«عىلىم مەن بىلىمدەگى تۇلعالار: ءداستۇر جانە ساباقتاستىق» اتتى كونفەرەنتسيادا ءسوز العان ەل پرەزيدەنتىنىڭ كەڭەسشىسى, ۇعا اكادەميگى باۋىرجان وماروۆ ءوز سالاسىندا بيىككە كوتەرىلگەن تۇعىرلى تۇلعالاردى ارداقتاۋ ارقىلى ءداستۇرىمىزدى دامىتاتىنىمىزدى ايتتى.
«مۇنداي حالىقارالىق دەڭگەيدە كونفەرەنتسيا ۇيىمداستىرۋ – وتكەنىمىزدى ۇمىتپاۋدىڭ, بۇگىنىمىزدى ۇلىقتاۋدىڭ بەلگىسى. سەرىك قيراباەۆ پەن ءاليا بەيسەنوۆا – بىرىنشىدەن, عىلىمداعى ىرگەلى ىزدەنىس پەن ەڭبەكتىڭ سيمۆولى. ەكىنشىدەن, ولار – تاڭداعان تاقىرىبىن ءجىتى زەرتتەپ, شىرقاۋ شىڭداردى باعىندىرعان تۇلعالار. ۇشىنشىدەن, ەلگە بەلگىلى ەگىز ادام, ياعني ادەبيەتتانۋ مەن گەوگرافيا عىلىمدارىنىڭ كوشباسشىلارىنا اينالعان جاندار. تورتىنشىدەن, سوڭىنا ەرتكەن ونەگەلى شاكىرتتەرى بار, عىلىمي مەكتەبى قالىپتاسقان ۇلاعاتتى ۇستازدار. بەسىنشىدەن, تانىمى جوعارى زيالىلار, ۇلت مۇددەسىن ۇلىقتاۋشىلار. التىنشىدان, ەلگە سۇيكىمى بولعان سىيلى قاريا مارتەبەسىن يەلەنگەن ارداقتىلار. جەتىنشىدەن, ەكى جاقسىنىڭ ءبىر-ءبىرىن تاۋىپ قوسىلعانىنىڭ ۇلگىسىن كورسەتكەن كىسىلەر. سوندىقتان كونفەرەنتسيانىڭ كوتەرەتىن جۇگى سالماقتى دەپ سەنىممەن ايتا الامىن», دەدى ب.وماروۆ.
م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, ۇعا كوررەسپوندەنت-مۇشەسى كەنجەحان ماتىجانوۆ ءوز كەزەگىندە اكادەميكتەردىڭ مەرەيتويلارىنا ارنالعان ءىس-شارالاردىڭ الماتى شاھارىنان باستاۋ الىپ, ءالى دە جالعاسىپ جاتقانىن جەتكىزدى. سونداي-اق ول س.قيراباەۆتىڭ وزىنە ۇستاز بولعانىن, ءدارىستى جاتقا ايتاتىنىن, قازاق پوەزياسىنداعى سوناۋ بۇقار جىراۋدان باستاپ قاسىم امانجولوۆقا دەيىنگى ولەڭدەردىڭ بارىنەن مۇدىرمەي مىسال كەلتىرىپ وتىراتىنىن تەبىرەنىسپەن ەسكە الدى.
كونفەرەنتسيادا وتاندىق جانە شەتەلدىك عالىمدار س.قيراباەۆ پەن ءا.بەيسەنوۆانىڭ عىلىم جولىنا قاتىستى باياندامالار جاسادى. جانە جيىن سوڭىندا كونفەرەنتسياعا قاتىسۋشىلار ا.بايتۇرسىن ۇلى اتىنداعى №48 مەكتەپ-ليتسەيىنە بارىپ, «اكادەميك ءا.بەيسەنوۆا سىنىبىنىڭ» اشىلۋ سالتاناتىنا قاتىستى.
