قازاقستان • 15 اقپان، 2022

ەلوردا اۋەجايىنان 200 ملن تەڭگەدەن استام زاڭسىز اقشا شىعارىلماق بولعان

2021 جىلى ەلوردا اۋەجايى ارقىلى 203 706 259 تەڭگە كولەمىندە زاڭسىز اقشا شىعارىلماق بولعان. زاڭ بۇزۋشىلارعا ايىپپۇل سالىندى. بۇل تۋرالى قر قارجى مينيسترلىگىنە قاراستى مەملەكەتتىك كىرىستەر كوميتەتىندە حابارلاندى، دەپ جازادى Egemen.kz.

بوتاكوز باقبەرگەن

وسىلايشا، مەملەكەتتىك كىرىستەر دەپارتامەنتى 2021 جىلى قر اقبتك 551-بابىنىڭ 3-بولىگى بويىنشا 13 اكىمشىلىك ماتەريال جاسادى (تاۋارلاردى، قولما-قول اقشا قاراجاتىن، اقشا قۇرالدارىن دەكلاراتسيالاماۋ نەمەسە دۇرىس ەمەس كەدەندىك دەكلاراتسيالاۋ، كەدەندىك قۇجاتتارداعى مالىمەتتەردى دۇرىس مالىمدەمەۋ)، وسى بۇزۋشىلىقتار بويىنشا ايىپپۇلدار سوماسى 379 210 تەڭگەنى قۇرادى.

ماسەلەن، 2021 جىلعى 16 جەلتوقساندا «نۇرسۇلتان نازارباەۆ» حالىقارالىق اۋەجايىندا نۇر-Cۇلتان-ىستامبۇل حالىقارالىق اۋە رەيسى جولاۋشىلارىنىڭ كەدەندىك باقىلاۋىنان وتكەننەن كەيىن قر ۇقك شەكارا قىزمەتىنىڭ قىزمەتكەرلەرى ليۆان ازاماتىن ۇستادى. وندا جاريالانباعان 13 900 اقش دوللارى انىقتالدى (ۇلتتىق بانكتىڭ باعامى بويىنشا - 6 054 006 تەڭگە).

29 جەلتوقساندا ەلوردا اۋەجايىندا كەدەندىك باقىلاۋدان وتكەننەن كەيىن قر ازاماتى ۇستالدى، ونىڭ دەكلاراتسيالانباعان 38 000 دوللارى (شامامەن 16 409 920 تەڭگە) انىقتالدى.

مەملەكەتتىك كىرىستەر كوميتەتى ەاەو كەدەندىك شەكاراسىن كەسىپ ءوتۋ كەزىندە ۆاليۋتانى اۋىستىرۋ ەرەجەلەرىنە، سونداي-اق «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسكە سايكەس قولما-قول اقشا قاراجاتى كەدەندىك دەكلاراتسيالاۋعا جاتاتىنى انىقتالعانىن ەسكە سالدى.

«كەدەندىك دەكلاراتسيالاۋدى جۇزەگە اسىرۋ وتكىزىلەتىن قولما-قول اقشانىڭ جانە جول چەكتەرىنىڭ شىعۋ تەگى جانە ماقساتى تۋرالى مالىمەتتەردى كورسەتە وتىرىپ، اكەلىنەتىن نەمەسە اكەتىلەتىن قولما-قول شەتەل ۆاليۋتاسىنىڭ، قولما-قول ۇلتتىق ۆاليۋتانىڭ جانە جول چەكتەرىنىڭ بارلىق سوماسىنا جازباشا نىساندا كەدەندىك دەكلاراتسيا بەرۋ ارقىلى جۇرگىزىلەدى»، دەپ ناقتىلادى قر قم مەملەكەتتىك كىرىستەر كوميتەتى.

كوميتەتتە جەكە تۇلعالار كەدەندىك دەكلاراتسياسىز جالپى سوماسى 10 000 اقش دوللارى بالاماسىنان اسپايتىن قولما-قول شەتەل ۆاليۋتاسىن نەمەسە قولما-قول ۇلتتىق ۆاليۋتانى (باعالى مەتالداردان جاسالعان مونەتالاردى قوسپاعاندا) جانە جول چەكتەرىن قر-عا اكەلۋگە نەمەسە قر-دان اكەتۋگە قۇقىلى ەكەنىن ەسكە سالدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز