قاڭتار ايىنداعى تەستىلەۋدە باق سىناعان 100-دەن اسا قاتىسۋشىنىڭ ىشىندە نەگىزىنەن ەرەكشە ءبىلىم بەرۋدى قاجەت ەتەتىن 99 ادام بار. بىلتىر وسى كەزەڭدە كورۋ, ەستۋ, تىرەك-قيمىل اپپاراتى بۇزىلعان 33 تالاپكەر تەست تاپسىرعان بولاتىن. ياعني ولاردىڭ قاتارى كوبەيىپ كەلەدى. دەمەك, مۇنداي ۇمىتكەرلەرگە قوسىمشا ۋاقىت بەرۋ تۋرالى وزگەرىس وسىعان بايلانىستى بولۋى مۇمكىن.
بيىلعى ءبىرىنشى ۇبت-نىڭ ناتيجەسىنە كەلسەك, تالاپكەرلەردىڭ 70%-عا جۋىعى شەكتى بالل جينادى. بۇل بىلتىرمەن سالىستىرعاندا 20%-عا جوعارى. وسىعان سايكەس ورتاشا بالدىڭ كورسەتكىشى دە 7%-عا ارتىپ, شامامەن 68 بالدى قۇرادى. ەڭ جوعارى بالل 135 بولدى.
ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ: «قىسقى ۇبت بيىلعى 25 قاڭتار مەن 22 اقپان ارالىعىندا 42 وڭىرلىك تەستىلەۋ ورتالىعىندا ءوتتى. تەستىلەۋ وسىمەن ەكىنشى جىل قاتارىنان ەلەكتروندى فورماتتا جۇرگىزىلىپ كەلەدى. ۇبت كەزىندە تالاپكەرلەر سۇراقتارعا قايتا ورالا الادى جانە قاعاز بلانك تولتىرۋعا ۋاقىت جوعالتپايدى. وسىلايشا, ۇبت ناتيجەلەرى جاقسارىپ, ورتاشا بالل ايتارلىقتاي ءوستى. سونداي-اق ەلەكتروندى فورمات تەستىلەۋدىڭ اشىقتىعىن قامتاماسىز ەتۋگە مۇمكىندىك بەردى. ورناتىلعان كامەرالار ارقىلى تەستىلەۋ كەزىندە ەرەجە بۇزۋ فاكتىلەرى دە ايتارلىقتاي ازايدى. تۇلەكتەردىڭ باسىم بولىگى وزىنە جانە ءوز بىلىمىنە سەنەتىنى قۋانتادى», دەيدى.
ءبىلىم جانە عىلىم مينيسترلىگىنىڭ تاراتقان اقپاراتىنا سۇيەنسەك, بىلتىر قاڭتار ايىنداعى ۇبت-مەن سالىستىرعاندا بيىل تىيىم سالىنعان زاتتاردى الىپ كىرۋ ارەكەتتەرىنىڭ سانى ازايعان. سمارتفونداردى, شپارگالكالاردى جانە باسقا دا تىيىم سالىنعان زاتتاردى الىپ وتكىسى كەلگەن 90 تالاپكەر تەست تاپسىرۋ مۇمكىندىگىنەن ايىرىلدى. بۇل – 2021 جىلمەن سالىستىرعاندا ءۇش ەسەگە از.
«ۇبت ءۇش دەڭگەيلى جۇيە بويىنشا وتكىزىلەدى: Face ID جەكە باسىن سايكەستەندىرۋ ارقىلى, جەكە كۋالىك بويىنشا, سونداي-اق تەستىلەۋ ورنىندا جەكە باسىن سايكەستەندىرۋ جۇرگىزىلەدى. بيىل تەستىلەۋ العاش رەت ء«بىر كومپيۋتەر – ەكى كامەرا – ءبىر تەستىلەۋشى» قاعيداسى بويىنشا وتكىزىلدى. ەگەر بۇرىن تەستىلەۋ بارىسى ءار كومپيۋتەردىڭ ۇستىندە ورنالاسقان ءبىر عانا كامەرادان باقىلانسا, ەندى ۇبت كەزىندە جەكە تۇلعانى سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (الدىڭعى) كامەرا ورناتىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان بارلىعى 229 ادام شىعارىلىپ, ولاردىڭ ناتيجەلەرى جويىلدى», دەپ حابارلايدى جاۋاپتى ۆەدومستۆو.
تاعى ءبىر ايتا كەتەتىنى, بيىلعى ءبىرىنشى ۇبت-دا تۇلەكتەردىڭ 78,3%-ى تەستىلەۋدى قازاق تىلىندە, 21,5%-ى ورىس تىلىندە, 0,16%-ى اعىلشىن تىلىندە تاپسىرعان.
