ۋكراينا پرەزيدەنتى ۆولوديمير زەلەنسكي بۇل كەزدەسۋ ناتيجەسىنە ۇلكەن ءۇمىت ارتپايتىنىن اشىق ايتقان. الايدا ول بەيبىتشىلىك ورناتۋعا نيەتتى ەكەنىن كورسەتۋ ءۇشىن ۋكراينا وكىلدەرىن كەلىسسوز جۇرگىزۋگە جىبەرگەن.
كەلىسسوز بولادى دەگەن ۋاقىتتا حاركوۆ قالاسىندا كەسكىلەسكەن ۇرىس ءجۇرىپ جاتتى. جارىلىستار تاڭەرتەڭ كيەۆ پەن حاركوۆتا ەستىلسە, سولتۇستىكتەگى چەرنيگوۆ قالاسىنداعى تۇرعىن ۇيگە زىمىران تۇسكەن. ۋكراينا پرەزيدەنتىنىڭ اكىمشىلىگى اتىستى دەرەۋ توقتاتىپ, رەسەي اسكەرلەرىنىڭ ەل اۋماعىنان شىعارىلۋىن تالاپ ەتىپ وتىر. كەلىسسوزگە قاتىسۋشى رەسەي وكىلى ۆلاديمير مەدينسكيدىڭ ايتۋىنشا, ماسكەۋ ەكى تاراپتىڭ مۇددەلەرىنە ساي كەلەتىن كەلىسىمگە قول جەتكىزگىسى كەلەدى. كەزدەسۋ
باستالار الدىندا ۋكراينا پرەزيدەنتى ۆولوديمير زەلەنسكي رەسەي اسكەرلەرىن شابۋىلداماۋعا شاقىرعان ەدى.
تاعى ءبىر ماڭىزدى ماسەلە, ۋكراينانىڭ ەۋروپالىق وداققا قوسىلۋى تۋرالى بولىپ تۇر. زەلەنسكي ەۋرووداق مۇشەلەرىنە ءوز ەلىن ۇيىم قاتارىنا تەز ارادا قوسۋ تۋرالى ۇندەۋ جولدادى. ء«بىزدىڭ ماقساتىمىز – بارلىق ەۋروپالىقتارمەن بىرگە, ەڭ باستىسى, تەڭ دارەجەدە بولۋ. مەن مۇنىڭ ءادىل شەشىم ەكەنىنە سەنىمدىمىن. جانە بۇل مۇمكىن ەكەنىنە سەنەمىن», دەدى ول.
وسىعان دەيىن ەۋروپالىق وداققا مۇشە مەملەكەتتەر جەتەكشىلەرىنىڭ وتىرىسىنان كەيىن بەرگەن سۇحباتىندا ەۋروپالىق كوميسسيا توراعاسى ۋرسۋلا فون دەر ليايەن ۋكراينانى ەۋرووداق قاتارىنا قوسىلۋعا شاقىردى. ء«بىز تىعىز ىنتىماقتاستىقتا جۇمىس ىستەيمىز, مىسالى ەنەرگەتيكا بويىنشا. ودان بولەك بىرلەسكەن جوبالارىمىز كوپ, ۋاقىت وتە كەلە ولار بىزگە جاقىنىراق بولىپ كەتتى. ۋكراينانىڭ بىزگە قوسىلعانىن قالايمىز», دەدى ەۋروپالىق كوميسسيا توراعاسى.
سونداي-اق ۋرسۋلا فون دەر ليايەن Euronews تەلەارناسىنا بەرگەن سۇحباتىندا: «ەۋروپالىق وداق تاريحتا العاش رەت شابۋىلعا ۇشىراعان ەلگە قارۋ-جاراق پەن باسقا دا جابدىقتاردى ساتىپ الۋدى جانە جەتكىزۋدى قارجىلاندىرادى», دەدى. ەۋروكوميسسيانىڭ مالىمەتى بويىنشا قارۋ-جاراق ساتىپ الۋعا 450 ميلليون ەۋرو جانە تاعى مەديتسينالىق قۇرال-جابدىقتار الۋعا جۇمساۋ ءۇشىن 50 ميلليون ەۋرو بەرۋ جوسپارلانىپ وتىر.
ء«بىز ەۋرووداقتىڭ اۋە كەڭىستىگىن رەسەيگە جاۋىپ جاتىرمىز. ءبىز رەسەيگە تيەسىلى, رەسەيدە تىركەلگەن, رەسەي باقىلاۋىنداعى بارلىق ۇشاققا تىيىم سالۋدامىز. ولار ەندى ەۋرووداقتىڭ اۋە كەڭىستىگى ارقىلى ۇشا المايدى», دەدى ەۋروكوميسسيا توراعاسى.
ەۋروپالىق وداق سونداي-اق رەسەيلىك RT جانە Sputnik تەلەارنالارىنىڭ حابار تاراتۋىنا تىيىم سالادى جانە بۇل ولاردىڭ ەنشىلەس كومپانيالارىنا دا قاتىستى. سانكتسيالاردىڭ بولەك پاكەتى الەكساندر لۋكاشەنكو بيلىگىنە دە قارسى.
ودان بولەك, ەۋرووداقتىڭ قورعانىس مينيسترلەرى ۋكراينا-رەسەي داعدارىسىن تالقىلاۋعا شاقىرىلدى. ەو-نىڭ سىرتقى ىستەر جانە قاۋىپسىزدىك ساياساتى جونىندەگى وكىلى ۋكرايناداعى قاقتىعىستى تالقىلاۋ ءۇشىن بلوكتىڭ قورعانىس مينيسترلەرىمەن كەزدەستى. جيىن ۋكرايندىقتارعا جەدەل گۋمانيتارلىق كومەكتى ۇيلەستىرۋگە ارنالدى.
ۋكراينا پرەزيدەنتى سونداي-اق ەلىن قورعاۋ ءۇشىن اسكەري تاجىريبەسى بار سوتتالعان ازاماتتاردى قاماۋدان بوساتاتىنىن مالىمدەدى. ونىڭ ايتۋىنشا, بۇل مورال جاعىنان قانشا اۋىر شەشىم بولعانىمەن, قورعانىس تۇرعىسىنان پايدالى بولماق.
ال ەل استاناسى كيەۆتە قوعامدىق كولىك شەكتەۋلى رەجىمدە جۇمىس ىستەي باستادى. بۇل تۋرالى كيەۆ مەرى ۆيتالي كليچكو حابارلادى.
رەسەي تاراپى ۇرىسقا جۇمسالعان شىعىندار جايلى ايتا باستادى. الايدا ناقتى سانى بەرىلمەدى. رەسەي پرەزيدەنتىنىڭ ءباسپاسوز حاتشىسى باتىس ەلدەرى سالعان سانكتسيالارعا قاتىستى پىكىرىندە رەسەيدىڭ سانكتسيانىڭ سالقىنىن جەڭۋگە الەۋەتى جەتەتىنىن مالىمدەدى.
دەگەنمەن رەسەي قارجى نارىعىنا سالىنعان سانكتسيالاردىڭ اسەرى دە ءبىلىنىپ جاتىر.
بىرىككەن ۇلتتار ۇيىمىنىڭ بوسقىندار ءىسى جونىندەگى اگەنتتىگى 422 مىڭ ادام ۋكراينادان كورشى ەلدەرگە شەكارا اسقانىن حابارلادى. كورشىلەس ەلدەر شەكاراسىندا ازاماتتار 72 ساعاتقا دەيىن كەزەكتە تۇرعان.
