ماڭعىستاۋ وبلىسىنىڭ ورتالىعى – اقتاۋ قالاسىنىڭ سوتى شەتپە كەنتىنىڭ ءۇش تۇرعىنىن جۇكتى ايەلدى زورلاعاندارى ءۇشىن سوتتادى. بۇل تۋرالى Lada.kz حابارلادى.
قىلمىستىق ءىس ماتەريالدارىنا سايكەس, بۇدان بىرنەشە اي بۇرىن ۇلكەنى 26-داعى, كىشىسى 23-تەگى ءۇش جىگىت شەتپە ەلدى مەكەنىندە تۇراتىن, جۇكتىلىگىنە بەس اي بولعان, ءۇش بالانىڭ اناسى, 30 جاستاعى ايەلدى بىرنەشە ساعات بويى كەزەكتەسىپ زورلاعان. سول كۇنى ءۇش جىگىت ىشتەرىندەگى ءبىرىنىڭ اكەسىنىڭ كولىگىن ءمىنىپ ءجۇرىپ, دۇكەننىڭ جانىنان س. ەسىمدى كەلىنشەكتى كەزدەستىرەدى. جىگىتتەردىڭ ءبىرى ونىمەن جاقسى تانىس ەكەن. بولاشاق قۇرباندىقتارىن ولار ماشيناعا زورلاپ مىنگىزىپ, وزدەرىمەن بىرگە الا كەتەدى.
قاسكويلەر كەلىنشەكتى شەتپەدەن 5 شاقىرىم قاشىقتىقتاعى اۋسارى دەگەن اكەلەدى. جولدا ايەل ءوزىن جىبەرۋدى تالاپ ەتىپ, قارسىلىق كورسەتىپ باعادى. بىراق مۇنىڭ ورنىنا قورقاۋلار جەتەر جەرلەرىنە جەتكەسىن ويلارىنا كەلگەندەرىن ىستەيدى. ولاردى ءتىپتى ارالارىنداعى ءبىرىنىڭ كەلىنشەكپەن جاقسى تانىس ەكەنى دە توقتاتپايدى. قايتا قارسىلىق بىلدىرسە, ءوزىن ءولتىرىپ, دالاعا كومىپ كەتەتىندەرىن ايتىپ, قورقىتادى.
انىقتالعانداي, س.-نىڭ قالقانشا بەزى اۋىرۋى ءتورتىنشى كەزەڭگە جەتكەن ەكەن. سوندىقتان ۇدايى ءدارى پايدالاناتىن بولعان. كەلىنشەك زورلىقشىلارعا مۇنى دا ايتقان. بىراق ولار بۇعان قۇلاق اسپاعان. كەرىسىنشە قورلىقتارىن ودان ءارى جالعاستىرا تۇسكەن. ولار سوسىن زورلىقتارىن باسقا جەردە جالعاستىرماقشى بولعان. ءسويتىپ, تىنىعۋ بازاسىنداعى مونشانى جالدايدى. وسى جەردە زورلاۋدى قايتا جالعاستىرادى. بۇل جەردە تاعى ەكى ساعاتتان استام ۋاقىت ابدەن قينايدى. بۇعان قوسا, تىنشىمايتىن بولسا, وسى جەردەگى تۇرىك جۇرگىزۋشىلەرگە بەرەتىندەرىن ايتىپ ۇرەيىن الادى.
كەشكە قاراي شەتپەنىڭ شەتىنە اكەلىپ, تاستاپ كەتەدى. ەگەر بولعان جايدى بىرەۋگە ايتار بولسا, اناسىنا زالال كەلتىرىپ, ءوزىن ولتىرەتىندەرىن بىلدىرەدى. ال قۇر سۇلدەرى قالعان ايەل بىردەن اپكەسىنىڭ ۇيىنە جەتىپ, بولعان جايدى بايانداپ بەرەدى. سودان سوڭ ايەلدىڭ تۋىستارى قۇقىق قورعاۋ ورگاندارىنا شاعىمدانادى.
پوليتسيا زورلىقشىلاردى بىردەن ىزدەۋگە كىرىستى. زارداپ شەگۋشى ايەلگە تانىس جىگىت ارقىلى ارتىنشا ءبارىن قولعا ءتۇسىردى.
«سوت پروتسەسىندە سوتتالۋشىلار كورسەتۋ بەرۋدەن باس تارتتى. الايدا, جينالعان تالاسسىز ايعاقتار, سونىڭ ىشىندە كۋالاردىڭ كورسەتۋلەرى مەن ساراپتاما ولاردىڭ وسى قىلمىستى جاساعاندارىنا ەش كۇمان كەلتىرمەدى. انىقتالعانداي, زورلىقشىلاردىڭ بارلىعى دا ۇيلەنگەن, كىشكەنتاي بالالارى بار جىگىتتەر بولىپ شىقتى», - دەدى سوت گۇلمارجان ءادىلسۇلتاني.
سوت ۇكىم شىعاردى. ول بويىنشا زورلىقشىلاردىڭ ەكەۋى – 7, كوبىرەك بەلسەندىلىك تانىتقان بىرەۋى 8 جىلعا جالپى رەجيمدەگى كولونيادا وتىرۋعا جازا الدى. بۇعان قوسا, سوت مورالدىق جانە ماتەريالدىق شىعىندى وتەۋ رەتىندە ءزابىر كورۋشىگە 865 مىڭ تەڭگە ايىپپۇل تولەۋگە مىندەتتەدى.
قازىر ۇكىم كۇشىنە ەندى.
قۇرىش نۇرىمبەت.
دەرەككوز: Lada.kz.
فوتو: Lada.kz.
