ايماقتار • 25 ناۋرىز، 2022

ادىلەت ءمينيسترى قانات مۋسين الماتى تۇرعىندارىمەن كەزدەستى

بۇل جيىنعا بەلسەندىلەر، ساراپشىلار مەن قوعامدىق كەڭەس مۇشەلەرى دە قاتىستى. قانات مۋسين پرەزيدەنتتىڭ قازاقستان حالقىنا جولداۋى اياسىندا جاريالاعان رەفورمالاردىڭ ماڭىزدىلىعىنا توقتالدى، دەپ حابارلايدى Egemen.kz

ەلۆيرا سەرىكقىزى

«شىن مانىندە، بۇل جاڭا قازاقستاندى قۇرۋ كەزەڭىنىڭ باسى. باستامالاردىڭ اۋقىمى مەن مازمۇنى اۋقىمدى، وعان تومەندەگى تسيفرلار دالەل. ءبىر عانا كونستيتۋتسيانىڭ وزىندە 30-دان استام باپقا وزگەرتۋلەر ەنگىزۋ كەرەك. سونىمەن قاتار 7 كونستيتۋتسيالىق زاڭ مەن 15-تەن استام زاڭعا وزگەرىستەر ەنگىزۋ جوسپارلانۋدا.

مينيستر سونىمەن بىرگە ساياسي رەفورمالاردىڭ نەگىزگى باعىتتارىنا توقتالدى: پرەزيدەنتتىڭ وكىلەتتىلىگىن شەكتەۋ; سايلاۋ پروتسەسىن جاڭعىرتۋ; ساياسي پارتيالاردى تىركەۋ ءتارتىبىن جەڭىلدەتۋ; سوت جانە قۇقىق قورعاۋ جۇيەسىن جەتىلدىرۋ; ازاماتتاردىڭ نەگىزگى قۇقىقتارىن قورعاۋ، ازاماتتىق قوعام ينستيتۋتتارى مەن بۇقارالىق اقپارات قۇرالدارىنىڭ ءرولىن كۇشەيتۋ. كەزدەسۋىمىز اياسىندا اتا-بابامىزدىڭ دەموكراتيالىق ءداستۇرىنىڭ جاڭعىرۋىن اتاپ وتۋگە بولادى – جۇرتشىلىق الدىندا تالقىلاپ، ماڭىزدى شەشىمدەر قابىلداۋ. وسىعان وراي، قوعامدىق ديالوگتىڭ ءبىرتۇتاس ۇلگىسىن قالىپتاستىراتىن، بيلىك پەن حالىق اراسىنداعى ءوزارا ءىس-قيمىلدى كۇشەيتەتىن «ۇلتتىق قۇرىلتاي» قۇرىلادى»، دەپ اتاپ ءوتتى قانات مۋسين.

بۇل رەتتە جۇمىس ىستەپ تۇرعان بارلىق قوعامدىق كەڭەستەردىڭ قىزمەتى جۇيەلەنىپ، ولاردىڭ مۇشەلەرى ۇلتتىق قۇرىلتايدىڭ قۇرامىنا ەنەتىن بولادى. بۇل شارالار ازاماتتىق قوعام ينستيتۋتتارىنىڭ ءرولىن كۇشەيتۋگە باعىتتالعان.

ءمينيستردىڭ ايتۋىنشا، پرەزيدەنتتىڭ ۇسىنىستارىن جۇزەگە اسىرۋ ءۇشىن اتقارىلاتىن جۇمىس كوپ. ءوز كەزەگىندە ادىلەت مينيسترلىگى جولداۋدى ىسكە اسىرۋ ۇشىن نورماتيۆتىك قۇقىقتىق تاراپتان قامتاماسىز ەتەدى.

كەزدەسۋ بارىسىندا مينيستر حالىقتى، قوعام بەلسەندىلەرىن مازالاعان ساۋالدارعا جاۋاپ بەردى. ونىڭ ىشىندە ساياسي پارتيالاردى، مەنشىك يەلەرىنىڭ بىرلەستىگىن، تاۋارلىق بەلگىنى تىركەۋ، حالىقتىڭ قۇقىقتىق ساۋاتتىلىعىن كوتەرۋ، جەكە ازاماتتاردى بانكروت دەپ تانۋعا باعىتتالعان زاڭ جوباسى، نوتاريۋستار كورسەتەتىن قىزمەتتىڭ ساپاسى، سونىمەن قاتار، زاڭ ماماندىقتارى بويىنشا كاسىبي كادرلاردى دايارلاۋ باعىتىندا سۇراقتار قويىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز