ۋكرايناداعى قارۋلى قاقتىعىس باستالعالى ءبىر ايدان استى. وسىعان دەيىن بىرنەشە كەزدەسۋ وتكىزگەنىمەن, تاراپتار ورتاق كەلىسىمگە كەلمەدى. ەكى مەملەكەت باسشىلارى كەزدەسپەي, ماسەلە شەشىلمەس دەگەن دە پىكىرلەر ايتىلۋدا. الايدا رەسەيدىڭ سىرتقى ىستەر ءمينيسترى س.لاۆروۆ پرەزيدەنتتەر – ۆلاديمير پۋتين مەن ۆولوديمير زەلەنسكيدىڭ كەزدەسۋى ءدال قازىر ءتيىمدى ناتيجە بەرمەيدى دەگەن پىكىر ءبىلدىردى. سەربيالىق باق-قا پىكىر بىلدىرگەن س.لاۆروۆ ەكى كوشباسشى اراسىنداعى كەزدەسۋ تەك ەكى تاراپ نەگىزگى ماسەلەلەرگە قاتىستى ورتاق شەشىمگە كەلە باستاعاندا عانا ءوتۋى كەرەك دەيدى. ول الداعى ۋاقىتتا ءوتۋى مۇمكىن ۋكراينا مەن رەسەي اراسىنداعى كەلىسسوزدەردىڭ جەمىستى بولعانىن قالايتىنىن جەتكىزدى.
جاقىندا رەسەي مەن تۇركيا پرەزيدەنتتەرى ەكى جاقتىڭ دەلەگاتسيالارىنىڭ كەلەسى كەزدەسۋىن ىستانبۇلدا وتكىزۋگە كەلىسكەنى بەلگىلى بولدى. مەملەكەتتەر باسشىلارى تەلەفون ارقىلى سويلەسىپ, رەسەي-ۋكراينا قاقتىعىسىن تالقىلاعان. «اڭگىمە بارىسىندا پرەزيدەنت ر.ەردوعان اتىستى توقتاتۋ, سونداي-اق رەسەي مەن ۋكراينا اراسىندا تەز ارادا بەيبىتشىلىك ورناتۋ مەن ايماقتاعى گۋمانيتارلىق جاعدايدى جاقسارتۋ قاجەتتىلىگىن اتاپ ءوتتى», دەلىنگەن تۇركيا پرەزيدەنتىنىڭ اكىمشىلىگى تاراتقان اقپاراتتا. مالىمدەمەدە تۇركيا جاعدايدى رەتتەۋگە تولىعىمەن ىقپال ەتۋگە دايىن ەكەنى باسا ايتىلعان.
رەسەي دەلەگاتسياسىنىڭ باسشىسى ۆلاديمير مەدينسكي كەزدەسۋ 29-30 ناۋرىزدا وتەتىنىن حابارلاعان.
ۋكراينا پرەزيدەنتى ۆولوديمير زەلەنسكي رەسەيمەن كەلىسسوزدەردىڭ كەلەسى كەزەڭىندە باسىمدىق ەلدىڭ ەگەمەندىگى مەن اۋماقتىق تۇتاستىعىنا بەرىلەتىنىن مالىمدەدى. ۆ.زەلەنسكي ۋكراينانىڭ يادرولىق قارۋسىز جانە بەيتاراپتىق مارتەبەسىن, قاۋىپسىزدىك كەپىلدىكتەرىن تالقىلاۋعا دايىن دەدى. الايدا كەلىسىم ءسوز جۇزىندە ەمەس, ناقتى بەكىتىلگەن قۇجات بولۋى كەرەك دەيدى ۋكراينا باسشىسى.
