ۋكراينا توڭىرەگىندەگى جاعدايدىڭ ودان ءارى ۋشىعۋى جانە گەوساياسي تاۋەكەلدەردىڭ ۇلعايۋى اياسىندا قارجى نارىقتارىنىڭ قۇبىلۋى كۇرت ءوستى. رەسەيگە قارسى سانكتسيالاردىڭ كۇشەيۋىن كۇتۋ جانە جاھاندىق ينۆەستورلاردىڭ رەسەي اكتيۆتەرىنەن بۇدان بىلايعى شىعۋى رەسەي رۋبلىنە قىسىم كورسەتۋدە.
سوڭعى تاۋلىكتە ءرۋبلدىڭ السىرەۋى 4%-دان استى. رۋبل 80 مەجەسىنە جەتىپ, قازىرگى ۋاقىتتا ءبىر دوللار ءۇشىن 80,5 رۋبل دەڭگەيىندە ساۋدالانۋدا. رەسەيلىك MOEX اكتسيالارىنىڭ يندەكسى الدىگۇنى 10,5%-عا تومەندەپ, كەشە ساۋدا-ساتتىق اشىلعاننان كەيىن 5%-عا جۋىق تومەندەدى.
الەمدىك قارجى نارىقتارى احۋالدىڭ ودان ءارى دامۋ بەلگىسىزدىگىنىڭ ارتۋىنا قاتتى اسەر ەتتى. EURO STOXX يندەكسى 2,17%-عا, DAX يندەكسى 2,07%-عا تومەندەدى. التىننىڭ باعاسى ءبىر ۋنتسيا ءۇشىن 1 906 دوللارعا دەيىن ءوستى.
بارلىق الەمدىك جانە جەرگىلىكتى نارىقتارعا اسەر ەتەتىن نەگىزگى ساۋدا ارىپتەسى نارىعىنداعى احۋالدى ەسكەرسەك, قازاقستاننىڭ قارجى نارىعى ءۇشىن دە تاۋەكەلدەر ءوستى. ءرۋبلدىڭ السىرەۋى تەڭگەگە قىسىم كورسەتۋدە. كەشەگى ساۋدا-ساتتىق اشىلعاننان باستاپ تەڭگە ءبىر دوللار ءۇشىن 426,5 تەڭگەدەن 437,80 تەڭگەگە دەيىن 2,6%-عا السىرەدى.
اقپان ايىنداعى سالىق اپتاسىنىڭ اياسىنداعى ەكسپورتتاۋشىلاردىڭ ساتۋى جانە كەيبىر كەزدەردە 98-99 بەلگىسىنە جەتكەن, ءبىر باررەل ءۇشىن 92-97 دوللار اۋقىمىندا ساقتالىپ وتىرعان مۇنايدىڭ جوعارى باعاسى تەڭگەگە قولداۋ كورسەتۋدە.
كۇرت وسكەن قۇبىلمالىلىق اياسىندا ىشكى ۆاليۋتا نارىعىنداعى جاعدايدىڭ تۇراقسىزدانۋىن بولدىرماۋ ءۇشىن ۇلتتىق بانك كەشەگى ساۋدا-ساتتىق بارىسىندا ازداعان ۆاليۋتالىق ينتەرۆەنتسيالار جۇرگىزدى. قازىرگى ۋاقىتتا ساۋدا-ساتتىقتىڭ جالپى كولەمى 155 ملن دوللار بولعان كەزدە ولاردىڭ كولەمى 33 ملن دوللاردى قۇرايدى. بۇل بارلىق ساۋدا-ساتتىقتىڭ شامامەن 20%-ى بولادى.
– ۇلتتىق بانك وزگەرمەلى ايىرباستاۋ باعامى قاعيداتىن ۇستانۋدا. ءبىز قارجى نارىقتارىنداعى احۋالدى, اتاپ ايتقاندا ۋكرايناعا بايلانىستى جاعداي بويىنشا وقيعالاردىڭ دامۋىن باقىلاپ وتىرمىز. نارىقتاردىڭ بۇدان بىلايعى سەرپىنى كوبىنەسە سانكتسيالاردىڭ سيپاتى مەن سەبەپتەرىنە جانە ولاردىڭ رف ەكونوميكاسىنا تيگىزەتىن اسەرىنە بايلانىستى بولادى, – دەدى ۇلتتىق بانك توراعاسىنىڭ ورىنباسارى.
