قازاق ۇلتتىق قىزدار پەداگوگيكالىق ۋنيۆەرسيتەتىنىڭ (قازۇپۋ) ستۋدەنتتەرى نازەركە حالەل مەن مۋنيسا سايديعانيەۆا وسىمدىك مايىنان بيووتىن دايىندادى. ولاردىڭ جوباسى حالىقارالىق كونفەرەنتسيادا جۇلدەلى ورىن الدى. جوبا جەتەكشىسى – قازۇپۋ دوكتورانتى گۇلسارا اقانوۆا. ول ەكولوگيالىق تازا بيووتىن ءوندىرۋدىڭ بىرەگەي تەحنولوگياسىن ازىرلەۋمەن بىرنەشە جىل بويى اينالىسىپ كەلەدى جانە وسى جوباسىنا ءوزىنىڭ شاكىرتتەرىن دە تارتقان.
«قازىر كوپتەگەن ەل بيووتىنعا كوشىپ جاتىر. شەتەلدە بيووتىندى نەگىزىنەن قانت قامىسى, جۇگەرى سياقتى ءارتۇرلى وسىمدىكتەن وندىرەدى. ءبىز بيووتىن الۋ بويىنشا ءوزىمىزدىڭ ءتول تەحنولوگيامىزدى ويلاپ تاپتىق ءارى سونىڭ نەگىزىندە ءونىم الدىق. جىلدام تاماقتانۋ ورىندارىندا وسىمدىك مايى كوپ مولشەردە پايدالانىلادى جانە تاماق پىسىرگەننەن كەيىن جارامسىز بولىپ قالادى. ءبىز ونى قايتا وڭدەۋدى ۇسىنامىز. بۇل ءۇشىن وسىمدىك مايىن ۇساق قوسپالاردان تازارتامىز, سودان كەيىن ءسىلتىلى كاتاليزاتور مەن ەتيل ءسپيرتىن قوسامىز. وسىلايشا, بيووتىن الامىز», دەيدى دوكتورانت گ.اقانوۆا.
جاس عالىمداردىڭ جوباسى بىرقاتار ەكولوگيالىق جانە ەكونوميكالىق ماسەلەنىڭ ءتۇيىنىن تارقاتادى. بيووتىن ەكولوگيالىق تازا جانە ءتيىمدى, سونىمەن قاتار ارزان, قاۋىپسىز. وسىعان قوسا بيووتىن تاسىمالداۋعا دا ىڭعايلى.
پايدالانىلعان وسىمدىك مايىنان بيووتىن الۋ تەحنولوگياسى جاس عالىمدار مەن ستۋدەنتتەردىڭ «فارابي الەمى» حالىقارالىق كونفەرەنتسياسىندا ۇزدىكتەردىڭ ءبىرى دەپ تانىلدى. ازىرگە بۇل – قازاق ۇلتتىق قىزدار پەداگوگيكالىق ۋنيۆەرسيتەتى ستۋدەنتتەرىنىڭ العاشقى عىلىمي جەتىستىگى. الداعى ۋاقىتتا جاس زەرتتەۋشىلەر جۇمىسىن جەتىلدىرىپ, ستارتاپ جوبالاردىڭ بايقاۋلارىنا قاتىسۋدى جوسپارلاپ وتىر.
