قر ۇلتتىق ەكونوميكا مينيسترلىگىنىڭ ءباسپاسوز قىزمەتى حابارلاعانداي, پرەمەر-ءمينيستردىڭ ورىنباسارى - سىرتقى ىستەر ءمينيسترى مۇحتار تىلەۋبەردىنىڭ شەتەلدىك مەملەكەتتەردىڭ قازاقستانداعى ەلشىلەرىمەن كەزدەسۋى بارىسىندا ۇلتتىق ەكونوميكانىڭ ءبىرىنشى ۆيتسە-ءمينيسترى تيمۋر جاقسىلىقوۆ قاڭتارداعى وقيعالار قازاقستان ەكونوميكاسىنا ايتارلىقتاي اسەر ەتپەيتىنىن اتاپ ءوتتى.
«وتكەن جىلى ەكونوميكالىق ءوسىم سەرپىندى تراەكتورياعا شىقتى. ناقتى ءجىو باستاپقى بولجامنان 3,1% اسىپ, 4% قۇرادى», دەدى تيمۋر جاقسىلىقوۆ.
سونداي-اق, ول قازىرگى ۋاقىتتا ۇلتتىق ەكونوميكا مينيسترلىگى پرەزيدەنتتىڭ باستامالارىن ىسكە اسىرۋ بويىنشا ۇكىمەتتىڭ 2022 جىلعا ارنالعان ءىس-قيمىل باعدارلاماسىن ازىرلەۋ ماسەلەلەرى بويىنشا بەلسەندى جۇمىس جۇرگىزىپ جاتقانىن اتاپ ءوتتى.
قۇجاتتا ۇكىمەتتىڭ ينكليۋزيۆتى ەكونوميكالىق ءوسۋدى ىنتالاندىرۋ, ماكروەكونوميكالىق تۇراقتىلىقتى قامتاماسىز ەتۋ جانە كاسىپكەرلىكتى دامىتۋ جونىندەگى جۇمىسى ناقتىلاناتىن بولادى.
بۇدان باسقا, ءبىرىنشى ۆيتسە-ءمينيستردىڭ ايتۋىنشا, قازىرگى ۋاقىتتا قر ۇەم حالىقتىڭ تابىسىن ارتتىرۋ باعدارلاماسىن ازىرلەۋمەن اينالىسۋدا. وسى جۇمىس شەڭبەرىندە كەدەيلىك پەن جۇمىسسىزدىق بويىنشا ناقتى جاعدايدى تالداۋ نەگىزىندە جۇيەلى سيپاتتاعى شارالار ازىرلەۋ جوسپارلانۋدا.
سونداي-اق, مينيسترلىك كۆازيمەملەكەتتىك سەكتور سۋبەكتىلەرىن تۇبەگەيلى رەفورمالاۋ بويىنشا ۇسىنىستار ازىرلەۋدە.
تيمۋر جاقسىلىقوۆ اتاپ وتكەندەي, ۇلتتىق ەكونوميكا مينيسترلىگى ەلدەگى الەۋمەتتىك-ەكونوميكالىق جاعدايدى تۇراقتاندىرۋ بويىنشا جەدەل ءىس-شارالار جوسپارىن قابىلدادى, وندا ازاماتتار مەن كاسىپكەرلىك سۋبەكتىلەرىنىڭ قاۋىپسىزدىگىن قامتاماسىز ەتۋگە جانە جان-جاقتى قولداۋعا, سونداي-اق ەلدەگى الەۋمەتتىك-ەكونوميكالىق جاعدايدى جەدەل تۇراقتاندىرۋعا باعىتتالعان بىرقاتار شۇعىل جانە قىسقا مەرزىمدى شارالار بار.
«بۇل جوسپار مەملەكەتتىك ورگانداردىڭ تاياۋ ايلار ىشىندە ءتيىستى مىندەتتەردى ۇيلەستىرە ورىنداۋىنا باعىتتالعان. ونى ىسكە اسىرۋ ەلدەگى ەكونوميكالىق جاعدايدى جەدەل قالپىنا كەلتىرۋگە جانە قالىپتى ومىرگە ورالۋعا اكەلەدى», دەپ قوستى قر ۇلتتىق ەكونوميكا ءبىرىنشى ۆيتسە-ءمينيسترى.
تيمۋر جاقسىلىقوۆ قاڭتارداعى قايعىلى وقيعالارعا بايلانىستى ۆەدومستۆودا جىلدىق ەكونوميكالىق وسۋگە ەلەۋلى ىقپال بولمايدى دەپ قورىتىندىلادى. ونىڭ ايتۋىنشا. ەكونوميكالىق بەلسەندىلىك ۋاقىتشا جانە تەك جەكەلەگەن ايماقتاردا عانا بۇزىلدى.
ول زارداپ شەككەندەرگە, سونىڭ ىشىندە شوب, جك جانە حالىققا بارلىق قاجەتتى كومەك كورسەتىلەتىنىن ەسكە سالدى.
