ايجارىق – كاسىبي قىلقالام شەبەرى, ونىڭ كارتينالارى مۇنايشىلار ماقتانىشى, ماڭعىستاۋلىقتار تامسانا قاراپ, كوز تويدىراتىن تۋىندىلار. ول اتاسىنان دارىعان سۋرەتشىلىك قابىلەتىن جوعارى بىلىممەن ۇشتاپ, اباي اتىنداعى الماتى مەملەكەتتىك ۋنيۆەرسيتەتىنىڭ كوركەمسۋرەت-گرافيكا فاكۋلتەتىن بىتىرگەن. ماماندىعى بويىنشا ءبىرشاما جىل جۇمىس ىستەپ, 2008 جىلى اكە جولىمەن مۇناي ءوندىرىسى سالاسىنا بەت بۇرادى. «قازترانسويل» مەكەمەسى اقتاۋ باس مۇناي ايداۋ ستانساسىنا جۇمىسقا ورنالاسادى. مۇنايشى بولعانمەن, اتا قانىمەن دارىعان تابيعي تالانتىنان بوي دا, وي دا ءۇزىپ كەتە الماعان ايجارىق مەيىرمانوۆ بۇگىندە بىرنەشە كوركى مەن سىرى ساي تاماشا كارتينالاردىڭ اۆتورى. ماڭعىستاۋلىق دەلەگاتسيا قۇرامىندا «ەتنواۋىل» جوباسىنا قاتىسىپ, «ماڭعىستاۋ – اشىق اسپان استىنداعى مۇراجاي» كورمەسىن دايىنداۋعا ۇلەس قوسقان سۋرەتشىنىڭ ونەرپاز قولىنان تۋعان سۋرەتتەرى سۋرەت ونەرىنىڭ قادىرىن بىلەر جانداردان جوعارى باعاسىن الدى. ارىپتەستىڭ دارىنىنا قۋانىپ, تالانتىن الدىمەن باعالايتىن – اسىرەسە مۇنايشىلار. ەل تاۋەلسىزدىگىنىڭ 30 جىلدىعىنا ايجارىق ۇجىمىنا ۇسىنعان قارت كاسپي جاعالاۋى بەينەلەنگەن كورىكتى كارتينا بۇگىندە مۇنايشىلار اسحاناسىنىڭ ءتورىن تولتىرىپ تۇر. قىلقالامىنان تۋعان سىرلى بوياۋمەن كوبىنە قاسيەتتى اتاكۇلدىگى – ماڭىستاۋدىڭ تاۋ-تاسىن سويلەتىپ, داڭعايىر دالاسىنا ءان سالدىرىپ, تەنتەك تە ەركە تەڭىزىن تۋلاتىپ, ءاربىر ساي-سالا, بۇتا-جۋسانىنان سىر اڭدىعان ايجارىقتىڭ بولمىسى تابيعاتپەن, تاريحپەن ەتەنە ەكەندىگى بىردەن بايقالادى, تۋعان جەر كورىنىسى مەن وتكەنىنە پەرزەنتتىك اڭسارى ايتپاي-اق اڭعارىلادى. وعىلاندى, بوزجىرا, شەرقالا, كاسپي, ايراقتى, شارتاستار – سۋرەتشى كوزىنەن قالىس قالماي, ارقايسىسى جەكە-جەكە ادەمى, كولەمدى كارتيناعا اينالدى. وتباسىندا ۇلتتىق ۇستىندى بەرىك ۇستانىم ەتكەن ا.مەيىرمانوۆ بەينەلەۋ ونەرىندە تاريحي تاقىرىپقا كوبىرەك باسىمدىق بەرەدى.
