بۇل تۋرالى قر ۇكىمەتى وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ مالىمدەدى.
سۋ تاسقىنى قاۋپىنىڭ ۋاقتىلى الدىن الۋ جانە جويۋ, سونداي-اق پويىزداردىڭ ۇزدىكسىز جانە قاۋىپسىز قوزعالىسىن قامتاماسىز ەتۋ ماقساتىندا قر يدم تەمىر جولداردى سۋ تاسقىنى كەزەڭىنە دايىنداۋ بويىنشا جۇمىستار جۇرگىزۋدە. اتاپ ايتقاندا, «قتج» ۇك بۇيرىعىمەن جولدار مەن جول بويىنداعى تەمىرجول نىساندارىن قورعاۋ بويىنشا ارنايى ءىس-شارالار كەشەنى ەنگىزىلدى.
قازىرگى ۋاقىتتا كوپىرلەر, قۇبىرلار مەن درەناجدىق قۇدىقتاردى قار مەن مۇزدان تازارتۋ, سونداي-اق تاۋ جانە سۋ بۇرعىش ارىقتاردى, ناۋالار مەن كيۋۆەتتەردى اشۋ بويىنشا دايىندىق جۇمىستارى جۇرگىزىلۋدە. ماماندار سۋ قويمالارى مەن اگروتەحنيكالىق بوگەتتەردىڭ جاي-كۇيىن تەكسەرەدى, تج بويىنشا وبلىستىق بولىمشەلەرمەن ءوزارا ءىس-قيمىل الگوريتمدەرى پىسىقتالدى.
«وتكەن جىلداردىڭ تاجىريبەسىن تالداۋ ناتيجەلەرى بويىنشا ەلىمىزدىڭ بارلىق وڭىرلەرىندە 673 قاۋىپتى ورىنداردىڭ تىزبەسى انىقتالدى, ولاردى اينالىپ ءوتۋ جولدارى ۇيىمداستىرىلدى. جاۋاپتى تۇلعالار تاۋلىك بويى كەزەكشىلىك ەتەدى. تاسقىن سۋ وتكەن جاعدايدا سۋ باسۋ ايماعىنان ازاماتتاردى ەۆاكۋاتسيالاۋ ءۇشىن لوكوموتيۆتەر جانە 1,6 مىڭنان استام ۆاگون دايىندالدى. ارنايى تەحنيكالار – كراندار, تراكتورلار مەن بۋلدوزەرلەر, 84 قالپىنا كەلتىرۋ جانە ءورت ءسوندىرۋ پويىزدارى تۇراقتى دايىندىقتا», دەدى ق.وسكەنباەۆ.
ءمينيستردىڭ اقپاراتى بويىنشا, جولدار مەن تەمىرجول قۇرىلىستارىن قورعاۋ ءۇشىن 2 550 تەكشە مەتر كەسەك تاس جانە 9 مىڭ كونديتسيالىق ەمەس تەمىر-بەتون شپالدارى دايىندالعان. تەحنيكا مەن ماتەريالداردىڭ دايىندىعى 100% قۇرايدى.