ۋكراينادا ماريۋپول سەكىلدى قورشاۋدا قالعان قالالاردىڭ, شابۋىلدان قورعانۋ ءۇشىن جەرتولەلەردى پانالاعان تۇرعىنداردىڭ جاعدايى قيىن ەكەنى ايتىلۋدا. الايدا دۇيسەنبىدە قورشالعان قالالاردان بەيبىت تۇرعىنداردى ەۆاكۋاتسيالاۋ ءۇشىن گۋمانيتارلىق دالىزدەر اشىلمايتىنى حابارلاندى. ۋكراينانىڭ ۆيتسە-پرەمەرى يرينا ۆەرەششۋك بۇل شەشىم دالىزدەردىڭ قاۋىپسىزدىگىن قامتاماسىز ەتۋ مۇمكىن بولماعاندىقتان قابىلدانعانىن ايتتى. رەسەي اسكەرىنىڭ شابۋىلى بەيبىت تۇرعىنداردى قورشاۋعا الىنعان قالالاردان ەۆاكۋاتسيالاۋعا كەدەرگى كەلتىرىپ, بۇل پروتسەستى حاوسقا اينالدىرعان. ماريۋپول مەرى ۆاديم بويچەنكو قالا گۋمانيتارلىق اپاتتىڭ الدىندا تۇرعانىن جانە ونى تولىعىمەن ەۆاكۋاتسيالاۋ كەرەك ەكەنىن ەسكەرتتى. قالادا 160 مىڭعا جۋىق بەيبىت تۇرعىن ەلەكتر جارىعىنسىز قالعان.
حالىقارالىق قىزىل كرەست كوميتەتى دە قورشاۋدا قالعان ماريۋپولگە جەتە الماي جاتقانىن مالىمدەدى. ۇيىم مۇشەلەرى ول ءۇشىن رەسەي مەن ۋكراينا تاراپى قاۋىپسىزدىككە كەپىلدىك بەرۋى كەرەك دەيدى. الايدا بۇل مۇمكىن بولماي تۇرعانعا ۇقسايدى.
بۇۇ وسى ۋاقىتقا دەيىن كەم دەگەندە 1 100 بەيبىت تۇرعىن قازا بولدى جانە 10 ميلليوننان استام ادام كوشىرىلدى دەگەن دەرەك جاريالادى. ۋكراينا رەسەيدى ماريۋپول قالاسىنان مىڭداعان بەيبىت تۇرعىندى كۇشتەپ كوشىردى دەپ ايىپتاپ وتىر. رەسەي ءماريۋپولدىڭ شىعىسىنداعى بەزىمياننىيداعى ۋاقىتشا لاگەردە 5 000-عا جۋىق ادامدى ورنالاستىرادى دەپ حابارلادى.
ال رەسەي فەدەراتسياسىنىڭ قورعانىس باسقارماسى ۇلتتىق ورتالىعىنىڭ باستىعى, گەنەرال-پولكوۆنيك ميحايل ميزينتسەۆ ءبىر تاۋلىك ىشىندە ۋكراينادان رەسەيگە 19 694 بەيبىت تۇرعىن ەۆاكۋاتسيالاندى دەپ حابارلادى. ونىڭ ايتۋىنشا, رەسەي اۋە كۇشتەرى قاۋىپسىزدىك شارالارىن ساقتاي وتىرىپ كۇن سايىن بەيبىت تۇرعىندار مەن شەتەلدىك ازاماتتاردىڭ ءومىرىن ساقتاعان. م.ميزينتسەۆ ارنايى وپەراتسيا باستالعاننان بەرى رەسەيگە 439 420 ادام ەۆاكۋاتسيالاعانىن, ولاردىڭ 91 673-ءى بالالار ەكەنىن, رف مەملەكەتتىك شەكاراسىنان 51 638 جەكە اۆتوكولىك وتكەنىن ايتتى.
ۋكراينا مەن رەسەيدىڭ تاراتقان اقپاراتتارداعى الشاقتىقتى وسىعان دەيىن ايتقانبىز. سوندىقتان بۇل سانداردى ناقتى راستاۋ مۇمكىن ەمەس. وسىعان دەيىن بەلارۋس اۋماعىندا, كەيىن ونلاين وتكەن كەلىسسوزدەر ايتارلىقتاي ناتيجە بەرمەگەنى بەلگىلى. ەندىگى كەزەك – تۇركيا استاناسىندا. كەزەكتى كەلىسسوزدىڭ ناتيجەسى قانداي بولاتىنىن ۋاقىت كورسەتەدى.