ايجارىقتىڭ جۇبايى عاليا – حيميا ءپانىنىڭ وقىتۋشىسى. ونەردە قاسيەت بولادى, ول كەز كەلگەنگە ەمەس, ءوز يەسىن, ءوز قادىرىن بىلەر جاندى تاۋىپ قونادى. عاليانىڭ ءىنىسى ساكەن دە مۇنايشى. «قاراجانباسمۇناي» اق بۇرعىلاۋ جانە ۇڭعىمالاردى جەراستى كۇردەلى جوندەۋ باسقارماسى وندىرىستىك بازاسىنىڭ وپەراتورى ساكەن ىزدىباەۆ قازاقتىڭ اقيىق اقىنى, مەملەكەتتىك سىيلىقتىڭ لاۋرەاتى مۇقاعالي ماقاتاەۆتىڭ 100-دەن استام ولەڭىن جاتقا وقيدى. عالامتور, ۇيالى تەلەفون جوق كەڭشار كەزىندە سام دالاسىنا وتار قويدى قاپتاتىپ جىبەرىپ كەڭ دالا توسىندە كىتاپ وقۋ – شوپانداردىڭ سۇيىكتى ءىسى. ساكەن دە كىشكەنتايىنان كىتاپپەن سىرلاسىپ, كىتاپتان مول رۋحاني ءنار الىپ وسكەندىگىنە كۇمان جوق, ويتكەنى ساكەننىڭ اعاسى بولاتبايدىڭ كىتاپقۇمارلىعى, وقىمىستىلىعىنا ەل كۋا. قاراپايىم شوپاننىڭ كىتابي تىلمەن كوسىلتە سويلەپ, كىمنىڭ قاي كىتابىنىڭ قاي بەتىندە نە جازىلعانىن اۋزىنىڭ سۋى قۇرىپ تامسانا اۋىزشا ايتىپ وتىراتىن بوكەڭ شوپاندىقتى ەمەس, عىلىم-ءبىلىم, ادەبيەت-رۋحانيات جولىن تاڭداعاندا تانىمال عالىمداردان ەش كەم تۇسپەسىنە ەل سەنىمدى.
– مۇقاعاليدىڭ اقىندىق قاسيەتى مەن ولەڭدەرىنىڭ اسەرلىلىگى وزگە اقىندار الەمىنە ۇقسامايدى. سوندىقتان ماعان مۇزبالاق اقىننىڭ جىرلارىن جاتتاۋ قيىن ەمەس. ارىپتەستەرىم جۇمىس اراسىندا ولەڭ وقىپ بەرۋىمدى سۇرايدى. مەن دە شالقار شابىتقا كەنەلىپ, جۇرەكپەن جەتكىزۋگە تىرىسامىن, –دەيدى ول.
مۇقاعاليعا دەگەن ايرىقشا قۇرمەتى بولۋى كەرەك, ماڭعىستاۋلىق مۇنايشى جىگىت مۇقاعاليدىڭ تۋعان جەرىنە ارنايى بارىپ, مۋزەيىمەن تانىسقان. اقىننىڭ تۋعان توپىراعىنا تابان تيگىزىپ, رۋحىنا ءتاۋ ەتىپ, مۇراسىن كوزبەن كورۋدى كوپتەن ماقسات ەتكەن ساكەن وسىلايشا بۇل ارمانىنا قول جەتكىزدى. وتباسىندا ءتورت بالا ءوسىرىپ وتىرعان اكە تۇڭعىشىنا اقجول ەسىمىن بەرگەن. بۇگىندە اقجول – ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتى بيوتەحنولوگيا فاكۋلتەتىنىڭ 3-كۋرس ستۋدەنتى. قاجەتتى ماماندىق. ايتسا ايتقانداي, اقجولدىڭ جولى اق بولىپ, سوڭىنان ۇشەم ءىنىسى ەردى. ونەرگە جانى قۇشتار اكە ۇشەمگە مۇقاعالي, ءشامشى, تولەگەن ەسىمدەرىن تاڭدادى. ء«بىر شاڭىراق استىندا ساكەن سەيفۋللين, اقجول مەيىربەكوۆ, مۇقاعالي ماقاتاەۆ, ءشامشى قالداياقوۆ, تولەگەن ايبەرگەنوۆ تۇرادى» دەپ ازىلدەيدى وزدەرى. ال ساكەن اعا ءوز جارى بالكۇمىس جەڭگەيدى «لاشىن» دەپ اتايدى ەكەن. بۇل دا ساكەننىڭ مۇقاعاليعا دەگەن ايرىقشا قۇرمەتىنىڭ دالەلى.
جۇرەكتەرىنە ونەر ۇيا سالىپ, كوكەيلەرىندە ونەردىڭ كۇمىس ءۇنى كۇمبىرلەپ تۇراتىن جەزدەلى-بالدىزدى قوس ونەرپاز وندىرىستە ەل يگىلىگىنە عانا ەڭبەك ەتىپ جۇرگەن جوق, ءوز ارىپتەستەرىنە, ءوز ورتاسىنا شابىتتى اسەر سىيلاپ, ۇلت رۋحانياتىنا دا وزىندىك ۇلەس قوسىپ ءجۇر.
ماڭعىستاۋ وبلىسى
