ۇكىمەتتىڭ ءباسپاسوز قىزمەتى تاراتقان مالىمەتكە سەنسەك, كەڭەسكە قاتىسۋشىلار ساۋدا سالاسىنداعى تەحنيكالىق رەتتەۋ شارالارىن تالقىلاعان.
اتاپ ايتقاندا, بيزنەس-قاۋىمداستىق وكىلدەرى يمپورتتالاتىن تاۋارلارعا قاتىستى مەملەكەتتىك تىلدەگى ەتيكەتكالار مەن قوسىمشالاردى بەكىتۋ جونىندەگى زاڭناما تالاپتارىن ۋاقىتشا الىپ تاستاۋدى ۇسىندى. وتىرىسقا قاتىسۋشىلاردىڭ ايتۋىنشا, مۇنداي شەشىمدى قابىلداۋ ەتيكەتكالاردى ازىرلەۋگە, ولاردى كوبەيتۋگە جانە بەكىتۋگە قاتىستى بيزنەس شىعىندارىن ايتارلىقتاي ازايتۋعا مۇمكىندىك بەرەدى. وعان بالاما رەتىندە سورەلەردە تاۋارلار تۋرالى بارلىق قاجەتتى اقپاراتتى قامتيتىن تاۋارلىق QR-كودتاردى ۋاقىتشا پايدالانۋ ۇسىنىلدى.
ءوز ۇسىنىسىندا بيزنەس-قاۋىمداستىق وكىلدەرى مەملەكەت باسشىسىنا داعدارىستىق جاعدايلار كەزەڭىندە, ونىڭ ىشىندە مەملەكەتتىك باقىلاۋ, حالىقارالىق مىندەتتەمەلەردى ساقتاۋ شەڭبەرىندە جانە ت. ب. رەتتەۋدىڭ وزگە دە ءتارتىبىن بەلگىلەيتىن تاپسىرمالار جۇكتەۋگە نەمەسە اكتىلەر قابىلداۋعا مۇمكىندىك بەرەتىن پرەزيدەنتتىڭ 2020 جىلعى 20 ناۋرىزداعى №286 جارلىعىنىڭ ەرەجەلەرىن باسشىلىققا الدى.
پرەمەر-مينيستر وتاندىق بيزنەس وكىلدەرىنىڭ باستاماسىن قولداپ, قازاقستان رەسپۋبليكاسى پرەزيدەنتىنىڭ ءتيىستى جارلىعىنىڭ جوباسىن دايىنداۋدى, سونداي-اق ونى وسى اپتانىڭ سوڭىنا دەيىن مەملەكەت باسشىسىنىڭ قاراۋىنا ەنگىزۋدى تاپسىردى.
جەدەل شتابتىڭ كەلەسى وتىرىسى 24 ناۋرىزدا وتەدى.
