭ ۇنىنە قۇلاق اسۋ. ەستيتىن ۇكىمەتتى قالىپتاستىراتىن تەتىك – وسى. مىنە, وسى ماسەلەلەردىڭ ءبارى مەملەكەتتىك باسقارۋ ىسىندەگى جاڭا قۇرىلىمدىق رەفورمالاردىڭ باستاۋى بولۋعا ءتيىس.
