7-11-سىنىپ وقۋشىلارى مەن جوو ستۋدەنتتەرى اراسىندا TECHNO CUP VI! اتتى رەسپۋبليكالىق پىكىرسايىس ءتۋرنيرى ءوتتى. وعان ىرىكتەۋ كەزەڭىنەن وتكەن 400 پىكىرسايىسشى قاتىستى. ولاردىڭ اراسىندا ەلىمىزدىڭ ءار وڭىرىنەن جانە رەسپۋبليكالىق ماڭىزى بار قالالاردان كەلگەن 128 مەكتەپ وقۋشىسى بار.
ءتۋرنيردىڭ قورىتىندىسى بويىنشا, مەكتەپ ليگاسىندا اقتوبە قالاسىنداعى م.قۇرمانعاليەۆا اتىنداعى مەكتەپ-گيمنازيانىڭ وقۋشىلارى الىشەر قۋانىش پەن اقىلجان يتەعۇلوۆ جەڭىمپاز اتاندى. ولار ساتباەۆ ۋنيۆەرسيتەتىنىڭ ءبىلىم گرانتىن ۇتىپ الدى. الىشەر قازىر 10-سىنىپتا, اقىلجان 11-سىنىپتا وقيدى.
جەڭىمپاز اقىلجان يتەعۇلوۆ: ء«بىز مەكتەپتەگى پىكىرسايىس ۇيىرمەسىنە ەكى جىلدان اسا ۋاقىت قاتىسامىز. پىكىرسايىس جارىستارى بىزگە ۇنايدى. ويتكەنى وندا شەشەندىك ونەردى, شەبەرلىكتى شىڭدايسىڭ, حالىق الدىندا سويلەۋدى, سىني تۇرعىدان ويلاۋدى ۇيرەنەسىڭ. سونىمەن قاتار وي ءورىسىڭ مەن ەرۋديتسيا داعدىلارىڭدى دامىتاسىڭ. پىكىرسايىس ءتۋرنيرىنىڭ جەڭىمپازى اتانىپ, ساتباەۆ ۋنيۆەرسيتەتىنىڭ ءبىلىم گرانتىن جەڭىپ العانىما وتە قۋانىشتىمىن», دەدى.
قازاق جانە ورىس ليگالارىنىڭ جەڭىمپازدارى, سونداي-اق ءتۋرنيردىڭ ۇزدىك سپيكەرلەرى جالپى سوماسى 2 ملن تەڭگەدەن اسا اقشالاي سىيلىق الدى. تۋرنيردە «ۇزدىك تورەشى» نوميناتسياسىنىڭ يەگەرى دە انىقتالدى, اتالعان نوميناتسيا بويىنشا حالىقارالىق اقپاراتتىق تەحنولوگيالار ۋنيۆەرسيتەتىنىڭ ستۋدەنتى ۋليانا ۆيلەمسون جەڭىمپاز اتاندى.
ايتا كەتەيىك, تۋرنير امەريكالىق, بريتاندىق پارلامەنتتىك پىكىرسايىس فورماتتارىنىڭ ەرەجەلەرى جانە لينكولن-دۋگلاس ەرەجەلەرى بويىنشا ءوتتى. فينالدىق ويىننىڭ قورىتىندىسى بويىنشا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ «پاتريوت» پىكىرسايىس كلۋبى ۇزدىك دەلەگاتسيا بولدى.
