دەمەك قانداي جاعداي بولسىن, بارلىق ماسەلە كونستيتۋتسيالىق قۇقىقتار پرينتسيپىندە, زاڭ اياسىندا شەشىلۋ كەرەك. مەملەكەت باسشىسى وكىلەتتىلىگىن اسىرا پايدالانعان قۇقىق قورعاۋ قىزمەتكەرلەرىنىڭ ارەكەتىن ايىپتاعانىمەن, سىن ساعاتتا ەل قورعاعان پوليتسيا قىزمەتكەرلەرى مەن اسكەري قىزمەتكەرلەردىڭ ەرلىگىن ەسكەرىپ, وتان قورعاۋشىلار قۇقىقتارىنىڭ ساقتالۋىنا ەرەكشە توقتالدى. «ورگاندا قىزمەت ەتەتىن ازاماتتار دا ءوز باۋىرلارىمىز. ولار ەلمەن بىرگە ەكەنىن, تۋعان حالقى ءۇشىن قاسىق قانى قالعانشا كۇرەسەتىنىن دالەلدەدى. وتان الدىنداعى انتىنا ادال بولىپ, مەملەكەتىمىزدى جانقيارلىقپەن قورعادى. مەن سىن ساعاتتا قاتەرگە قايمىقپاي قارسى تۇرعان ءتارتىپ ساقشىلارىنا ريزاشىلىق بىلدىرەمىن», دەدى پرەزيدەنت.
ايتىپ ءوتۋ كەرەك, ۇلتتىق ۇلان جاۋىنگەرلەرى قاسىرەتتى قاڭتار وقيعاسى كەزىندە ەلىمىزدىڭ كونستيتۋتسيالىق قۇرىلىمىن, تۇراقتىلىعى مەن تىنىشتىعىن قورعادى, ازاماتتاردىڭ زاڭدى قۇقىقتارىن قامتاماسىز ەتۋگە اتسالىستى. الماتى, شىمكەنت قالالارىندا جانە باسقا دا وبلىس ورتالىقتارىندا قۇقىقتىق ءتارتىپتى قامتاماسىز ەتۋدە بۇزاقى توپپەن قارسىلاسۋدىڭ ناتيجەسىندە, جاراقات العان ۇلتتىق ۇلان اسكەري قىزمەتشىلەرىنىڭ سانى 400-گە جەتتى. بۇدان بولەك, جاپپاي تارتىپسىزدىك كەزىندە ۇلتتىق ۇلاننىڭ 90-نان اسا اسكەري تەحنيكاسى زارداپ شەكتى. ناتيجەسىندە, ەل باسشىلىعى دا, قۇقىقتىق ءتارتىپ اسكەرى دە ۇلكەن «كۇشكە» قارسى تۇردى.
«سوڭعى جىلدارى ءبىز قازاقستاندى تۇبەگەيلى جاڭعىرتۋعا, ترانسفورماتسيالاۋعا كوشتىك. ءتۇرلى سالادا اۋقىمدى وزگەرىستەر باستالدى. بۇل كەيبىر ىقپالدى ادامدارعا ۇنامادى. ولار جىلدار بويعى زاڭسىز ارەكەتتەرىن ودان ءارى جالعاستىرا بەرۋدى كوزدەدى. نەعۇرلىم جوعارى بيلىككە يە بولۋدى كوكسەدى. سول ءۇشىن كانىگى قىلمىسكەرلەر, قارۋلى زاڭسىز ۇيىمدار مەن وپاسىز شەنەۋنىكتەر بىرىگىپ, استىرتىن توپ قۇردى», دەدى مەملەكەت باسشىسى. پرەزيدەنتتىڭ توڭكەرىس ۇيىمداستىرۋشىلاردى وسىلاي سيپاتتاۋىنان قۇزىرلى ورگاندار مەن اسكەر قانداي الپاۋىت قاۋىپ-قاتەرمەن بەتپە-بەت كەلگەنىن تۇسىنۋگە بولادى.
سونداي-اق «ىشكى جانە سىرتقى جاۋلارىمىز ءوزارا ىمىرالاسىپ, بيلىكتى باسىپ العىسى كەلدى. ولار حالىقتىڭ نارازىلىق شەرۋىن باسقا ارناعا بۇرىپ, جۇرتتى قاساقانا ارانداتتى. لاڭكەستەر مەملەكەتتىك ورگاندارعا, ستراتەگيالىق نىساندار مەن بيزنەسكە تيەسىلى عيماراتتارعا شابۋىل جاسادى. بيلىككە كۇيە جاعۋ ءۇشىن بەيبىت تۇرعىندارعا وق اتتى», دەدى ەل پرەزيدەنتى.
ءبىر ايتارىم, ۇلاندىق جاۋىنگەرلەر وزدەرىنىڭ مىندەتتەرىنە, بەرگەن اسكەري انتتارىنا ادال بولدى. «بۇيرىقتىڭ اتى – بۇيرىق» دەپ ب ۇلىكشىلەرگە جول بەرمەگەن وفيتسەر ۇلان مىرزاباەۆ تا, جاس ومىرلەرىن بەيبىت ءومىر جولىندا قيعان قاتارداعى ماديار قايساروۆ پەن ايبات امانوۆ تا ءوز ەرلىكتەرىمەن ء«ار ءتۇرلى كوزقاراس – ءبىرتۇتاس ۇلت» قاعيداتىن بەرىك ۇستانۋعا ءتيىس بولاشاق جاڭا قازاقستاننىڭ ىرگەتاسىن قالادى. ءبىز وتكەننەن ساباق الىپ, بۇكىل ەل بولىپ, تاۋەلسىزدىكتىڭ قادىر-قاسيەتىن جان-جۇرەگىمىزبەن سەزىنۋگە, تاتۋلىق پەن تۇراقتىلىق, تىنىشتىق پەن بەيبىتشىلىك قانشالىقتى ماڭىزدى ەكەنىن جەتە تۇسىنۋگە ءتيىسپىز. قازاقستان پرەزيدەنتى ايتقانداي: «قازىر ساياسي بارريكادالار ورناتىپ, ءار ماسەلەگە بولا ميتينگ وتكىزەتىن, كۇماندى شەشىمدەرگە يتەرمەلەپ, ءجونسىز تالاپ قوياتىن, مىندەتىن ورىنداپ جۇرگەن پوليتسيا قىزمەتكەرلەرىنىڭ جاعاسىنا جارماساتىن ۋاقىت ەمەس». قازىر تاۋەلسىزدىگىمىز بەن كونستيتۋتسيالىق قۇرىلىمىمىزدى نىعايتاتىن ۋاقىت.
قارۋلى كۇشتەرىمىزدىڭ جوعارعى باس قولباسشىسى قاسىم-جومارت كەمەل ۇلى توقاەۆ ەلوردالىق جەدەل بريگاداعا بارعان العاش ساپارىندا ۇلتتىق ۇلانعا «ناعىز ەرلىك پەن پاتريوتيزم مەكتەبى» دەگەن باعا بەرگەن بولاتىن. ءوز كەزەگىندە ۇلتتىق ۇلان اسكەرى ماڭگى ساقشى ىسپەتتى وزىنە جۇكتەلگەن مىندەتتەرگە ساي قۇقىقتىق ءتارتىپتى ءارى قاراي دا قامتاماسىز ەتەتىنىنە سەندىرگىم كەلەدى.
الىبەك سەراليەۆ,
گەنەرال-مايور,
قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى
