بەس جىلدان بەرى ۇيىمداستىرىلىپ كەلە جاتقان بايقاۋعا بيىل 4 مىڭعا جۋىق ءوتىنىم تىركەلگەن. بۇل – الەۋمەتتىك جوبا تاريحىنداعى ەڭ جوعارى كورسەتكىش. وتىنىمدەر سانى بويىنشا نۇر-سۇلتان, شىمكەنت, الماتى جانە الماتى وبلىسى كوش باستاپ تۇر.
«بولاشاق» قاۋىمداستىعىنىڭ مۇشەسى ءارى StartUp Bolashaq رەسپۋبليكالىق بيزنەس-جوبالار بايقاۋىنىڭ باس دەمەۋشىسى, Alawwal partners كومپانياسىنىڭ باسقارۋشى سەرىكتەسى قانىش امانباي ۇلى جوبا جەڭىمپازدارىنا گرانتتار بەرىلەتىنىن ايتتى.
«بايقاۋعا جولدانعان جوبالاردىڭ كوپ بولىگى IT-سالا, MarketPlace سالاسىنا باعىتتالعان. ەكىنشىسى – ءبىلىم بەرۋ سەكتورى, ديزاين, ءسان. قاتىسۋشىلار اراسىندا ايەلدەر كوپ. بۇل – قۋانتارلىق جايت. بايقاۋدا باق سىناۋشىلاردىڭ جاسىنا كەلسەك, بارلىق ساناتتاعى ازاماتتار دەۋگە بولادى. بيىلدان باستاپ ءبىز ەشقانداي شەكتەۋلەر قويمايمىز, ورتاشا جاس – 28. باستى جاڭالىقتاردىڭ ءبىرى – گرانتتار بولمايدى. ءبىز فيناليستەردىڭ بيزنەس-پەرىشتەلەرگە ءوز جوبالارىن تىكەلەي تانىستىرا الاتىن الاڭ ۇسىنامىز, ءوتىنىش بەرۋشىلەر مەن ينۆەستورلار اراسىندا اشىق, جاقسى ديالوگ ورنايدى. مەنىڭشە, بۇل كوپتەگەن ادامدارعا جاقسى ۇلگى بولادى جانە بارلىعى جوبانى تانىستىرۋدى, ەسەپتەۋدى, ايتۋدى, قورعاۋدى, ينۆەستور تارتۋدى ۇيرەنەدى», دەدى ق.امانباي ۇلى.
سپيكەردىڭ ايتۋىنشا, بايقاۋداعى تاعى ءبىر ۇلكەن جاڭالىق – بيزنەس-پەرىشتەلەرگە مەنتور بولۋعا مۇمكىندىك بەرىلەدى. بۇل – كاسىبىن ەندى باستاپ وتىرعان كاسىپكەر ءۇشىن ۇلكەن ارتىقشىلىق. ويتكەنى ول قارجىعا عانا ەمەس, ومىرلىك سەرىكتەسكە دە يە بولادى. بۇل بيزنەسكە عانا ەمەس, جالپى, ومىرگە دە وڭ اسەرىن تيگىزەدى. قانداي دا بولسىن كەڭەستەر الىپ, تاجىريبەلى كاسىپكەرلەردىڭ جىبەرگەن قاتەلىكتەرىن ءبىلۋى مۇمكىن. بۇل جوباعا وتە جاقسى جانە ناتيجەلى اسەر ەتەدى.
وسىلايشا, بيىل StartUp Bolashaq رەسپۋبليكالىق بيزنەس-جوبالار بايقاۋىن وتكىزۋ فورماتى وزگەردى. بۇرىنعىداي گرانتتار بەرىلمەيدى, فيناليستەر قازاقستاننىڭ تانىمال جانە بەدەلدى بيزنەسمەندەرىنىڭ ينۆەستيتسيالىق جانە ساراپتامالىق قولداۋىن يەلەنەدى. بيزنەس-پەرىشتەلەر قاۋىمداستىعىنىڭ قۇرامىندا قانىش تولەۋشين, ارمانجان بايتاسوۆ, مۇرات ءابدىراحمانوۆ, قانات كوپباەۆ, گاۋحار قاپپاروۆا, تيمۋر تۋرلوۆ, ەرلان يسەكەشەۆ, بەيبىت الىبەكوۆ, دينارا ءساتجان جانە باسقا دا تانىمال تۇلعالار بار. ولار پەرسپەكتيۆالى بيزنەس-يدەيالاردى قاراۋعا بىرلەسىپ قاتىسۋعا جانە 100 ملن تەڭگەدەن باستالاتىن ينۆەستيتسيالارى بار شاعىن جانە ورتا بيزنەس كاسىپكەرلەردى قولداۋعا دايىن. بيزنەس-پەرىشتەلەردىڭ ينۆەستيتسيالىق ۇسىنىسى ءبىر جوباعا 10 ملن تەڭگەدەن باستاپ قارالادى.
قوسا كەتۋ كەرەك, 28 اقپاندا بايقاۋعا وتىنىمدەردى قابىلداۋ توقتاتىلادى, ناۋرىزدا جارتىلاي فيناليستەر تاڭدالادى, ال ناۋرىز ايىنىڭ سوڭىندا جەڭىمپازدار ءتىزىمى بەلگىلى بولادى. ولاردى بيزنەسمەندەر, قوعام قايراتكەرلەرى, ساراپشىلاردان تۇراتىن كوميسسيا مۇشەلەرى ىرىكتەيدى.
