ەكونوميكاعا نەسيە بەرۋ ازايادى

Ranking پورتالىنىڭ جا­زۋىنا قاراعاندا, پاندەميا سالدارىنان تۋىنداعان داعدارىس سالدارىن جويىپ, قالىپتى ومىرگە قايتا ورالۋ ءۇشىن 6,3 ترلن تەڭگە بولىنگەن. بۇل رەتتە باس قارجىلىق قاداعالاۋشى – ۇلتتىق بانكتىڭ ءوزى 2,3 ترلن تەڭگە بەرگەن. وتاندىق كاسىپكەرلەرگە 977,2 ملرد تەڭگە كولەمىندە 3 362 جەڭىلدەتىلگەن زايم ۇسىنىلدى. سونىڭ ناتيجە­سىندە وڭدەۋشى ونەركاسىپ, اگرو­ونەر­كاسىپ كەشەنىندەگى قايتا وڭدەۋ سا­لاسىندا جۇمىس ىستەيتىن كاسىپورىندار وندىرىستىك الەۋەتىن ساقتاپ قالا الدى.

«1,5 مىڭ كاسىپكەر قولداۋ ارقىلى ىسكەرلىك بەلسەندىلىكتەرىن ساقتاپ, 95 مىڭنان استام ازاماتتى تۇراقتى جۇمىسپەن قام­تاماسىز ەتتى. قاداعالاۋشى بولگەن قارجىنىڭ ناتيجەسىندە 11,5 مىڭنان استام جوبا 1,1 ترلن تەڭگە كولەمىندە قار­جى­لاندىرىلدى. سونىمەن قاتار مەملەكەت باسشىسىنىڭ تاپسىرماسىمەن ۇلتتىق بانك جۇمىسپەن قامتۋدىڭ جول كارتاسىن ىسكە اسىرۋعا قاتىستى: باعدارلاما بو­يىنشا بولىنگەن 1,1 ترلن تەڭگەنىڭ 800 ملرد تەڭگەسى وسى باعدارلاما اياسىندا جۇمسالدى», دەلىنەدى Ranking زەرتتەۋىندە.

وسىنداي بەلسەندى قولداۋدىڭ ناتيجەسىندە 2020 جىلدىڭ قورى­تىندىسى بويىنشا 6,5 مىڭ ينفراقۇرىلىمدىق جوبا جۇزەگە اسىپ, اسىرەسە اۋىلدىق جەرلەردە 238 مىڭنان استام ۋاقىتشا جانە 6,6 مىڭ تۇراقتى جۇمىس ورنى قۇرىلىپ, ءبىرشاما جۇمىس ورنى ساقتالىپ قالعان.

سوڭعى جىلدارى مەملەكەتتىڭ ەكونوميكاعا ارالاسپاۋى تۋرالى ءجيى ءسوز قوزعالا باستادى. راس, مەم­لەكەتتىڭ ەكونوميكاعا نەسيە بەرۋدى ازايتۋى ۇسى­نىس پەن سۇرا­نىس­قا نەگىزدەلگەن تازا نارىق ۇستا­نى­مىمەن جۇمىس ىستەي­تىن ەكونوميكا قالىپتاس­تىرا­دى. قاي ەلدەگى بولسىن, قارجى سەك­تورىنىڭ تابىستى دامۋى باسە­كەلى ورتانىڭ قالىپ­تاسۋى­مەن تىكەلەي بايلانىستى. اقشا رەسۋرسىنىڭ قۇنىن نارىق ءوزى انىقتاعان كەزدە باسەكەلى, تابىستى ەكونوميكالىق ورتا قۇرىلا­تىنى بەلگىلى. بۇل كاسىپكەرلىك ەركىندىككە, تابىسقا جانە ساپاعا جول اشادى.

ال ۇلتتىق بانكتىڭ ۇدايى نەسيەلەۋ باعدارلامالارىنا قاتىسۋى ىرىققا كونبەيتىن ينفلياتسيا ءوسى­مىن ۇدەتىپ, ۆاليۋتا نارىعىن تۇ­راق­­سىزدىققا ۇرىندىرىپ, سو­ڭىن­دا ەكونوميكالىق ءوسىم ۇزاق مەر­زىم بويى قۇلدىراۋعا ۇشىرا­ماق. وسى ورايدا, ۇلتتىق بانك­تىڭ داع­دارىسقا قارسى باعدار­لا­ما­لاردان 2025 جىلعا دەيىن شىعۋ­دى جوس­­پارلاپ وتىرعانىن اي­تا­يىق. ۇلت­­تىق بانكتىڭ ەكس-تور­اعا­سى ەر­بو­­­لات دوساەۆتىڭ ايتۋىنشا, قا­دا­­­عا­­لاۋ­شى بولگەن 2,3 ترلن تەڭ­گە ار­­قىلى قازاقستان ەكونوميكا­سى پان­­دە­مياعا دەيىنگى دەڭگەيگە ورا­لىپ, ءوسىم 3,5 پايىزدى قۇرادى. بىراق ۇلت­تىق بانك «قاراپايىم زاتتار ەكو­نوميكاسى» مەن «7-20-25» باع­دار­لامالارىن بيىل دا جالعاس­تىرادى.

«ەكونوميكانى ءارتاراپتان­دىرۋ جانە يمپورتقا تاۋەلدىلىكتى تومەندەتۋ ماقساتىنا جەتكەننەن كەيىن ۇلتتىق بانك ينفلياتسيالىق قىسىمدى ءتۇسىرۋ جانە اقشا-نەسيە ساياساتىنىڭ تيىمدىلىگىن ارتتىرۋعا باعىتتالعان مەملەكەتتىك قولداۋ كەزەڭىنە ءوتۋدى ماڭىزدى دەپ سانايدى. نارىق مولشەرلەمەلەرىنە نەگىزدەلمەگەن جەڭىلدەتىلگەن قارجىلاندىرۋ ەكونوميكاداعى اقشا قۇنىن جانە قارجى مەن بيزنەس سەكتورىنداعى باسەكەنى وزگەرتەدى. ۇكىمەت بۇل فاكتورلار­دى مويىندايدى جانە مەم­لەكەت­تىك قولداۋدىڭ نارىقتىق ەمەس قۇ­رال­دارىنان باس تارتۋدىڭ 5 جىل­دىق جول كارتاسىن ويلاستىرۋدا», دەدى ە.دوساەۆ.