«بۇگىن قىتاي استاناسى بەيجىڭدە XXIV قىسقى وليمپيادا ويىندارىنىڭ الاۋى تۇتاندى. بۇل – بارشا سپورتسۇيەر قاۋىم ءۇشىن ماڭىزدى وقيعا. وسى ءدۇبىرلى دودادا ءبىزدىڭ سپورتشىلارىمىز دا باق سىنايدى. مەملەكەت باسشىسى قاسىم-جومارت كەمەل ۇلى توقاەۆ وليمپيادانىڭ سالتاناتتى اشىلۋ راسىمىنە ارنايى قاتىسىپ, اتلەتتەرىمىزگە قولداۋ ءبىلدىردى.
تاۋەلسىزدىك العالى قازاقستاندىق سپورتشىلار اق وليمپياداعا تۇراقتى تۇردە قاتىسىپ كەلەدى. وسى جىلدار ىشىندە ۆلاديمير سميرنوۆ, ليۋدميلا پروكاشەۆا, ەلەنا حرۋستالەۆا, دەنيس تەن جانە يۋليا گالىشەۆا سياقتى ساڭلاقتارىمىز جەڭىس تۇعىرىنان كورىنىپ, بارشا قازاقستاندىقتارعا زور قۋانىش سىيلادى. بيىلعى قىسقى ويىنداردان كەيىن بۇل ءتىزىم تولىعا تۇسەدى دەپ سەنەمىز.
تورتكۇل دۇنيە كوز تىككەن وسىنداي الامانداعى جەڭىستەر ۇلتتى ۇيىستىرىپ, ازاماتتارىمىزدىڭ پاتريوتتىق رۋحىن ارتتىراتىنى انىق. ءبىز بۇل جولى دا ءدال سونداي تاماشا كوڭىل-كۇيدى باستان وتكەرەمىز دەپ ۇمىتتەنەمىز. وسى جولدا بەيجىڭگە اتتانعان ءاربىر اتلەتىمىزگە جەڭىس پەن ساتتىلىك تىلەيمىز جانە ءاردايىم قولداۋ بىلدىرەمىز», دەلىنگەن قۇتتىقتاۋدا.
