تەحنيكالىق جانە كاسىپتىك ءبىلىم بەرۋ دەپارتامەنتى ديرەكتورىنىڭ ورىنباسارى ەرنات ءجۇنىسوۆتىڭ ايتۋىنشا, سالاداعى ءبىلىم ساپاسىن جاقسارتىپ, زامان تالابىنا ساي ەتۋ ءۇشىن ءۇش باعىتتا كەشەندى شارالار قولعا الىنعان.
«تەحنيكالىق جانە كاسىپتىك كوللەدجدەردىڭ ءبىلىم ساپاسىنا جۇمىس بەرۋشىلەر تاراپىنان دا, قوعام تاراپىنان دا سىن كوپ ايتىلىپ ءجۇر. مينيسترلىك وسى باعىتتا ءبىراز جۇمىس ىستەپ جاتىر. سونىڭ ءبىرى – اكادەميالىق دەربەستىك. بۇرىن كوللەدجدەردەگى وقۋ باعدارلامالارىن مينيسترلىك ازىرلەپ, وقۋ پاندەرى مەن كولەمىن, مەرزىمدەرىن انىقتاپ بەرەتىن. وقۋ ورنى سول باعدارلاما بويىنشا عانا جۇمىس ىستەيتىن. ول كەزدە وقۋ ورىندارىنىڭ باعدارلامانى وزگەرتۋگە ەشقاندي مۇمكىندىگى بولمادى. اكادەميالىق دەربەستىكتىڭ اياسىندا وقۋ ورىندارى جۇمىس بەرۋشىلەرمەن بىرلەسىپ وقۋ باعدارلامالارىن كاسىپتىك ستاندارتتار نەگىزىندە ازىرلەپ, مەرزىمىن دە وزدەرى بولىپ انىقتايدى. بۇرىن وقۋ مەرزىمى 1 جىلدان 4 جىلعا دەيىن بولسا, قازىر ونى جۇمىس بەرۋشىلەر مەن وقۋ ورىندارى وزدەرى بەلگىلەيدى», دەدى مينيسترلىك وكىلى.
دەپارتامەنت ديرەكتورىنىڭ ورىنباسارى ءبىر وقۋ باعدارلاماسى ارقىلى بىردەي بىلىكتىلىك الۋعا رۇقسات بەرىلگەنىن اتادى.
«وقۋ ورىندارى جۇمىس بەرۋشىلەردى تارتقان كەزدە ەڭبەك نارىعىنداعى, سول كاسىپورىنداعى ناقتى تالاپتىڭ ءبارىن ەسكەرەدى. ءبىز ءبىر وقۋ باعدارلاماسى شەڭبەرىندە بىرنەشە ماماندىق الۋعا مۇمكىندىك بەردىك. بۇرىن اسپاز بولىپ شىعۋ ءۇشىن عانا ستۋدەنت 3 جىل وقۋى كەرەك بولعان. قازىر وسىنداي ءبىر ماماندىق اياسىندا 3 بىلىكتىلىك الۋعا رۇقسات جاساپ وتىرمىز. كەز كەلگەن بىلىكتىلىكتى العاننان كەيىن ستۋدەنتتەر ەڭبەك نارىعىنا شىعىپ, جۇمىسقا ورنالاسا الادى. قاجەت بولسا, قايتا كەلىپ باسقا بىلىكتىلىك بويىنشا وقۋىن جالعاستىرا بەرەدى. وقۋ باعدارلامالارىن كوللەدجدەر جانىنان قۇرىلعان يندۋستريالىق كەڭەستەر بەكىتەدى», دەدى ەرنات ءجۇنىسوۆ.
