ءباسپاسوز كونفەرەنتسياسىندا ءسوز العان «قارجى ورتالىعى» اق باسقارما توراعاسى اسقار يبرايموۆ:
– وزدەرىڭىز بىلەتىندەي, 2018 جىلى ەلباسى ن.نازارباەۆ بەس الەۋمەتتىك باستاماسىن جاريالاعان بولاتىن, سولاردىڭ ءبىرى ستۋدەنت جاستاردىڭ ءومىر ءسۇرۋ جاعدايىن جاقسارتۋعا باعىتتالعان. وسى مىندەتكە قول جەتكىزۋ ءۇشىن جەكەمەنشىك سەكتوردىڭ اۋقىمدى قاتىسۋىن كوزدەيتىن مەملەكەتتىك تاپسىرىستى ورنالاستىرۋ تەتىگى ازىرلەندى. قازىرگى تاڭدا ەلىمىزدە ستۋدەنتتەر تۇرۋ ءۇشىن 63 مىڭنان اسا ورىن-جاي قاجەت. بۇل – مەگاپوليستەردەن باستاپ وبلىستىق ماڭىزى بار قالالارعا دەيىنگى ەلىمىزدىڭ بارلىق وڭىرىنە ءتان قاجەتتىلىك. بۇعان دەيىن 30 630 ورىندىق 124 جاتاقحانا پايدالانۋعا بەرىلدى. سونداي-اق الدىن الا جاسالعان شارتتار, جەرگىلىكتى بيۋدجەت قاراجاتىنان نىسانالى قۇرىلىس, مەنشىكتى قاراجات جانە دەمەۋشىلىك قاراجات ەسەبىنەن 2022 جىلى 11 057 ورىندىق 32 جاتاقحانانى پايدالانۋعا بەرۋ جوسپارلانىپ وتىر, – دەدى.
سپيكەردىڭ ايتۋىنشا, جاتاقحانالار سالۋ جوباسى مەملەكەتتىك كاسىپكەرلەر ءۇشىن تاپسىرىستى ورنالاستىرۋمەن قاتار قوسىمشا تابىس كوزى بولا الادى. ويتكەنى ستۋدەنتتەردىڭ اي سايىنعى تۇرۋ اقىسى مەملەكەتتىك تاپسىرىستىڭ قۇنىنا كىرمەيدى. ونىڭ مولشەرىن جاتاقحانا يەسى رەتتەيدى جانە ناقتى وڭىردەگى تۇرعىن ءۇي نارىعىنىڭ جاعدايىمەن انىقتالادى. سونداي-اق تۇرمىستىق قىزمەت كورسەتۋ ءۇشىن كوممەرتسيالىق الاڭدار (اسحانا, شاشتاراز, جاتتىعۋ زالى جانە ت.ب.) جاساۋعا مۇمكىندىك بار, ولاردىڭ نەگىزگى تۇتىنۋشىلارى ءوز تۇرعىندارى بولادى.
– تۇتاستاي العاندا, بارلىق وبەكتىلەر مەن ونى ودان ءارى پايدالانۋ قولدانىستاعى قۇرىلىس, ورتكە قارسى جانە سانيتارلىق-ەپيدەميالىق نورمالارعا قاتاڭ سايكەستىكتە جۇرگىزىلۋگە ءتيىس. قارجى ورتالىعى ۇيلەستىرەتىن ءبىلىم بەرۋ سالاسىنداعى الەۋمەتتىك جوبالاردىڭ تاعى ءبىرى – قازاقستاندا 2013 جىلدان بەرى ىسكە اسىرىلىپ كەلە جاتقان Aqyl مەملەكەتتىك ءبىلىم بەرۋ جيناقتاۋ جۇيەسى (مبجج). مبجج رەسپۋبليكامىزدىڭ كەز كەلگەن ازاماتى ءۇشىن وزىنە نەمەسە بالانىڭ اتىنا ءبىلىم بەرۋ جيناقتاۋ سالىمىن اشۋعا مۇمكىندىك بەرەدى. مبجج-نىڭ باستى ارتىقشىلىعى, سالىمدارعا 9 پايىزعا دەيىنگى بانك سىياقىسىنان بولەك مەملەكەتتەن سىيلىقاقى ەسەپتەلەدى. مەملەكەت سىيلىقاقىسىنىڭ جىلدىق مولشەرى نەگىزىنەن 5 پايىزدى, حالىقتىڭ الەۋمەتتىك تۇرعىدان ءالسىز توبىنداعى ازاماتتارعا 7 پايىزدى قۇرايدى. بىراق دەپوزيتتى جۇمساۋدىڭ قاتاڭ ءتارتىبى بار, جيناقتالعان قاراجاتپەن سالىمشى ەلىمىزدە, سونداي-اق شەتەلدە وقۋدىڭ اقىسىن تولەۋى ءتيىس, – دەدى ا.يبرايموۆ.
جوو-عا نەمەسە كوللەدجگە اقىلى نەگىزدە وقۋعا تۇسكەننەن كەيىن سالىمشى دەپوزيت اشىلعان بانككە جوو-مەن نەمەسە كوللەدجبەن جاسالعان شارتتى ۇسىنادى, بانك وقۋ اقىسىن سالىمشىنىڭ شوتىنان تىكەلەي ءبىلىم بەرۋ ۇيىمىنا اۋدارادى. ەگەر وقۋدىڭ بارلىق مەرزىمىنە اقى تولەگەننەن كەيىن دەپوزيتتە قاراجات قالسا, سالىمشىنىڭ اقشانى تۇگەلدەي شىعارىپ الۋعا قۇقىعى بار.
– ال بالا گرانتقا تۇسكەن جاعدايدا سالىمشى: بارلىق قاراجاتتى بانك سىياقىسىمەن جانە مەملەكەت سىيلىقاقىسىمەن بىرگە الۋعا, قاراجاتتى قازاقستان رەسپۋبليكاسىنىڭ ازاماتى بولاتىن ءۇشىنشى تۇلعانىڭ ءبىلىم بەرۋ سالىمىنا اۋدارۋعا, ءبىلىم بەرۋدىڭ باسقا دەڭگەيلەرىنە (ماگيستراتۋرا) اقى تولەۋ ءۇشىن قاراجات جيناقتاۋدى جالعاستىرۋعا قۇقىلى. اتالعان سالىم قازاقستاننىڭ دەپوزيتتەرگە كەپىلدىك بەرۋ قورى تاراپىنان ساقتاندىرىلعان (10 000 000 تەڭگەگە دەيىن شەكتەلگەن) جانە مەملەكەتتىك ورگاندار تاراپىنان كەز كەلگەن تىيىم سالۋلار مەن شەكتەۋلەر قويىلۋدان زاڭنامامەن قورعالعان. 2022 جىلدىڭ باسىندا تىركەلگەن دەرەك بويىنشا 21 139 سالىم بار, سالىمشىلاردان جالپى سوماسى 30 734 235 مىڭ تەڭگەنى قۇرادى, – دەدى قارجى ورتالىعىنىڭ باسشىسى.
